السبت، 29 أكتوبر، 2011

إنوى


الحكايه مش حكايه قلب هربان منه ضحكه ,
الحكاية مش حكاية حلم خايف  مش لاقي لرجوعه سكه,
الحكايه مش حكاية بكرة اللى تايه فى البيوت,
اللى غصب عنه ساكت مش طالع له اى صوت
الحكاية فينا احنا ,
الحكايه فى العزيمة , لما نخلطها بإرادة
نبنى بيها بكرة أحلى ,
والحياة هتبقى أحلى بس إنت إنوى

الخميس، 27 أكتوبر، 2011

هبتسم


هبتسم بالعند فيكى ,
هبتسم وأنسى اللى فات ,
هنسى جرحك , هنسى مرك ,
وأنسى حزنى والأهات,

أيوا ممكن تبقى صعبة
إنى انسى الذكريات ,
بس جايز حلم بكرة ,
يجى يمحى حزن فات ,

حلمى موجود جوه صدرى ,
طفل لسه ما اتولدش ,
بكرة يوصل بالسلامه ,
يملا كونى بالإبتسامه .

الأربعاء، 26 أكتوبر، 2011

الحلقة الثانية عشر



(يوميات سهتانة فى الأرياف )
سهتانة : الله بقى ؟ ودة ايه دة ان شاء الله ؟ ومين اللى ماشى ورايا دة من ساعة ما نزلت من بيتنا ؟ هاااااا وانا مالى ؟ بس لو جه ناحيتى؟؟؟؟ يبقى هو اللى جنى على نفسة , هااااااااا بس كدة ,
لو سمحت العربية اللى طالعة فين ؟
المنادى : العربية البيضا اللى هناك دى يا ابله
سهتانة : متشكرة اوى ,
يىىىىىىىىىى هى العربية فاضية وانا اول واحدة اركب , ايه ياربى دة بس هى المسألة ناقصة عطله, هااااااااا أمرى لله , الله ايه دة ؟ دة اللى كان ماشى ورايا جاى ناحية العربية , الله الله ؟ انا خايفة اووووى ؟ طيب اعمل ايه يارب بس ؟ اكلم ابويا ولا الواد هدهد الكلب ؟
الشاب : السلام عليكم
سهتانة : ( فى خوف شديد ) : ولا سلام ولا كلام هى حصلت يا جدع انت كمان ولا ايه ؟ والله لو ما ارتجعت عنى لا انا راقعة بالصوت الحيانى ولامه عليك امة لا اله الا الله , الله الله ؟ انت بتعمل ايه ؟ هتركب كمان ؟
الشاب : على فكرة انا قلت لك السلام عليكم وحضرتك ما ردتيش ؟
سهتانة : ( مقاطعة ) : وارد عليك ليه؟ وبمناسبة ايه ؟ ايه تلاقيح الجتت دى يارب اللى على الصبح
الشاب : لا حول ولا قوة الا بالله , طيب ممكن تسمعينى يا سهتانة ؟
سهتانة : الله الله الله ؟ وعارف اسمى كمان ؟ انطق رد انت تعرف اسمى منين ؟
الشاب : ما هو انتى لو تسكتى شوية وتهدى كدة وتسمعينى هتعرفى كل حاجة لكن انتى للاسف لوكلوك لوكلوك , يا سااااااااااتر ايه دة؟
سهتانة : اتفضل ادينى سكت اهو
الشاب : بصى يا ستى , انا الدكتور طارق , انا لسة جاى عندكم البلد من شهر متعين جديد فى المستشفى العام اللى فى بلدكم ,
سهتانة : المستشفى العام ؟؟؟؟؟ اااااااااااة المستشفى اللى كانت محجوزة فيها خالتى ام مبروكة , ايوا ايوا
طارق: مظبووووووووط عليكى نور
سهتانة : وعاوز ايه بقى حضرتك يا دكتور طارق؟ وياريت بسرعة لانة ما ينفعش اقعد اتكلم معاك كدة وش فى الميكروباص
