السبت، 23 يوليو، 2011

رحلة ........بس مش زى اى رحلة



 
إمبارح كنت مع جماعة اصحابى فى رحله اتفسحنا وظبطنا نفسنا ع الاخر وكان يوم جميل بجد 
لحد كدة تمام وزى الفل واليوم ماشى زى الورد ومحصلش مواقف ولا طرائف ولا حاجات من الغريبة اللى لازم بتحصلى كل مرة دى ههههههه ما انا اصلى مرزقة
طيب لوز – يلا بينا نروح بقا ............هوبااااااااااااا السواق ما جاش وبمبا يا معلم
اخدت بعضى وقعدت استنى السواق لما يجى بقا على مهلة مانا ما وراييش حاجة
ولا شغل ولا صحيان بدرى بكرة ولا حاجة هههه
وانا قاعدة سرحانة ومسهمة كالعادة ف المواقف اللى بتبقى زى دى
ابص الاقى إإإإإإإإية ؟؟؟؟ قطة صغيرة واقفة بعيييييييييييد وعلى جنب ولوحدها
بسبست للقطة وتعالى وحركات من إياها دى اللى كلكم عارفينها 
الاقى القطة جرت ناحيتى ونطت نطه غريبة وطلعت على رجلى  طبطبت عليها وقمت جبتلها اكل علشان أأكلها
الغريب بقا ان المفروض القطة تاكل وتتكل على الله
لكن لا مش دة السيناريو اللى حصل  --اللى حصل أن القطة ما نزلتش من على رجلى-
لا وايه كمان دى نامت ومددت اوى يعنى واخدت راحتها ع الاخر
وهى نايمة على رجلى  سرحت اووووووووى
هى القطة دى حست بيا وانا بطبطب عليها كدة 
  اد ايه بجد اى كائن حى بيجى بالحنية
بيحس والله باللى حواليه .
الحنيه دى بتفرق اوى على فكرة
 بتبقى عاملة  كدة زى شعاع الشمس اللى يجى من بعييييييييييييد
ويأثر فيك اوى  وتدفى بحرارتة وقت البرد وتبقى مبسووووووووط
الحنيه دى مش بتتشاف  الحنيه دى بتتحس
شوية مشاعر متلخبطة كدة على بعضها بتاثر فيك وتأثر كمان ف اللى حواليك .
ياااااااااااااه الحنيه دى حاجة جميله اوى بجد واحساس حلو اوى
على فكرة الحنيه دى مش بتبسط اللى حواليك وبس
 لا خالص دى بتبسطك انت كمان شخصيا
بتحسسك انك انسان – انك موجود – بتحس وبتتأثر باللى حواليك
بتفرق معاهم ويفرقوا معاك
بترجع لك الثقة ف نفسك  وتأكد لك انك لسة عايش -------- انك لسه بتحس
 يااااااااااااه دة الاحساس دة نعمة بجد .
ااااااااااااااه القطة صحيح دة انا نسيت ههههههه –
عدت عربية  بسرعة جنبى وانا قاعدة وراحت ضاربة واحد كلكس ف العالى 
القطة اتخضت ونزلت تجرى من على رجلى وما شوفتهاش تانى
وعم السواق جه وروحت بيتى وانا مبسوطة 24 قيراط 
بس مكنتش مبسوطة  علشان الخروجة الجامدة اللى خرجتها مع اصحابى وبس
 لا كنت كمان مبسوطة انى اتأكدت انى لسه موجودة
أنى  ف وسط طريقى الطويل وف رحلة حياتى
اللى للاسف وغصبن عنى خسرت فيها  شوية مشاعر على شوية احاسيس 
 اكتشفت إمبارح
إنى ما خسرتش اهم احساس ف الدنيا احساس الأحساس نفسه احساس العطاء
ماخسرتش احساس انى اقدر اسعد اللى قدامى
 بكلمة, بحركة, ببصة, بأى حاجة والسلام
يارب دايما اجعلنى مصدر سعادة لاى حد ولأى حاجة حواليا .
وقدرنى دايما انى أكون مصدر للعطاء ياااااااااااارب.

