هتشعبط :)

 وهتشعبط

ف بكره الجاى على مهله

وهستناه

مفييش مانع

وه...ندهله

هيتأخر ؟

وإيه يعنى ؟

هييجى هييجى

هيروح فين ؟

يا بكره يا جاى ف ميعادك

انا مشتاق

لضمة حضن من غير خوف

لنور

لطريق رسمتك فيه بخطاويا

لفجريه

لركعه وسجده ولسبحه

ل.....توضيه

لحضن الشمس على نيلك

يا بكره الجاى

انا عشمان

ومستنى

وهصبر

زى ربى ما قال

يا بكره الجاى

صدفه

وقابلته صدفه من بين ناس كتير
بصينا لبعض ف وسط الزحمه
لقيته جاى ناحيتى
وقالى انتى اللى كنت بدور عليها من زمان
وركع على ركبته زى افلام السيما وقالى تتجوزينى ؟
وفجأه

لقيت امى بتنده عليا وبتقولى
قومى ياللى تتشكى ف معاميعك الساعه بئت 10 ورانا غسيل وتنفيض النهارده
حتى الحلم مش متهنيه عليه
أأأأأأأأأأأأأألهوى أأأأأأأأأأجدعان بئا 

بقيت خايف

بقيت خايف

بقيت شايف

خيالى طشاش

بقيت عايش ومش عايش

بقيت بستنى يومى يفوت

عشان اهرب

بقيت وحدانى طول الوقت

ولو

حتى ما بين الناس

بكون موجود

يا روحى يا تايهه

من ضيي

هقابلك تانى إمتى وفين ؟

يا نور الصبح يا سارح

أنا مليت

هترجع امتى لجل تنور العتمه

اللى سكنت جوه نن العين ؟

انا ساكت ومش هنطق

لكن عشمان

ومطمن

ببكره الجاى

ومستنى

فاكر ؟

فاكر لما كنا بنتمشى ف يوم انا وانت ع البحر
ولقيتك مره واحده وقفتنى كده وقلتلى
شايفه البحر ده كله
قلت لك اه شايفاه بس اشمعنى ؟
قلت لى اهو انا بقا بحبك حب ملهوش اخر زى البحر ده كده
بصيت له اوى وقتها وسكت
قلت لى الله ؟ مالك بقا ؟ انتى مش فرحانه ولا ايه ؟
قلت لك ازاى بس مش فرحانه فرحانه طبعا بس خايفه
مسكت ايدى وقلت لى طول مانا جنبك ومعاكى مش عاوزك تخافى ابدا ولا تعملى للدنيا بنت اللذينه دى حساب
واهو ادينى لوحدى ومن غيرك وانت مش معايا
اخاف بقا ؟ ولا ما اخافش ؟
واعمل للدنيا بنت اللذينه حساب ؟ ولا بلاش ؟

اسند راسى على كتفك ؟ ممكن ؟

مالك ؟
مفييش
يا بنتى مالك ؟
مفييش
طيب مبوزه ليه ؟ هو انا يعنى مش عارفك ؟
انا حاسه انى مبقتش عارفه نفسى
طيب احكيلى مالك بقا ؟ ما تقلقنيش عليكى
انا مش عاوزه احكى عشان مفييش حاجه تتحكى
ممكن اسند راسى على كتفك وانا هبقا كويسه

التركى وسنينه :)

ممكن تفهمنى يعنى إيه زميلتك ف الشغل تجيب لك هديه ف عيد ميلادك ؟
اديكى قلتيها بلسانك زميلتى ، وف الشغل ، وف نفس ذات الجمله
لو سمحت انا مش بهرج دلوقت ولا ده وقت هزارك البايخ
سؤال ورد غطاه ، اتفضل جاوب
يا حبيبتى .....
بس ما تقولش يا حبيبتى
خلاص يا ستى .........
وما تقوليش يا ستى كمان
طب تعالى قربى هقولك حاجه وإنتى زعلانه كده وزى القمر
اتفضل ؟ خير
يا مراتى المستقبليه دى مجرد زميلتى ف الشغل ومش معنى انها جابت لى هديه انها بتحبنى او فى بينى وبينها حاجه
انا مش بشوف اصلا بنات غيرك يا حبيبتى
مراتى المستقبليه ، وحبيبتى ف نفس ذات الجمله ؟
انا بحبك وبغير عليك بقا ، ممكن ما تزعلش منى ؟
مش زعلان وما اقدرش ازعل منك أصلا
طبعا دى النسخه التركى او الهندى ما تفرحوش اوى كده وتتعشموا خير ، تعالوا بقا نبص ع النسخه العربى ام الأجنبى