طارق : وش؟ وفى الميكروباص ؟ ههههههههه ماشى يا ستى , بصى بقا انا من اول ما عينى وقعت عليكى وانا مش عارف ايه اللى جرالى ؟ بجد انا مش عارف مالى وايه اللى بيحصلى دة ؟
سهتانة : مش عارف؟ مش عارف ايه يا جدع انت ؟ ما تتكلم دوغرى وتفهمنى انت عاوز منى ايه ؟
طارق: يا سااااااااتر انتى علطول حمئية كدة ؟
سهتانة : اة علطول حمئية كدة , وبقولك ايه الركاب بدأت تيجى وانا مش عاوزة مشاكل , اسكت بقا الله لا يسيئك,
طارق: طيب انا عاوز اتكلم معاكى ,
سهتانة : تتكلم معايا ؟ لا معلش يا خفيف , ماليش مزاج
طارق : لا انا هتكلم وانتى هتسمعينى
سهتانة : هو بالعافية ولا ايه , اسكت اسكت الا البنت اللى جاية دى جارتى اسكت بقا ,
اهلا اهلا يا ابتسام تعالى جنبى يا حبيبتى , عن اذنك والنبى يا اخويا اتاخر كدة فى اخر الكرسى , تعالى يا حبيبتى عاملة ايه وواحشانى والله وامك عاملة اية ؟
طارق ؟ اتكبس طبعا , ومش عارف هى بتعمل معاه كدة ليه , هو من جواة فرحان ان سهتانة صدته وملكتش معاة
سهتانة ؟ هتفرقع من جنابها كان نفسها العربية تفضل فاضية شوية لحد ما طارق يقولها هو عاوز منها ايه ,
جه المكان اللى بتنزل فيه سهتانة , وللاسف ما نزلش طارق وراها زى ما هى اتوقعت , راحت شغلها وكانت مشغوووووولة اوى , طارق على بالها طول اليوم , بتفتكر طريقته وتضحك , جرأتة عجباها اوى ,
خلصت سهتانة الشغل وطلعت على المستشفى علشان تطل على خالتها ام مبروكة
وهناك بقا ,,,,,,,,,,
سهتانة : مساء الخير ازيك يا خالتى ؟ عاملة ايه النهاردة
ام مبروكة : انا بخير يا حبيبتى , تعبتك يا بنتى معايا والله ,
سهتانة : عيب يا خالتى ما تقوليش كدة احنا اهل , الا هى مبروكة فين ؟
ام مبروكة : راحت الحمام يا اختى وجاية
سهتانة : طيب , يلا بقا قومى لنا بالسلامة
ام مبروكة : ربنا يسهل يا حبيبتى
سهتانة: ان شاء الله ,
وفجأأأأأأأأأأأأأأأة
دخل الدكتور طارق اوضة الست ام مبروكة ,
طارق: ها ازيك يا ست الكل النهاردة؟
ام مبروكة : الحمد لله يا حبيبى , ربنا يباركلك يا دكتور ,
طارق: ربنا يخليكى , دعواتك بقا يا حاجة
ام مبروكة : دعيالك يا حبيبى انت وعيالى وكل الناس , ربنا ينولكم اللى فى بالكم
طارق: الله ايوه دى احسن دعوة والله يا حاجة
ام مبروكة : ربنا يباركلك ,
سهتانة : طيب يا خالتى انا هروح ابص على مبروكة واجى
ام مبروكة : طيب يا حبيبتى روحى
طارق : يا سهتانة يا سهتانة ؟
سهتانة : (بكسوف) نعم ؟
طارق: هو انا مش هكمل كلامى ولا ايه ؟
سهتانة : كلام ايه ان شاء الله ؟
طارق: باقى كلامى
سهتانة : طيب اتفضل بس بسرعة لو سمحت
طارق : بصى يا ستى من غير رغى وكلام كبير انا معجب بيكى وعاوز ارتبط بيكى .
سهتانة: معجب؟ وترتبط؟ دة متى وفين ان شاء الله
طارق : اقولك , انا من ساعة ما شوفتك وزى ما قلت لك ,حاسس انى لقيت اللى بدور عليه , حنيتك على الحاجة ام مبروكة , خوفك على مبروكة بنتها , طيبتك , احساسك بالناس ,. كل الحاجات دى يا سهتانة شدانى اوى , دة غير كمان احساسى بروحك الحلوة ,