الأحد، 10 يوليو، 2011

ماتيجوا........ نتفائل



هو أينعم مافيش اى حاجة جديدة فى حياتى. لا تفرح ولا تزعل
يعنى سلم لى على الثبات الأنفعالى
بس مش عارفة ليه حاسة كدة انى فراشة.عصفورة. عيلة صغيرة بتطير طيارة ورق
حاسة انى ماشية بشع امل وتفاؤل من حواليا .
حاسة ان حواليا هاله من نور .
بجدحاسة اوى انى ريشة الهوا بيطيرها لفوق لفوووووووووووووووق اوى
حلو اوى احساس التفاؤل دة بجد
والاحسن انه يبقى موجود عندك من غير سبب
اه وايه المشكلة بجد ان الواحد يتفائل من غير سبب ؟
 هو مش فى اوقات بنزهق من غير سبب ؟ ونكتئب من غير سبب ؟
 طيب ما تيجوا نجرب احساس اننا نتفائل من غير سبب ؟؟؟؟؟؟؟؟؟؟
نقوم من نومنا الصبح واحنا مقررين اننا هنتفائل يعنى هنتفائل .
ونقول للدنيا يا احنا يا انتى يا بت الهرما .
اه والله ما تيجوا نجرب نسيب الملك للمالك ونسيب بكرة لصاحب بكرة .
ونعيش ونتفائل ونفرح هنخسر ايه يعنى؟؟؟
مين ف الدنيا معندوش هموم ولا مشاكل فى حياتة ؟؟؟؟؟؟؟؟؟ اكيد طبعا مفيش
طيب ياترى لو زعلنا ولا اكتئبنا مشاكلنا هتتحل ؟؟؟؟؟؟ لا والله بالعكس
مش هناخد غير وجع الراس ووجع القلب وحرقة الدم
طيب ما تيجوا نجرب نتفائل والله هنلاقى مشاكلنا بتتحل ان شاء الله لوحدها
انا اول واحدة عن نفسى هتفائل وهجرب هخسر ايه يعنى ؟؟؟؟ 
تفااااااااااااااااااااااائلوا وسيبوا بكرة لصاحب بكرة
وكل مشكله وليها عند الكريم حلااااااااااال .....
خلاص اتفقنا ؟؟؟؟؟؟ ما تيجوا نتفائل 0....