تقدر تقولى عواطف اللى معاك ف الشغل جابت لك هديه ليه ف عيد ميلادك ؟
جررررررررى ايه أأأأأأأأابت أأأأأأأأشوق ، انتى بتغيرى عليا يا بت ؟
أأأأأأأأأأاغير ؟ لا طبعا ما بغيرش ، وبعدين هى دى خلقه يتغار عليها دى ؟ ما تتمشى كده لغاية الحمام وبص ف المرايه ، كان يوم اسود ووقعه مهببه
اومال انتى بتسألى ليه على عواطف ؟ لما انتى مش غيرانه ؟
لا يا حبيبى انا بسأل عشان زى ما هى جابت للبيه هديه ، يبقا البيه لازم يردهالها ، وخد بالك هى عيد ميلادها الشهر ده ، وانا عاوزه اروح انقط البت حميده عشان خلفت ، هاااااااااااا يا خفيف ؟ هتدينى انقط البت حميده ؟ ولا هترد الهديه لعواطف ؟

نعم مازلت انسه بس مش صيده :)

البنت اللى كبرت شويه وربنا مكتبلهاش لسه انها تتجوز
مش موجوده ف الدنيا علشان حضرتك تطلع عليها "عجزك"
مش موجوده علشان حضرتك تستغلها من باب انها محرومه ومعهاش راجل يكفيها
مش موجوده علشان حضرتك تتسلى عليها وتحسسها انها عروسه بلاستيك
مش موجوده علشان جنابك كل ما تجيلك فرصه تفكرها انها عندها "واوا"
وانها تبوس إيدها وش وضهر ان سعادتك اتكرمت وبصيتلها
مش موجوده علشان ع الفاضيه والمليانه تحسسها ان مع كل يوم بتكبر فيه بيقل رصيدها ف اختيار زوج مناسب و"ع الفرازه"
هى عارفه كل ده
هى مدركه تماما انها مضطره تدفع فاتورة "تخلف" مجتمعى
ما بيعرفش يفرق بين جانى ومجنى عليه ، بين ضحيه وجلاد ؟
هى فيها اللى مكفيها
ومش مستنيه أكتر على فكره
هى عارفه انها صيده لمدير بصباص ، لراجل متجوز ومحتاج تغيير ، لرجل كبير عاوز يحس انه لسه "راجل " ، لأرمل محتاج بيبى سيتر تربيله ولاده
او لشاب حتى بس علشان يطلع عليها كبته ويعايرها كل شويه انه انقذها من فخ العنوسه والوحده والحرمان
وانه انتشلها قبل ما تتحول "لعاهره" مثلا
أو لصائده رجاله بالجمله
هى مش محتاجه منك او من غيرك ، غير انك تسيبها ف حالها
ممكن تسيبها ف حالها ؟ وتشوف لك حاجه تتسلى فيها غيرها ؟
ممكن ؟