سهتانة : اة ؟ وبعدين ؟
طارق: انا عاوز نتعرف على بعض اكتر
سهتانة : اكتر ازاى يعنى ؟
طارق: بصى يا ستى مبدئيا كدة وعلى الماشى انا طارق عبد العزيز – 30 سنة – اصلا اصلا من اسكندريه , وتعينى جه عندكم فى البلد هنا ودة لحظى طبعا
سهتانة : اسكندريه ؟؟؟؟؟الله انا بحب البلد دى اوى
طارق : وهى كمان بتحبك والله يا سهتانة ,
سهتانة : ضحكت , طيب وبعدين بقا ؟ بعد ما اتعرفنا؟
طارق: بصى يا ستى , انا بس كان كل اللى هاممنى اعرف انتى متقبلانى يعنى ولا لا ؟ وبعد كدة اكيد هاجى علشان اقابل والدك واطلبك منه     طيب دلوقتى ممكن اخد رقم موبايلك علشان نتعرف على بعض اكتر, دة لو مش هيضايقك يعنى ؟
سهتانة : بقولك ايه ؟ انا ماليش فى السكك دى  , وياريت بقه بلاش كلام كتير , ولا تاخد موبايلى ولا تاخد مقاس جزمتى ,وقفل بقا علشان مبروكة جت اهه,
مبروكة : الله ؟سهتانة ؟ انتى جيتى امتى يا بنتى ؟
سهتانة : انا انا انا ..............
مبروكة : الله مالك يا بنتى ؟. ايوة انتى اومال مين ؟
ازيك يا دكتور ؟ والله انا بشكر حضرتك جدا على خدماتك
طارق: لا شكر على واجب , ربنا يتمم شفاء الست الوالدة ان شاء الله
مبروكة : ربنا يخليك ,طيب عن اذن حضرتك بقا , يلا بينا يا سهتانة
سهتانة : يلا
مبروكة: الله مالك يا بت؟ فيكى ايه ؟ ومال وشك اصفر كدة ؟
سهتانة : اسكتتتتتتتتى , اللى جرالى يا مبروكة النهاردة مكنش عالبال ولا عالخاطر يا ختى ,
مبروكة : خيييييييير ؟ فى ايه يا بت قلقتينى ؟
سهتانة: بصى يا ستى , صلى على حضرة النبى
مبروكة : اللهم صلى عليه
وحكت سهتانة لمبروكة كل اللى حصل لها مع الدكتور طارق
مبروكة : جدعة يا بت يا سهتانة انك صدتيه فى الكلام , احنا يا اختى مش اد بتوع البندر ولا اد عمايلهم السودة , انتى كدة رميتى الكورة فى ملعبة , والله شارى اهلا وسهلا بيه , ناوى يلعب ويتسلى يدور يا اختى على حد شبهة احنا مش بتوع المسخرة دى
سهتانة : اة فعلا , بس انتى يعنى تتوقعى ايه ؟
مبروكة : مش عارفة يا بت .؟ اصل احنا ما نعرفوش دى كل الحدوتة يومين تلاتة , مش عارفة , سيبى الموضوع على ربنا واللى فيه الخير ربنا يكتبهولك ياااااااااااارب يا سهتانة يا بنت حميدة
سهتانة : يارب يا اختى يارب
خلصت سهتانة الزيارة , وروحت على بيتها علطول , وطول الطريق بتفكر فى اللى حصلها , يا ترى الدكتور طارق بيتكلم بجد وغرضة شريف ؟ ولا بيتسلى ؟ ياترى هيقابل ابوها بجد؟ ولا هيخلع كدة وخلاص توتة توتة وخلصت الحدوتة ؟مكنش قدام سهتانة غير انها تسمع كلام مبروكة صاحبتها واختها , تسيب الموضوع على ربنا , واللى فيه الخير اكيد ربنا هيقدمهولها ان شاء الله ,
ام سهتانة : ايه يا بنتى ام مبروكة عاملة ايه دلوقتى ؟