يوم.......... بس مش عادى



النهاردة كالعادة وزى كل يوم فى حياتى عادى .بيبدأ عادى وبيخلص عادى 
خصلت شغلى وروحت لمحطة الاتوبيس علشان اركب واتكل على الله اروح بيتى .
تعبانة وهلكانة وحاسة ان اليوم خلص كدة ومش مستحمل اى حاجة جديدة تحصل فيه .
سميت بالله وركبت        
   وبدأ الاتوبيس يتحرك وانا قاعدة سرحانة سمعت صوت بنت صغيرة بتتكلم مع باباها وبيلعب معاها 
صوت ضحكتها كان عالى ورن فى ودنى اوى .
محستش بنفسى غير وشريط حياتى كله عدى ادام عيونى
افتكرته . وافتكرت احلى ايام حياتى معاه
بابا حبيبى انت صحيح سيبتنى وروحت لمكان احسن مليون  مرة من المكان اللى احنا عايشين فيه
بس انت ما سبتنيش لوحدى روحك معايا وحواليا فى كل وقت وفى كل مكان
افتكرت وانا صغيرة اوى لما كنت ابقا مش فاهمة كلمه سمعتها او حاجة شوفتها وتقعد معايا وتكلمنى وتشرح لى
افتكرت ايام مذاكرتى ايام امتحاناتى ايام لما كنت بتعب وتتعب علشانى
افتكرتك فرحتك لفرحى وزعلك لزعلى
افتكرت اول مرة اخرج معاك ف الشارع واحط ايدى ف ايدك وانا عاوزة اقول للناس كلها انا كبرت وماشية وايدى ف ايد بابا
افتكرتك لما كانت الدنيا تضيق فى وشى واجرى عليك واترمى ف حضنك واقعد اعيط وتطبطب عليا
افتكرت لما كنت بتفهمنى من عنيا – من غير كلام
افتكرت لمتنا ف ايام رمضان افتكرت عدية اول يوم العيد
افتكرت بوستك على خدى اللى حاسة انها مطبوعة عليه لحد دلوقت
افتكرت ايام جميله اوى ايام بجد مش هتتعوض فى حياتى تانى
اففتكرتك  يوم وفاتك لما مت بين اديا وروحك فارقت حياتى وما عرفتش اعمل حاجة
اد ايه اتكسرت من جوايا – اد ايه حاسة انى غصن مكسور وسط ريح مش بترحم
افتكرتك دى كلمه صغيرة اوى عليك لانى بجد مش ناسياك
كلامك فى ودنى ونصايحك فى قلبى  .
ماقدرتش امسك نفسى من العياط 
قريت له الفاتحه ونزلت من الاتوبيس وروحت بيتى زى كل يوم
لكن النهاردة كان مش زى كل يوم  بجد كان يوم مختلف
بجد وش البنت مش قادرة انساة . وملامحها محفورة فى قلبى وصوت ضحكتها بيرن فى ودانى ومش عاوز يفارقها .
اد ايه ممكن نقابل ناس ف حياتنا ف يومنا العادى يأثروا فينا ويفكرونا بحاجات حلوة كتير مرت علينا
بابا حبيبى ربنا يرحمك –  بحبك ووحشتنى  اووووووووووووووووووووووى.


الخميس، 7 يوليو، 2011

كرامتى والخطوط الحمراء........