كراكيب ذكرى

البنت اول ما بتيجى الدنيا اهلها بيشتروا لها كل الحاجات اللى هتستخدمها ف بيتها لما تتجوز "الجهاز "
بتكبر البنت كل يوم وحاجاتها بتكبر معاها
والوجع بيكبر كمان
بصة الام على الصناديق والكراتين والشنط بتوجع قلبها
وبتفكرها كل يوم ان بنتها "لسه ما اتجوزتش "
تجربتى مع "الجهاز " تجربه لا يستهان بها
لانى تقريبا إشتريت كل الحاجات لانى كنت "قربت أتجوز"
"جهازى" كله ف شنط ومتشاله زى ما تكون "مستخبيه " وزعلانه
"جهازى " بالنسبه لماما زى "الشبح " "الغول" "الضيف التقيل " اللى بتتمنى انه يسيب البيت ف اقرب وقت ممكن
يجوز بالنسبه لى الوضع مختلف
كل واحد بيقيم المواضيع من وجهة نظره هو
امبارح قررت انى اهزم الغول واواجهه وبما انى كنت لوحدى ف الشقه وماما مكنتش موجوده
فقررت انى افتح كل الشنط
انضفهم واشيل من عليهم تراب السنين
تخيلت انى قويه بالقدر الكافى ،
لكن مع اول شنطه اتفتحت ، اتوجعت ، وسمعت كلام أمى ف ودنى ، وشفت بصة عنيها اللى كلها ألم ووجع وحسره ، على بنتها اللى من وجهة نظرها "زى الفل " ومش ناقصها اى حاجه
مع كل شنطه كانت بتتفتح ، كنت برجع للتاريخ اللى اشتريت فيه اللى ف الشنطه
افتكرت كل الاحداث ، افتكرت كل الاشخاص ،
نضفت الشنط وقفلتها ورجعتها مكانها وانا مقرره انى مش هفتحهم تانى
الشنط فعلا جواها حاجات بتخوف
الشنط مليانه ذكريات وتواريخ وبنى ادميين مشوا ومش هيرجعوا تانى
الشنط جواها هدايا جاب هالى بابا لما اتخطبت
الشنط جواها هدايا جاب هالى قرايبى اللى سافروا ومش موجودين معايا
الشنط جواها فرقه وحرقة قلب
الشنط جواها زرع ميت مشافش الشمس من سنين ويا عالم ؟ هيشوف الشمس ويرعرع تانى ويخضر
ولا هيفضل ميت ؟
الشنط جواها احلامى ببيت صغير
الشنط جواها كدب وغش وكلام من غير تنفيذ
الشنط فعلا جواها بعبع
انا شفته وعينه جت ف عينى مع كل شنطه فتحتها
علشان كده قفلت الشنط وجواها الغول ، وخبيتها زى ماكانت ف الضلمه
الفكره مش فكرة تمنى ، مش فكرة إمتى هفتح الشنط تانى .؟ مش فكرة بيتى الصغير وشريك حياتى اللى بحبه
الفكره فكرة "ذكرى"
فكرة "إمبارح " كله وجع ، و"بكره" بدع من كل قلبى يبقا احسن م اللى فات .
مهما كنت فاكر نفسك "جامد " و "قوى " و "قلبك جامد "
هتتكسر قدام ذكرى بتوجع وهتجيب قلبك الارض مهما كنت واقف ف مطرحك وصالب طول .
يارب بكره زى ما بتمنى
يارب

كوباية شاى

عارف إحساس انك هتموت وتشرب "كوباية شاى "
وتجيلك سخنه مولعه
تحطها اودامك ، وتروح بتفكيرك لمكان ما
وترجع تلاقى كوباية الشاى بردت و بقت "تلج"
وتلاقيك مبتسم إبتسامه "بلهاء"
وبتقول لنفسك "المهم إنى وصلت بالسلامه "
فدايا كوباية الشاى
وتقوم عشان تعمل غيرها وتشربها "بس من غير نفس"
عشان روحك ف حته تانيه
مع ناس تانيين

جربت تعييش وجواك ميت ؟ :(

ساعات كتير بنبقا مضطرين اننا نتعايش مع اللى حوالينا
فتلاقيك بتشتغل ، بتسمع لمشاكل اللى حواليك ، بتضحك لفلانه ، بتجامل علان ، بتزور حد مريض ، بتحضر فرح وبتلبس اشيك حاجه عندك ، وإنت من جواك "مفييييييييش " "فااااااااااااااضى "
عايش فعلا بس من جواك "ميت "
جربت ؟ تعييش وجواك "ميت "  

مش باقى منى

ممش باقى منى ،

غير يا دوب ،

"فكره "

حاضنه ف كفوفها النونو 

"أحلامى "

مش باقى منى ،

غير يا دوب ،

"بكره"

عايش عليه الجاى ، 

ف أيامى .

