يارب بدعى

يارب بدعى ,
فى كل ركعه ,
إحميها دايما ,
وأحفظها لينا ,
دى مصر غاليه ,
 وعاليه دايما ,
أنصرها دايما ,
ع اللى يعاديها.

بحلم يا مصر

نفسى أغمض ,
ف يوم عيونى ,
الأقى مصر جايه فى منامى ,
تحضن إيديا ,
تمسح دموعى ,
تقولى فوقى ما تعيطيش ,
أنا أقوى منهم ,
أنا أقوى بيكم ,
أنا مصر دايما ليكم,, وبيكم .

يارب نجيها

 

قلبى بيبكى عليكى ,
بدل الدموع دم ,
بالى مشغول عليكى ,
يا بلدى يا ست الكل ,
بدعى فى كل أدان ,
... يارب إحميها ,
مصر دى غاليه عليا ,
يارب نجيها .

القرار قرارك

الفراق :هو ذلك الزائر الثقيل الذى يدق ابواب حياتنا ليخبرنا بر...حيل احدهم عن عالمنا , هو الوحيد القادر على اقتلاع احلامنا من جذورها , انه لا يأتى بمفرده ابدا , بل يأتى و بصحبته الالام والعذاب والاحزان , إنه لا يقتحم حياتنا الا ليسلبنا أجمل أيام حياتنا ,يسحق معه اليوم والغد لكنه لا يقوى على الأمس , إنها الذكرى التى تهرب من ذلك الوحش البرى الذى يدعى الفراق لتختبىء فى خزانتها السرىة الأمينة, تحمل حالها وترحل الى اطهر وانقى مكان , بقلوبنا , تمر الايام وتمر السنين ولكن تبقى الذكرى , نعيش حياتنا , قد نبدأ من جديد , ولكن دائما ما نحمل معنا خزانتنا السرية , نسترجع حياتنا معهم , نسترجع مواقف بعينها , نظرة , همسه , نبرة صوت , ملامح شخص , رائحة عطر , تأتى الذكرى لتسافر بنا الى عالم اخر , فهى الوحيدة القادرة على حملنا من مكان لمكان, لكل منا خزانته السحرىة , المختبىة فى اعماق قلبه , نحن فقط من نستطيع فتح تللك الخزانة والتجول بها وقتما نشاء , او غلقها للابد , ودفنها فى مقابر النسيان , انه نحن فقط من نملك ذلك القرار .
إنه قرارك ؟ فهل تفضل الاحتفاظ بخزانتك ؟ ام دفنها فى مقابر النسيان ؟

أرفع راسك فوق

متشعلئين مستنين
 ياخدوا اللى باقى من السنين ,
مستنين ياخدوا البواقى
مش طمعانين
ياخدوا الكتير
حتى البواقى
طب هى فين ؟
دول صبرانين 
والصبر عمره ما يبقى عيبه
العيبه فعلا
هى الرضا
 انك تكون فى يوم ذليل 
مستنى باقى من البواقى
مستنى فضله من السنين
راضى وعاجبك
غيرك يذلك
قوم وأخلع التوب اللى لابسه
توب الخنوع
اوعاك تسيب نفسك ذليل  
قوم واصحى فوق
وخلى دايما
راسك لفوق
فوق اى ظالم
فوق اى خاين
فوق اى حد تجيبه نفسه
يلبسك توب الخضوع

 

المرايه

ببص فى مرايتى التقيت ,
وش تانى
وش ما فيهوش اى طعم للحياه
وش بارد ,
وش وخداه الجراح ,
وش دبحاه الامانى بسكينتها ,
وش مش لاقى لرجوعه أى سكه ,
دققت أكتر ,
قربت تانى ,
يمكن العيب فى المرايه ,
ولما قربت التقيت ,
بركان جراح
جاى يبكى على اللى راح
غمضت عينى ادارى صورة شوفتها ,
وجريت ,
 وروحت فى الركنايه وحدى هناك بعيد
 اسأل سؤال ,
العيب فى مين ؟
العيب دة عيبى ؟
ولا دة عيب الزمن ؟
ولا دة عيب السنين ؟

ع الهوامش

ع الهوامش ناس  كتير  مستنين ,

يخطفوا بس إبتسامه,

تفرح القلب الحزين ,

حلمهم واحد  ,

بيتمنوه على مر السنين ,

إن يتعاملوا بجد ,

ك...........