كرامتى ..والخطوط الحمراء

كثيرا ما نستمع الى بعض الاراء حول موضوع الكرامه فى الحب ..
 فهل فعلا يوجد ما يسمى الكرامه فى الحب ؟
مع افتراض وجودها بالفعل لانها جزء لا يتجزأ من شخصية الفرد .فما هى الحدود الطبيعية لها ؟
تسألت كثيرا مع نفسى  ومع أشخاص مقربين ف حياتى عن اجابة واضحة وصريحة فى هذا الموضوع
لكنى فوجئت بتعدد الاجابات المطروحة . فمنهم من قال لا يوجد بين المتحابين كرامه ومنهم من قال كرامتى تاج على رأسى يزين شخصيتى وكيانى وفى حال هدر الحبيب لكرامتى فأنا افضل الانسحاب
تائهة انا ف بحثى عن اجابه وسطيه فهل استطيع الحفاظ على الحبيب فى حال جرحه لمشاعرى وإهانة كرامتى
فوجدت اجابتى الشخصية بلا . نعم لا استطيع وضع حبى فوق كرامتى .
عذرا سيدى الرجل انا لا اجرحك ولا اقلل منك فى حال وضعك فى مقارنة مع كرامتى فى كفتى الميزان .
فأنا بدون كرامة أشلاء, بقايا ما يسمى بأنسان. كرامتى جزء لا يتجزأ من حريتى . .
ولكن بالتأكيد فى بعض الحالات الأستثنائية نضطر لأنقاذ حاله الحب من الفشل وقتها نستيطع تقديم  ما يطلق عليه التنازل .   
           ولكن هل التنازل جزء من الكرامة ؟ بالطبع التنازل يمثل الجزء الأكبر من الكرامه .
اذن لماذا نتنازل ؟
استطيع ان اتنازل  عن حق من حقوقى  عن كلمه وجهت الى فى وقت ضيق عن موقف معين يصيبنى بالالم
إذن انا استطيع التنازل .ولكن بحدود . 
فتعالى عزيزى الرجل لتتعرف سويا على بعض الخطوط الحمراء فى حياة اى امرأة 
وهى بمثابة   لافتة مكتوب عليها ممنوع الاقتراب
-- اياك ان تقترب من المساس واللعب بمشاعر المرأة.
--اياك ان تشعرها فى لحظة من اللحظات بأن وجودها فى حياتك مثل عدمه.
-- إياك ان تشعرها بعدم الأمان ووجودها فى حياتك بصورة مؤقتة وتوقعها تخليك عنها فى اى لحظة من اللحظات
--إياك ان تستفز غيرتها كأنثى بدخولك عالم الحسناوات  وسرد قصصك اليوميه مع هذه وتلك ونظراتك لهذة ولتلك .
--إياك ومعاملتها على انها كائن غير مفكر ومبدع ومبتكر ولا يتسم بالذكاء .
--إياك ان تسقط من نظرها لتبعيتك  الدائمة لوالديك او لعدم تحملك المسئوليه .
--هناك الكثير والكثير من الخطوط الحمراء فى حياة كل أمرأة منا برجاء عزيزى الرجل مرعاة تعليمات لافتة ممنوع الاقتراب او التصوير فهذة منطقة خطرة .
ولنعود سويا لنربط بين الكرامه والخطوط الحمراء فأنا اجد ان  لكل شى ف الحياة حدود . حتى الحب له حدود
فأذا تعارض حبى مع كرامتى ففى هذة الحالة استيطيع ان اودعك يا من تسمى الحب .فأنا انثى امتلك اولويات فى حياتى 
ولست انت من اولوياتى بل كرامتى -حبى لنفسى -واحترامى لذاتى
فمن يهبنى مشاعر الحب النبيلة استطيع ان اتوقع انه لا يستطيع المساس بكرامتى ولا جرح مشاعرى لانها فى ذلك الوقت ستكون كرامته هو ومشاعرة هو . 
ومن يستطع فعل ذلك فرد فعلى الوحيد له
إذا كان الحب سيسلب كرامتى فوداعا للحب ولتحيا كرامتى ,,,

الأربعاء، 6 يوليو، 2011

واحد صالون وصلحه .........