سهتانة : ايه ؟
ام سهتانة : بقولك يا بت ام مبروكة عاملة ايه ؟ اصلى ما عرفتش اروحلها النهاردة غسلت وعملت الغدا وجسمى ريح ,
سهتانة : اة اة كويسة
ام سهتانة : فى ايه يا بت مالك ؟ مسهمه كدة ليه ؟
سهتانة : يووووه بقا يا اما وانا هسهم ليه يعنى ؟ مفيش , تعبانة بس من الشغل شوية ,
ام سهتانة : طيب يا اختى احط لك تاكلى ؟ ولا هتستنى ابوكى واخوكى المعدول ؟
سهتانة : لا ماليش نفس , انا هدخل اريح شوية ولما يجى ابويا والواد هدهد ابقى صحينى ,
ام سهتانة : ماشى يا بنتى , بس انتى متأكدة ان انتى مفيكيش حاجة ؟
سهتانة : لا يا اما , مافيش حاجة ,
ام سهتانة : تحط ايدها على أورة بنتها , تكونيش عيانة يا بت ؟ مالك مسخسخة كدة لية ؟
سهتانة : اصل الدنيا حر ,يلا انا طالعة اوضتى اريح شوية
ام سهتانة مش عارفة بنتها مالها ؟ وايه اللى جرالها ؟ ها باليد حيله ,
ابو سهتانة جه بالسلامة والواد هدهد جه من رحلة الصيد بتاعتة وبرضة ما اصطادش ولا سمكاية يتيمة , وراحت الست ام سهتانة على اوضة سهتانة علشان تصحيها ,
ام سهتانة : يلا يا سوسو , يلا يا حبيبتى علشان تتغدى ,الله انتى مفنجله كدة ليه ؟ انتى مش قلتى هتريحى شوية ؟
سهتانة : اة مانا ما جاليش نوم , ومش عاوزة اكل ماليش نفس
ام سهتانة : لا لحد كدة بقا وفهمينى , مالك فيكى ايه ؟ دة انتى كنتى بتاكلى تلات اربع مرات , انتى لا ليكى نفس تاكلى , ولا ليكى مزاج تنامى , مين اللى طير النوم من عينك ؟ وسد نفسك يا ضنايا ؟
سهتانة : الله بقا يا اما , هو فى ايه ؟بقولك ماليش نفس , عادى يعنى , مش لازم يكون فى سبب
ام سهتانة : طيب قومى تعالى اقعدى معانا وماتاكليش ,
سهتانة : لا انا هريح شوية , بس والنبى يا اما وانتى خارجة شغلى لى التسجيل
اسمع شوية اغانى ,
ام سهتانة : اغانى ؟ وماله , ماشى يا سهتانة خليكى على هواكى
سهتانة : شغلى التسجيل وطفى النور وانتى طالعة
ام سهتانة : حااااااااااااضر
نزلت الست ام سهتانة وهى مستغربة من حالة بنتها , ومش فاهمة حاجة, ومش عارفة حاجة ,
اتغدت ام سهتانة وجوزها وهدهد , وشوية وابو سهتانة نزل القهوة يقعد مع اصحابة , ودخل هيما ينام , والست ام سهتانة بتتفرج على التليفزيون ,
نزلت سهتانة علشان تاكل وبتتفرج على التليفزيون مع امها , خبط باب البيت وقامت ام سهتانة تفتح, لقت ابو سهتانة بيقولها خشى جوة يا ولية ووسعى السكة معايا ناس ,
ام سهتانة : ناس مين يا اخويا ؟
ابو سهتانة : بعدين مش وقتة , سكة يا وليه
ام سهتانة : حاضر يا اخويا , تعالى يا سهتانة نطلع فوق احنا
سهتانة : مين يا اما اللى مع ابويا دول
ام سهتانة : ولا اعرف ؟ ولا قالى حاجة , قال يا خبر النهاردة بفلوس بكرة هيبقى ببلاش ,
سهتانة : ببلاش ؟ ماشى , ( فى سرها ) يكونش الدكتور طارق ؟
معقول ؟ يكون هو ؟