بنى أدميين

الحلقة الثالثة عشر

( يوميات سهتانة فى الارياف )

ابو سهتانة : اتفضل يا حاج إسماعيل , إتفضل يا اسماعيل يا بنى

إتفضلوا دة احنا زارنا النبى النهاردة

( إستقبل ابو سهتانة ضيوفة ووصلهم لغاية اوضة الضيوف وراح للست ام سهتانة )

ابو سهتانة : يا ام سهتانة , حضرى للضيوف حاجة بقا يشربوها)

ام سهتانة : من عنيا حاضر , بس هما مين الضيوف اللى معاك دول ؟ وعاوزينك فى ايه يا ترى ؟

ابو سهتانة : الضيوف دول الحاج ابو اسماعيل العلاف ومعاه ابنة الباشمهندس اسماعيل , لكن عاوزينى فى ايه ؟ اهو دة سؤال ما اعرفش اجابته يا وليه ,الحاج ابو اسماعيل جالى المحل وقالى انا هعدى عليك انا وابنى نشرب معاك الشاى عا العصارى كدة , قلت له اهلا وسهلا تشرفوا وتنوروا , بس

ام سهتانة : امممممممممم , طيب انا هحضر الشاى وابقا انده عليك تاخدة وربنا يقدم اللى فيه الخير ,

ابو سهتانة : ان شاء الله ,

( راح ابو سهتانة لضيوفة ورحب بيهم على الاخر وندهت عليه الست ام سهتانة وراح اخد الصينية منها ورجع لهم تانى )

ابو سهتانة : يا اهلا يا اهلا , دة احنا زارنا النبى النهاردة

ابو إسماعيل : اهلا بيك يا ابو سهتانة , بص بقا يا حاج بقا هلا هلا على الجد , والجد هلا هلا عليه ,احنا جاينلك النهاردة انا وابنى اسم الله عليه الباشمهندس إسماعيل طالبين إيد بنتك سهتانة , هاااااااااااا ؟ قلت إيه ؟

ابو سهتانة : يا مرحب يا مرحب , والله يا حاج ابو اسماعيل انى اتشرف بيك وبابنك الباشمهندس اسماعيل , وربنا يقدم اللى فيه الخير يارب .

ابو اسماعيل : بص يا سيدى , انا ابنى لسه جاى من السعودية من اسبوع اجازة يعنى انت عارف الشغل برة احسن من هنا طبعا بكتير .

ابو سهتانة : اه طبعا

ابو اسماعيل : وبصراحة بقا وما اخبيش عليك , انا كلمتة بقا علشان يتأهل ونفرح بيه , ونشوف خلفه بقا , وانا بتكلم أنا وأمه بصراحة مالقيناش احسن من بنتكم سهتانة لابننا اسماعيل , ادب وكمال وجمال يازين ما هياخد يعنى .

هاااا احنا هنسيبك تفكر وتشور على الامورة برضة , ولو حصل نصيب ان شاء الله تعملوا حسابكم هتبقى الشيكة وكتب الكتاب اخر الشهر ان شاء الله والجواز فى اول اجازة ينزلها الباشمهندس يعنى تقريبا بعد 6 شهور اذا اذن المولى

ابو سهتانة : طيب وبعد الجواز ان شاء الله ؟ هياخد سهتانة معاه ؟ ولا هتفضل هى هنا ؟

إسماعيل : والله يا عمى انا لو عليا اخدها معايا , بس هناك الوضع مختلف عن هنا , انا هنزل اجازة طويله شوية للجواز وبعد كدة لما اسافر هرتب امورى على انى اخدها معايا ودة هياخد وقت شوية وربنا يسهل ان شاء الله ,

ابو سهتانة : ان شاء الله , ربنا يابنى يقدم اللى فيه الخير واللى ليكوا نصيب فيه هتشوفوه ,

ابو اسماعيل : ان شاء الله ,طيب هنستأذن احنا , ونسيبك تفكر وتشور على عروستنا وربنا يقدم اللى فيه الخير .وخد بالك احنا مش هنختلف على اى شىء واللى انتم عاوزينه عنينا ليك ولعروستنا الحلوة

ابو سهتانة : ربنا يديم المعروف . بس لا, والله مانتم قايمين لازم تتغدوا الاول 0

ابو اسماعيل : والله ما هينفع اعذرنا ويا سيدى الايام جايه كتير , اصل الباشمهندس هيروح علشان يسلم على عمتة الكبيرة النهاردة ومعزومين على الغدا هناك , تنو عامر يا ابو سهتانة , وناكل فى بيتك فى الافراح ان شاء الله .