بقيت حاوى

بقيت حاوى

ف حبك قلبى مش ناوى

يقول توبه ولا يطلب

ف يوم غفران

ف لو تسمحلى ست الكل

وتوافق

انا طالب اكون لك ضى

ف منامك

وأسكن كل احلامك

وأكون لك دار

تعيشى فيه وتتهنى

وتتمنى

انا موجود عشان خاطر

انفذ كل احلامك

واكون لك طيف لايامك

يزورها يدفى وحدتها

فلو تسمح

حبيبة القلب والننى

هكون جنى

وأسافر جوه أحزانك

وأشيل وجعك

وأحط مكانه ب أديا

فرح

دوونيا

وبكره

كله حب ف حب

ف يا تاجى ؟

موافقه ؟ ولا إيه رأيك ؟

أنا هستنى رهن إشاره 

من قلبك 

وهدعى ربى وأتمنى 

أكون جنبك

يا ست الكل 

يا ساكنه القلب والننى 

مشاعر

مشاعر تشيلك 

مشاعر تحطك 

مشاعر ف قلبك

بترسم دواير 

بتفرح 

بتزعل 

بتنسى

بتكره

وعاشر

وحب

عشان يوم

تفارق 

انا بمثل :(

انا ما نسيتكش على فكره زى ما انت متخيل
وزى ما كل اللى حوالينا متخيلين
انا بمثل
ايوه بمثل على فكره , ممكن ابان انى قويه وانى جدعه ونسيتك خلاص
بس انا من جوايا بتقطع
ما هو ماينفعش ابين انى لسه بحبك وبتمنى اللحظه اللى ممكن نرجع فيها نبقا مع بعض تانى
هو احنا ممكن نرجع نبقا مع بعض تانى ؟
صعب صح ؟
اصل الكسر اللى ف قلبى منك مش بالسهوله دى ممكن يرجع يتصلح تانى
انت كسرتنى بجد
وهديت كل حاجه حلوه كانت ليك جوايا
صورتك اللى كانت ف قلبى اتشرخت وعمرها ما هترجع زى زمان
انا لسه بحبك ممكن لان ده غصب عنى ومش بإرادتى
عارف ؟
انا لسه بدعىلك ف صلاتى
بس المره دى الدعوات مختلفه
الاول كنت بدعى ربنا يقربنا من بعض
لكن دلوقتى بدعى
ان ربنا يشيلك من قلبى
وانساك
ما هو انا لازم انساك

لما حبيتك

لما حبيتك
فرق معايا بكره اللى جاى
مفكرتش ف امبارح
ونسيته كمان
حبيتك من غير ليه وازاى
حبيتك من غير اسباب
حبيتك كلك على بعضك
زى ما بيقولوا كده , حبيتك شروه
فتحت معاك بيبان قلبى ع البحرى
وفكيت ضفايرى الملمومه بقالها سنين
وفتحت الشيش
وسيبت الشمس تخش تدفى البرد اللى ف روحى
لما حبيتك
بطلت اخاف
بطلت افكر
بطلت ابص ف ساعتى كل شويه
لما حبيتك حبيت الدنيا كلها
شفتها بالوان تانيه غير اللى كنت بشوفها بيها
بقيت بسمع زقزقة العصافير
وصوت ورق الشجر لما بيتهز جنب شباكى
لما حبيتك ما فكرتش ف لحظة الفراق
ما استعدتلهاش
مرتبتش حساباتى عليها
لانها كانت خارج دايرة حساباتى
مش هنسى نبرة صوتك وانت بتطمنى
وبتطبطب عليا وبتقولى "ماتخافيش "
ده انا جاى اراضيكى واخد لك حقك م الدنيا
ومش هنسى كمان نبرة صوتك
وانت بتقولى "مش هينفع"
انا مش زعلانه انك سيبتنى
ولا متضايقه انى رجعت تانى ابقا لوحدى
عارف ليه ؟
علشان وانا بحبك اتعلمت حاجات كتير اوى
اهمها
انى اسيب الشيش ممفتوح للشمس
وافك ضفايرى للهوا
واحلم ببكره
حبك علمنى ان الدنيا مش مستاهله وجع قلب
كفايانى اوجاع
الدنيا زى القطر , اينعم لها محطات
بس لو فاتتنى مش هتستنانى
انا اللى لازم أجرى وراها
لانها ما بتقفش على حد
وانا زى الدنيا
وعمر حياتى ما هتقف عليك
ولا على غيرك 