يتبع
Asmah Ghazal

الثلاثاء، 25 أكتوبر، 2011

غير صالح للنشر





دى قصة مش واقعية , ومش عارفة إذاكانت ممكن تكون واقعية ؟ ولا لأ؟
المهم ما تيجوا نقرا ....
الشخصيات حسب الظهور :-
رئيس التحرير الأستاذ لمعى ,
الزملاء فى قسم التحقيقات ,
عم زين فراش المجلة ,
الصحافية الاستاذة لمياء .
الدكتور رامز ,
مدام أمل ,
الأستاذ إبراهيم ,
الست إبتسام ,
الاماكن اللى هنزورها فى القصة , وبرضة على حسب الظهور :-
-         مجلة بكرة أحلى ,
-         مستشفى الشفاء العاجل للأمراض النفسية والعصبية ,
-         شقة مدام أمل والأستاذ إبراهيم .
-         شقة الست إبتسام ,
جوة مبنى مجلة بكرة أحلى هنلاقى الاستاذة لمياء ,صحافية محترفة فى قسم هموم إمرأة  , القراء بيستنوا مقالاتها على احر من الجمر , طبعا القاعدة الجماهيرية ليها هما الستات, لان الباب اللى هى بتكتب فيه بيناقش مشاكلهم وقضاياهم , بينزل للستات دول وينقل تجاربهم وخبراتهم فى الحياة , هى بتحلم ببكرة احلى ليها ولكل الستات اللى بتكتب عنهم ,
-------------------------------------------------------------------
الأستاذة لمياء : صباح الفل عليكم جميعا
الزملاء فى القسم :صباح الورد عليكى ,
عم زين : وأدى يا استاذتنا فنجان القهوة المعتبر بتاع كل يوم ,
الاستاذة لمياء: ما اتحرمش منك يا راجل يا طيب ,
عم زين : ولا منك يا استاذة
-----------------------------------------------------------------
عم زين : الاستاذ لمعى عاوزك فى مكتبه يا استاذة
استاذة لمياء : حاضر يا عم زين انا رايحاله اصلا
-----------------------------------------------------------------
الاستاذة لمياء: صباح الخير يا استاذ لمعى
الأستاذ لمعى : صباح الخير يا لمياء إتفضلى استريحى
الاستاذة لمياء: متشكرة يا افندم
الاستاذ لمعى : ها يا ستى ؟ ايه الاخبار ؟
الاستاذة لمياء : والله يا فندم انا النهاردة ان شاء الله هزور مستشفى الشفاء العاجل , ابن عمى دكتور هناك , هروح ادردش معاه شويه عن الحالات اللى هناك , امراضهم واسبابها , مش عارفة عندى فضول انى المقال اللى جاى دة يكون بطله أو بطلتة نزيل مستشفى الامراض النفسية
الاستاذ لمعى: ربنا يوفقك , عاوزين مقال سخن بقا
الاستاذة لمياء : ربنا يستر يا افندم ,
---------------------------------------------------------------------------
الاستاذة لمياء : الوووو صباح الفل يا دكتور رامز
الدكتور رامز : صباح الفل ازيك يا لمياء ؟
الاستاذة لمياء: الحمد لله , انا بتصل بيك علشان أأكد ميعادنا ,
الدكتور رامز: اة تمام الساعة  3 هكون فى إنتظارك إن شاء الله ,
الاستاذة لمياء : إن شاء الله
------------------------------------------------------------------------
الاستاذة لمياء : رامز انا على باب المستشفى  , هركن وادخل لك علطول ,
الدكتور رامز: انا فى مكتبى فى انتظارك ,
الاستاذة لمياء : اهلااااااااااااااا إزيك ياابن عمى يا دكتور يا كبير هو انا يعنى لازم اعمل مقال علشان اشوفك يعنى ؟
الدكتور رامز: والله الكلام دة تقوليه لنفسك يا بنت عمى انتى يعنى ما تجيش تزورينى غير علشان مصلحة ؟
الاستاذة لمياء : هههههههههههه مصلحة ؟مااااااااااااشى بما انى بقا بتاعة مصلحتى , تسمح ندخل فى الموضوع علطول ؟
الدكتور رامز: طيب يا ستى خدى نفسك واشربى اى حاجة الاول
الاستاذة لمياء: لالالالا أنا واكلة فى المكتب ساندوتش كدة على السريع وشاربة قهوة لما هقعد مفتحة عيونى اسبوع متواصل
الدكتور رامز: ههههههههههه ماشى يا ستى , على العموم المكتب مكتبك فى اى وقت هتحتاجى اى حاجة اطلبيها علطول ما تتكسفيش ,
الاستاذة لمياء : كتر خيرك , قولى بقا عملت لى ايه فى اللى طلبتة منك ؟