ابو سهتانة : ان شاء الله , شرفتونا وانستونا .

ابو اسماعيل : يشرف مقدارك , مستنين ردك علينا بقا , يلا السلام عليكم

ابو سهتانة : وعليكم السلام ورحمة الله وبركاتة , مع الف سلامة

( وصل ابو سهتانة ضيوفة لحد الباب وسلم عليهم , ولسة بينادى على الست ام سهتانة لقاها واقفة فى ضهرة , مستنية تعرف الاخبار , وكانوا عاوزينه ليه وفى إيه ؟, حكى لها كل الموضوع من طأطأ لسلام عليكم , وعلى اد ما الست ام سهتانة فرحت بالعريس اللقطة اللى جاى من بره شايل ومحمل شىء وشويات , على اد ما زعلت على فراق بنتها , وحيدتها , اللى مالهاش غيرها , وشاركها فى احساسها دة ابو سهتانة كمان , وقالت ام سهتانة لجوزها : -    )

ام سهتانة : انت دلوقتى تتكلم مع بنتك وتاخد وتدى معاها

ابو سهتانة : طبعا يا وليه , طيب يلا روحى اندهيها ,

( راحت ام سهتانة ندهت بنتها سهتانة علشان تكلم ابوها , ودار الاتى :-

سهتانة : خير يأما ؟ مين اللى كانوا عند ابويا دول؟وعاوزينه فى ايه ؟ وابويا عاوزنى فى ايه ؟

ام سهتانة : الله ما تبلعى ريئك يا بت ؟ انتى مش صابرة لما ابوكى يقولك ؟

سهتانة : بقا كددددددددة ؟ طيب يا اما ؟ براحتك

ام سهتانة : هههههههه شوف البت ودلعها , روحى يا بتى ربنا يسعدك ويتمم لك على خير ان شاء الله

سهتانة : يتمم لى على خير ؟ اللخ هو فى ايه بالظبط ؟

ابو سهتانة : بصى يا بنتى , انتى جالك عريس ,

سهتانة : عريس ؟

( وطبعا اول حد خطر على بالها الدكتور طارق )

سهتانة : ( بكسوف شديد ) عريس مين يابه ؟

ابو سهتانة : الباشمهندس اسماعيل ابن الحاج اسماعيل العلاف ,

سهتانة : الباشمهندس مين ؟

( وقامت سهتانة من قدام ابوها تجرى على اوضتها , )

ابو سهتانة : شوفتى بنتك قامت تجرى ازاى من قدامى ؟

ام سهتانة : البت مكسوفة يا اخويا , سيبها دلوقت ونكلمها بالليل إن شاء المولى .

ابو سهتانة : طيب , ربنا يقدم اللى فيه الخير ان شاء الله

دخلت سهتانة اوضتها ,مش عارفة حاجة ومش فاهمة حاجة , مين الباشمهندس اسماعيل دة ؟ وهو الدكتور طارق راح فين ؟ ما جالهاش ليه زى ما وعدها ؟ طيب هو ممكن يكون جراله حاجة مثلا ؟ طيب هتقول ايه لامها وابوها دلوقتى ؟ مليون سؤال  فى راس سهتانة وهى ما عندهاش اجابة لاى سؤال فيهم , راحت تكلم صاحبتها مبروكة يمكن تفيدها وتقدر تساعدها فى حيرتها  )