فستان فرح

فاكر ؟
لما كنا بنتمشى سوى لما كنت عازمنى على ايس كريم من اللى بحبه ده
ولقينا "اتيليه "ف طريقنا
وانا اتسمرت قدامه واتشعبطت فيك زى العيال الصغيره وقلت لك
مش همشى يعنى مش همشى ولو مطلعتنيش فوق هدبدب برجلى ع الارض زى العيال الصغيره وهزعق وهلم علينا الناس ف الشارع
وقلت لى بس بس يا ماما
ليه يارب كده توعدنى بواحده مجنونه احبها
شديتك من ايدك وطلعنا
وقعدنا نقلب ف الفساتين والست صاحبة الاتيليه قالت لنا
ماشاء الله شكلكوا حلو اوى يا ولاد وانتوا جنب بعض لايقين على بعض ربنا يسعدكوا
وهووووب واحنا بنقلب كده اختارنا احنا الاتنين نفس الفستان
دخلت وقيسته وانت بلمت من حلاوته عليا
فاكر قلت لى ايه ساعتها
شكلك عروسه وزى القمر اهو ما تيلا نطلع ع المأذون
ياريتنى كنت وافقت وكنا اتجنينا واتجوزنا
عارف
انا كل ما اعدى من قدام الاتيليه ده
بقف وبفتكر اليوم ده زى ما يكون امبارح
الفستان لسه موجود ف الفترينه
زى ماتكون الست صاحبة الاتيليه مش هاين عليها توجعنى وتشيله وتحط غيره
حتى لو شالته
الفستان
واللى كان نفسى البسله الفستان
لسه ف قلبى
وعمرى ما هنساهم ابدا

انا التايه

أنا التايه
وأنا المغصوب على أمرى ,
أنا العايش ومش عايش ,
ف ملكوتك .

أنا المجروح
وأنا اللى بعيش ف أيامك ,
حلاوة روح ,
ومش عاجبه أساليبك ,
ورافض أى قول أو بوح .

أنا العاصى
وأنا اللى كفرت بقانونك ,
وأنا اللى إيمانى بسيادتك ,
ف وقت الجد ,
ما بحسوش .

أنا المرفوض
وأنا المجبور على الطاعه ,
وقولة الأه ,
تقولى يمين أقول حاضر,
تقولى شمال أقول طيب .

أنا الساكت
وأنا الراضى ببلاويكى ,
عشان طمعان ,
ف حبة نور ,
يجونى من معاليكى .


أنا العشمان
وأنا الطمعان ف بلة ريق ,
وقشاية,
عشان أعبر بحور يأسك ,
بحلم غريق.

بنوتى الحلوه :)

بنوتى البيضه الموزه اللى طالعه لأمها
وحشتينى أأأأأأأأأبت
انتى عارفه انا اتمنيتك من امتى ؟ واستنيتك اد ايه ؟
انتى عارفه انا بحلم بحضنك وضمة ايديكى دى بقالى اد ايه ؟
المهم حمد الله على سلامتك يا ست البنات
نورتى قلب مامتك
بصى بئا انا عاوزه اقولك على شوية حاجات كده ع الماشى تحطيهم حلقه ف ودنك
وعارفه كمان الكلام اللى هقولهولك ده جدك الله يرحمه قالهولى من سنين كتيره اوى
وعاهدته عليه زى ما انتى هتعهدينى دلوئتى ان شاء الله
انا صاحبتك يا بت مش امك اتكلمى معايا ف اى حاجه وف اى وقت
هتلاقينى جنبك اوى وهحس بيكى عشان انا كنت بنوته زيك كده ف يوم من الايام
انا عاوزه منك الصراحه , حتى لو عملتى حاجه غلط ما يهمكيش ما كلنا بنغلط المهم انك تكونى جدعه وتعرفى تتصرفى
انا واثقه فيكى وف تربيتى
وعارفه انتى هتعملى ايه من ورايا
مش عاوزاكى تسلمى قلبك الابيض غير للى يستاهله
انا عارفه انك هتقابلى ف حياتك ولاد وشباب عاوزين يستغلوكى
بس انا عارفه بت اسمه جدعه وب 100 راجل
ومش هتخلى عيل خبؤ ييجى ويقسم عليها , صح يا قلب امك ؟
اتعلمى , افهمى الدنيا كويس اوى , شيلى مسئولية نفسك , اخرجى , صاحبى ناس كتير , اطلعى رحلات , حبى