نبتدى الحكاية بتليفون لطيف  ظريف من قريبتك ولا جارتك ولا صاحبة مامتك ولا اى حد والسلام .
ريحةالتليفون ده بقى بتتحس وتتشاف مع بعض يعنى 2 فى 1
ليه بقى ريحة التليفون بتبان لانك بتشوفى تعبيرات وش مامتك وبقها اللى مفتوح ع البحرى من الودن للودن
هوبااااااا المكالمة تخلص وتلاقى مامتك فرحاااااااانة وبتقولك ( مبروك جاللك عريس .)
وتبتدى مامتك بقا تحكيلك اللى اتقالها طبعا وتبتدى تسرد مواصفاتة الشخصية والشكلية وبيشتغل ايه وعندة ايه وكل التفاصيل طبعا  بتاعة فارس الفرسان وشجيع السيما ابو شنب بريما .
اللىاكيد كلنا عارفنها ومرينا بيها ;)
ووالله ممكن تحسى من كتر ما هى بتشكر فيه انها تعرفه معرفه شخصية ههههههه
ومامتك طبعا مشرئبة اوى وملامح وشها باين عليها الفرحه وتسألك ف الاخر
ها يا حبيبتى رأيك ايه ؟ رأى ايه بقا وكلام فارغ ايه انتم خليتوا فيها رأى ..
وهتلاحظى كمان حاجة مهمه اوووووى معظم الامهات مش كلهم يعنى علشان برضه ما نظلمهومش معانا هى مش بتحكيلك علشان تاخد رأيك اصلا ........ لا خالص هى اصلا اتفقت مع قريبتها على كل حاجة وانتى بقا واجب عليكى التنفيذ ........ وبتسألك على رأيك قااااااااااال.
وييجى اليوم الموعود اللى سبع البرومبا هينور فيه منطقتك ويرفع راسك ف العلالى .
 اه اومال ايه انتى مستهزية لما مامتك تقف وتقول بنتى جالها عريس .
 عررررررررررريس . كلمه بصراحة ليها تاثير السحر على الودان..
طيب نقف لحد كدة شوية ونفكر مع بعض انتى فين من دة كله ؟ مين دة اصلا ؟ انتى تعرفية منين دة ؟
واسئلة كتير اوووووووى فجأة تلاقيها نطت ف دماغك . فى منها ليه اجابه طبعا
 وفيه مالهوش اجابة غير بعد اختبار كشف الهيئة .
انا مش موضوعى العريس اللى جاى ده كويس ولا مش كويس ؟ مناسب ولا مش مناسب ؟
ولا موضوعى اقلل من فكرة جواز الصالونات ولا احقر منها .
انا بس الفكرة المرتبطة ف ذهنى ان ليه البنت تحس انها سلعه وانها لازم تتجهز وتتوضب اوووووى علشان تعجب . ليه تبقى تذكرة مرورها  للعريس واهله انا طولى ايه ووزنى كام ولابسة ايه ؟
حلوة ولا بضب ؟  حوله ولا عنيها دوبلى ؟
مش عارفة . بصراحة انا شخصيا مش حاسة بموضوع جواز الصالونات ولا الانتريهات ده خالص .
طبعا فى حالات جواز صالونات ناجحة كتير وربنا بيوفق .
وما نقدرش ننكر طبعا ان جواز الصالونات ف بلدنا عادة ربنا كدة يديمها علينا نعمة ويحفظها من الزوال نقدر نقول متوارثة عبر الاجيال .
طيب هسألكم سؤال ؟حد فكر البنت اللى جاى لها عريس صالونات
اد ايه بتتجرح لما يروح العريس واهله وما يردوش عليهم
ولا لما العريس دة يرد حتى ويطلع عنده دم ويقول لا معلش اعفونى اصل ما فيش قبول.
 ولا يطلع ذوق ع الاخر ويقول مافيش نصيب
هى مش توتة توتة وخلصت الحدوتة ولا علقة تفوت ولا حد يموت .
عيلة العروسة وحبايبها هيزعلولهم شويتين وكله هيكمل حياتة عادى جدا فى انتظار ما هو قادم.
لكن حد فكر البنت دى بقا بتتعذب وتتألم اد ايه ؟ وتقول طيب هو رفضنى ليه ؟
طبعا هتكلم برضة لو هى اللى رفضت العريس علشان محدش يقول تفرقة وعنصرية والكلام الكبير دة
هو كمان على فكرة هيضايق ويحس انه عندة نقص   وهيسأل نفسة كل الاسئله اللى البنت بتسألها لنفسها.
لكن مع الفارق طبعا .  للاسف الراجل ف بلدنا يقدر يدخل بيوت بنات كتير
 ويترفض ف بيت
 ويتفتح له الف بيت تانى. لكن البنت ؟ بيتهيألى الموضوع مختلف شوية
للاسف احنا مسجونين ف قفص العادات والتقاليد المتخلفة اللى بقت شبه السكينة التلمه
 اللى بتدبح من غير رحمة ولا رأفة .
والكلام الكتير ف المواضيع دى مش هيجيب همه انا عارفة لكن من الاخر كدة
والله لو وصلتى لمرحلة فى حياتك ما فيش طريقة قدامك غير جواز الصالونات
 يبقى انتى تخليكى زى ما انتى
 ولا تمثلى ولا ترسمى – خليكى على طبيعتك – وما تعمليش غير اللى مقتنعة بيه
مش معنى انك جيلك عريس صالونات انك لازم تتجوزية وتوقعية  وتمثلى قدامة دور العروسة اللقطة
اللى مالهاش زى -  ألا ساعتها العريس يطير ويروح لغيرك .وساعتها يا حلوة بقا قابلى
شماتة ام فلانة ومعايرة ام علانة 
لا دة اسلوب مرفوض تماما .
هو انتى كدة اللى عاجبه اهلا وسهلا واللى ما يعجبوش اكيد طبعا
 ما يلزمووووووووووووووووووووووووش .
لاخر وقت ف حياتك انتى صاحبة قرارك
قراراتك يعنى حياتك
احسبى قراراتك صح
علشان تعيشى حياتك صح .