سهتانة : الو يا مبروكة الحقينى ,,,      

مبروكة : خير يا سهتانة فى ايه يا بت ؟ مالك ؟

سهتانة : جالى عريس

مبروكة : الدكتور طارق ؟ صح ؟ مبروك يا بت , والله صبرتى ونولتى يا موكوسة

سهتانة :( مقاطعة ) مش الدكتور طارق يا مبروكة , مش هو ,

مبروكة : الله اوومال مين ؟؟؟؟؟

سهتانة : ابن الحاج ابو اسماعيل العلاف , ابنة الكبير المهندس اسماعيل ,

مبروكة : الله ........طيب وبعدين ؟

سهتانة : انتى بتسالينى انا وبعدين ؟ اومال انا بكلمك ليه ؟

مبروكة : سهتانة الا هو انا ممكن اسالك سؤال ؟

سهتانة : هو دة يعنى وقت اسئله ؟ ماشى يا مبروكة اسالينى , خير؟

مبروكة : هو انتى بتحبى الدكتور طارق دة ؟

سهتانة : بحبه ؟؟؟؟؟؟؟؟ ؟؟؟؟ تصدقى يا مبروكة انا مش عارفة ؟                                         هو يااختى يعنى ايه بحبة دى ؟ يعنى قصدى اعرف ازاى انى بحبه ؟

بصى يا مبروكة ؟ هو لو الحب ده يا اختى انى ابقى مش شايفة غيره قدامى , يبقى اه بحبه , لو الحب ده انى اول ما اشوفه وتيجى عينه فى عينى احس بجسمى كله بيتنفض , يبقى اه بحبه ,هو لو الحب دة انى ازعل لما يجيلى عريس وقلبى يتقبض علشان العريس ده مش هو يبقى اه بحبه يا مبروكة , اه بحبه ,

مبروكة : بس يا اختى انتى لحقتى ؟ دة هما كلهم دقايق معدودة يعنى ؟

سهتانة : ( مبتسمه ) عارفة يا مبروكة ,انا لما طارق كلمنى اول مرة يعنى, حسيت انى اعرفة من زمان , حسيت يا بت انه اللى كنت بحلم بيه طول عمرى , حسيت انه اللى جايلى بعد الغيبه علشان يعوض اخرة صبرى خير ,  حسيته اوى يا مبروكة ,  طيب اقولك على حاجة ؟ عارفة وهو بيسلم عليا ؟ وايدة لمست ايدى ؟ والله جسمى كله اترعش وحسيت انى انا وهو كدة ... طايرين فى السما , مش على الارض خالص

مبروكة : هااااااااا يا سلام يا سلام , ده الحب ده حاجة حلوه اوى يا ولاد , اوعدنا يارب

سهتانة : الحب يا اختى مش بمدته, ولا تعرفوا بعض من اد ايه , ولا له حسابات , حاجة كدة تيجى للواحد ولا هى عالبال ولا عالخاطر ,الحب ده احساس جميل اوى يا مبروكة يا اختى , حاجة كدة زى البرق تخطفك من نفسك , تخطفك من روحك يا بت ,

مبروكة : طيب يا ست الحبيبه , فوقى لى كدة يا اختى , علشان نفكر فى حل  لوكستك السودا دى,

سهتانة : ايوا صحيح ,,,,,,دة انا نسيت , هنعمل ايه دلوقتى يا مبروكة ؟ دلينى يا اختى ؟

مبروكة : إممممممممممم , بس وجدتها , خلاص ما تقلقيش ولا تشيلى الهم

سهتانة : بجد يا مبروكة ؟ طيب خير يا اختى ؟ هتعملى ايه ؟

مبروكة : العمل عمل ربنا , ادينى ودنك كدة , وانا اقولك انا هعمل ايه ,

يتبع ,,,   

Asmah Ghazal   

نفسى تدينى العيدية

كل عيد وانت حبيبى,
كل عيد وانت معايا,
عارفة ان ما بينا بعد ,
بس دى مش النهايه ,
             انت صورتك جوة قلبى,                 حافظه قلبى من الجمود,
انت طيفك لسه هالل,
زى شمس منورا عتمة طريقى ,
لسه صوتك جوه ودنى,
لسه سمعاك, حاسه بيك,
عارفة انك مش معايا,
بس روحك ساكنة فيا,
نفسى تلمسنى فى منامى,
نفسى تدينى العيدية,
يرحمك ربى يا بويا ,
يأغلى من نور عنيا .