وهتلاقينى جنبك وحواليكى لو احتجتى اى حاجه
ربنا يطمن قلبى عليكى واشوف ولادك وانا على وش الدنيا
اه واشوفك دكتوره حلوه كده عشان كلام ف سرك امك كان نفسها اوى تبئا دكتوره بس محصلش نصيب بئا
ع العموم الدكاتره خسروا وربنا

يلا مستنياكى بئا ما تتأخريش

الحب عيب وقلة حيا ؟

مستغربين صح ؟ مش هما اللى قالونا كده واحنا صغيرين
وربونا على ان الحب قلة ادب وقلة حيا
وان البنت اللى بتقول انا بحب دى "فاجره " ووشها مكشوف وهعنيها تدب فيها رصاصه ؟
مش هما اللى ربونا على الحب ف الحمام او تحت اللحاف ؟ او ف البلكونه وتشدى الستاره عشان محدش م الجيران يشوفك وانتى ماسكه الموبيل ؟
مش هما اللى علمونا نتدارى واحنا بنحب كأننا بنعمل حاجه عيب ؟
مش هما اللى اجبروا اللى بيحبوا يستخبوا , ويعملوا باسوورد للموبيل والكمبيوتر ؟
مش هما اللى علمونا ان البنت المفتحه هى اللى بتدارى وبتكتم ع الخبر مجور
وان "الصايعه " هى اللى بتقول الصراحه
مش هما اللى عودونا نقول للعريس اللى جاى "انت اول واحد "
مش هما اللى حفظونا , وانتى داخله تقابلى العريس
"صوتك يوطى "
"عينك ف الارض "
مستغربين ليه ؟ مش الحب ف بلادنا عار ؟
مش الحب ف بلادنا "سر "
مش الحب ف بلادنا "عيب "
مش وهما بيعلمونا ويحفظونا اللى فات ده كله كانوا لازم كمان يقولونا ان الرسول صلى الله عليه وسلم قال فيما معناه "احسن حاجه للمتحابين انهم يتجوزوا "
صدقت يا حبيبى يا رسول الله
الحب لا هو عيب ولا هو حرام ولا رجس من عمل الشيطان
الحب مشاعر راقيه ,
الحب احساس بيتولد ف القلوب
الحب هدية ربنا لعبيده
مفييش حاجه اسمها حب حلال وحب حرام
احنا اللى بنشوه الحب
واحنا اللى بنزينه
احنا اللى بإيدينا نخليه شغل "ملايكه"
واحنا كمان اللى بإيدينا نخليه الاعيب "شياطين "
الحب مظلوم معانا
الحب برىء ومش متهم
ولا عمره هيكون متهم
الحب عفه - الحب حياه

ابنى حبيبى :)

ابنى حبيبى اللى جه بعد شوقه
بص يا ضنايا
انا امك اه
بحبك ماشى
اشيلك على راسى ما يضرش
لكن تعمل شغل العيال السيس بتوع اليومين دول هأأأأأأأأو كان غيرك اشطر
امك ياض كانت بتشتغل مع الموساد
فمش هييجى عيل فسل زيك ويحور عليها
مفييش حاجه اسمها لعب ف الشارع
معنديش سهر ونت للفجر
ما ياكلش مصروفى مش مكفى هاتى فلوس الدرس وتشئطهم , تهرب م المدرسه , تشرب سوجاير لا سمح الله
هتلاقينى طالعالك من بطلونك
وبالنسبه للبت اللى هتصاحبها ف المدرسه انا معنديش مانع انك تديلها ساندوتشاتك بس تاكل انت كمان يا حيلتها
حب مش همنعك ولا اخنقك ولا اضيق عليك
عشان انا هربيك انك تطلع راجل بحق وحقيق زى المزغود ابوك
اللى لما حبنى دخل بيتنا واتجوزنى لا لف ولا دار ولا حور
سامعنى ياضنايا
ربنا يكرمنى فيك وتكبر وتبئا اجدع راجل ف الكوكب , ما انت لازم تطلع اجدع راجل مش انت ابن "اسمه غزال" ؟ ولا ايه ؟
ربنا يجيبك ليا بالسلامه