الثلاثاء، 5 يوليو، 2011

لون الحب ........







بعد بحث وفحص وتمحيص فى مكنونات نفسى ومشاعيرى الداخليه وبعد ما قعدت مع نفسى شويه افكر بعمق وتحليل .كان نفسى اعرف يعنى ايه كلمة حب ؟ وامتى احب ؟ وامتى احس ؟
كل خلفيتى عن سؤالى شوية تجارب حصلوا قدامى لناس انا اعرفهم على تجاربى الخاصة على شوية افلام اشى عربى على هندى على ما اعرفش ايه .
بس بجد من جوايا اووووووى كان نفسى اعرف ايه هو الحب ؟
ياترى هو الحب دة نعمة ؟ ولا نقمة ؟
هو السكر اللى بيحلى مرارة حياتنا ولا المر اللى بيصعب علينا حياتنا .
كتير وكتير وصفولنا الحب وحكولنا عليه .
بس فجأة سألت نفسى سؤال مهم اوى ألا وهو : يا ترى انا اللى بختار انى احب .يعنى انا الشخص المتحكم ف المشاعر دى ؟؟؟
يعنى ممكن نقول ان مشاعر الحب دى موسمية زى القطط كدة ما ليها موسم للجواز؟
طيب سؤال كمان هل انا اللى بختار حد معين من دون الناس دى كللللللللها ؟ ولا هى التقسيمة ماشية ازاى اصلا ؟
فلقيت شوية احتمالات .......
 1- أحنا فى وقت معين بنكون محتاجين نحس بمشاعر معينة ودة بيكون ( الوقت المناسب )         فبندور على حد مناسب من كل الناس اللى بيكونوا حوالينا ف الوقت دة مع انى ممكن اوى ووارد جدا انه كان قدامى من زمان ومفكرتش فيه اصلا .لانى اصلا مش حاساه طيب اشمعنى دلوقت ؟ ودى بقه الحاله اللى بيكون اسمها الشخص الغير مناسب فى الوقت المناسب
2- ساعات كتير اووووووووى بقه بيكون ( الوقت مش مناسب)  ومش حاسة ومش عاوزة اصلا ويظهر فارس الاحلام ابو الحصان الابيض اياه دة اللى تعبناة معانا فى كلامنا وحكاوينا . بس انا مش حااااااااااااساة . والحاله دى بقا بيكون اسمها
( الشخص المناسب فى الوقت الغير مناسب )
3- وكمان فى حالة  (الشخص الغير مناسب فى الوقت الغير مناسب )
يعنى بتكون بايظة بايظة اصلا لا الشخص ولا الوقت .
4- واخر حاله بقا ف التقسيمة العجيبة اللولبية دى ( الشخص المناسب ف الوقت المناسب ) بس للاسف ف الغالب بتكون الظروف مش مناسبة . يعنى متقفلة رسمى يا ساتر يارب
وطبعا مش هنقدر ننكر ابدا ان فى حالات ناجحة كتيييييييييير وفلتوا طبعا من تقسيمى الشر اللى قلناها ف الاول دى .هههههه
من الاخر بقا ومن غير شرح كتير سواء كان للحب مواسم او مكنش له - اكيد هنوصل للخلاصة
اللى بيحب يحب اوووووى ويحب من جواه .يحس بكل معنى من معانى الحب سواء كان حلو ولا كان مر .
ما تفوتش احساس ف الحب الا لما تعيشة وتعيشة كله وللاخر . استمتع بكل لحظة ف حبك كأنها مش هتتكرر تانى .
استطعم الحب زى ما بتستطعم اى حاجة بتاكلها
عيش جنون الحب وعقلة
عيش قوة الحب وضعفة
عيش رزانة الحب وطيشة واملة ويأسة . عيش كل تفاصيلة ومعانيه .
هتقلق شوية ؟ تقلق ليه ؟ سيب بكرة لصاحب بكرة
هتعمل اية ؟ لا هو بأيدك ولا بأيدى ولا بأيد اى حد اصلا .
عمرك ما هتحس حلاوة حاجة غير لما تدوق مرها

