الاثنين، 27 فبراير، 2012

بحبك ليه؟؟؟؟؟؟؟




ما تسألنيش بحبك ليه؟
أنا نفسى معنديش رد,
أنا ما اعرفش غير إنى ,
بحبك من السما للارض  ,

لقيتك دار بتحضنى ,
تدفينى فى عز البرد,
لقيت وياك سنين عمرى ,
طريق مفروش بلون الورد,

لقيتك طيف فى أحلامى ,
ليلاتى يزورنى ويجينى ,
لقيتك دقه فى قلبى ,
لقيتك ننى فى عينى ,

أنا مأعرفشى غير إنى ,
بموت فى هواك ,
لكن تسألنى ليه وعلى إيه ؟
هقول ما أعرفش ,
بحبك ليه ؟

الأحد، 26 فبراير، 2012

لساك ؟؟؟؟؟؟؟؟



لساك بتضحك؟؟؟؟
طب لسة قلبك قادر يغنى؟
لساه كمان يعرف يطير ؟
ولا خلاص؟
من كتر همك ,
كلفت روحك وحبستها ,
وف سجن قلبك كتفتها ,
سكتها ,خرستها ,
وسيبتها ,
حيرانة مش لاقية الطريق ,

لساك بتحلم ؟؟؟؟
ولا نسيت ؟
ودفنت بكرة مع اللى جاى ,
جوة مدافن ,
 حلم , 
مات لك من سكات ,

لساك بتقدر ؟؟؟؟
ولا إنتهيت ؟
يوم ما التقيت ,
أغلى ما عندك خانك وباع ,
وراح وضاع ,
وسط الحياة ,

لساك بتسمع ؟؟؟؟
 طب خدها حكمه ,
إنت الوحيد ,
اللى ف يوم 
 را ح تبئا  قادر ,
تلم جرحك وتداويه ,.
وتدفى قلبك ,
الجريح ,
وترجعه ,
من وسط توهة زكرياته ,
لجل أما ينبض من جديد .