 .سيب الحب ينور حياتك سيبة يطير بيك فى الفضا ويعلى بيك لفوووووووووووووووق لفوق اوى
يمرجح فيك وتفرح بيه . وساعتها هتضحك من قلبك من جوة قلبك اوى .
حس الحب واتنفسة . زى ما بتتنفس ريحة البحر
خليه يتغلغل فى عروقك مكان الدم
سيبة يلون حياتك بلون السما .بلون الفرح .بلون بكرة
سيبة يلون حياتك كلها بلونة هو بلوووووووووون الحب

إبرة فى كوم قش



مبدئيا كدة ومن غير مقدمات ولا لف ولا دوران ولا كلام كتير,
اللى بيدور على الحب فى زماننا دة يبقى زى اللى بيدور على إبرة فى كوم قش,
..أه والله بجد مستغربين ليه ؟؟؟ وأنا شخصيا مش عارفة احدد سبب دة لأية؟؟
يمكن مشاغل الحياة ومسئولياتها. وبالتالى مابقاش فى وقت علشان الناس تحب والله جايز,؟
يمكن كمان علشان الحال اللى مش ولابد اللى كلنا بقينا فيه فمعندناش نفس اصلا اننا نحب,؟
وممكن بردة علشان الصحوبيات اللى بقت فى زمنا دة عمال على بطال ونسمع أن بيبو بيحب جى جى وبعد كام يوم نسمع أن بيبو فرقع جى جى وراح صاحب صاحبتها توتو بردة ممكن دة كمان,
 وف حالتى انا شخصيا واكيد حاله ناس كتيييييييير بيكون السبب قله الحظ  أه والنبى قله الحظ,
 يعنى فى ناس ربنا بيكرمهم ويلاقوا الفارس اللى كلنا بنسمع عنه ومعاة طبعا حصانة الأبيض أكيد.  وناس تانية بختهم قليل زى حلاتى مش بيلاقوا الحب الحقيقى,  وناس ياعينى تقعد تدور وتدورررررر وتعيش وتموت وهى بردة لسه  بتدور ومبتلاقيهوش,
بصراحة أنا مش عارفة العيب فى مين ولا فى ايه بالضبط ؟
هو العيب فينا ؟ ولا ف الزمن ؟ ولا ف ايه بالظبط ؟؟
على العموم أنا مؤمنة بشىْ مهم جدا وهو أنى ماينفعش أدور على الحب دة  لأنه بييجى على غفلة وعلى أهون سبب,                                              أيوة والله  فاكرين الفيلم إياة اللى الواد البطل كان ماشى سرحان قوم إية خبط فى كتف البنت البطلة اللى هى كمان كانت ماشية بردة سرحانة ومدهولة على عينها وبص لها فى عينها أوى وهما الاتنين حبوا بعض أووى وعاشوا فى تبات ونبات وخلفوا صبيان وبنات ,
أهوه أنا كمان برضوه مستنية الفارس بتاعى ,   أخبط بقى فية؟ يدوس على رجلى فى الشارع؟
وراك وراك أنا يا واد يا فارس أحلامى والزمن طويل ...
ومسيرها تروق وتحلا والسلام ختاااااااااااااام