الدكتور رامز: بصى يا ستى , انا جمعت لك 5 ملفات عن 5 حالات مرضية اقريهم بقا ومزمزى فيهم والملف اللى هتختارية نتناقش فيه وادخلك للحالة تتكلمى معاها كمان لو امكن ,
الاستاذة لمياء : زى الفل , استعنا على الشقا بالله
-------------------------------------------------------------------------
مسكت لمياء الملفات وحالة غريبة من الفضول انتابتها , مين الناس دول؟ ياترى ايه اللى وصلهم لمستشفى الامراض النفسية ؟ ايه الاسباب ؟ ايه الدوافع ؟مليون سؤال وسؤال نط فى دماغ لمياء , بدأت تقرا فى الملفات ملف ملف , تعيش مع كل ملف , تتصور الاحداث , اشتغلت مخرجة وممثله ومصورة لكل حالة من الحالات اللى قريتها , بس لحد دلوقتى مفيش حاجة شديتها , مفيش حاجة جذبتها , هى حاسة ان كل الملفات مشاكل عادية , هى اينعم مشاكل لكن واردة بتحصل فى احسن العائلات زى ما بيقولوا , هى بتدور على قصة فيها إثارة ومتعة وتشويق ليها ولكل قرائها , وفجأة مسكت ملف أمل.                                                            .الصورة  شديتها , خطفتها , بدأت تفرد ضهرها كدة وهى بتقرا وتركز اوى , بداية الملف
اسم الحالة: أمل حسن عبد البديع
السن : 60 سنة
تاريخ التحاقها بالمستشفى : 12/04/1980
الاستاذة لمياء : ياااااااااااه دة معناة انها فى المستشفى من عشرييييييييين سنة .
الحالة : انفصام فى الشخصية , اكتئاب حاد , تكرار محاولة الانتحار ,
الاستاذة لمياء : يا ساتر يارب انتحار ؟ طيب ليه دة كله ؟ هاااااااااااا استعنا على الشقا بالله
امل الشابة الجميلة خريجة كلية الفنون الجميلة , ارتبطت بشاب كان زميلها فى الكلية , ربطتهم احلى واعظم قصة حب , , عاشوا اجمل ايام حياتهم , اتجوزوا رغم كل الظروف والصعوبات اللى واجهتهم , اتخطوا مع بعض مشكله اعتراض اهلها على جوازها من شاب لسة فى مقتبل حياتة , اتخطوا برضة مشكلة رفض والدتة انها تجوز ابنها الوحيد لواحدة ماتعرفهاش ,مع انها كانت حاطة عينها على بنت اختها , اتخطوا كل حاجز وقف قدام جوازهم وارتباطهم ببعض , اتجوزوا وعاشوا اسعد اوقات حياتهم , الكل كان بيحسدهم على السعادة اللى عايشين فيها , وعدى على جوازهم سنتين , واللى يشوفهم يفكر انهم لسة عرسان جداد , وفى يوم من الايام , شرفتهم الست ابتسام بزيارة كريمة ::::::
الست ابتسام: مساء الخير يا حبيبى , ازيك ؟ وحشتنى اوى
إبراهيم : اهلا يا ست الحبايب منورة والله يا امى
الست ابتسام : دة نورك يا حبيبى
ابراهيم : بيوشوش والدتة ) إإإإغيه مش ناوية تسلمى على امل ولا ايه ؟
الست ابتسام : ( من غير نفس ) ازيك يا امل؟. هااااااااااااااااا مفيش حاجة كدة ولا كدة ؟ ولا ايه ؟
امل : ازيك يا ماما , نورتينا والله , حاجة ؟ حاجة ايه ؟
الست ابتسام: حاجة اية؟ هبقى بسال عن ايه يعنى يا ست امل ؟ عن حفيدى ؟ عن اعز الولد ؟ عن الحلم اللى نفسى احققة قبل ما اموت واقبل رب كريم ,
ابراهيم : الله الله , واية لزومة بس الكلام دة يا امى ؟ مانتى عارفة انها مش بتخلف
الست ابتسام : ولا ايه لزومة ولا اية مش لزومة ؟ بقولك ايه ؟ انا جاية النهاردة علشان اوضع حد للمهزلة دى واعرف لى راس من رجل ,
ابراهيم : راس ايه ورجل مين , فى ايه بس يا امى ؟ انا قلت لك مليون مرة دى حياتى وانا حر فيها , انا مبسوط كدة ,
الست ابتسام : مبسوط ؟ وبدأت فى العياط والتمثيل , حرام عليك يا ابنى , انا ست كبيرة ومريضة , هو انا مش بصعب عليك؟ ما تقولش امى دى ذنبها ايه ما تشوفش حفيدها .؟ سلسال عيلتنا ؟ اللى هيشيل اسمك , ؟
امل : طيب عن إذنكم انا
الست ابتسام : تشد إبراهيم ناحيتها , يابنى يا ضنايا اسمعنى , الايام بتمر والسنين هتجرى , ومش هتشوف ابنك ؟ حتة منك ؟ ضنااااااااك ؟ اسمعنى يابنى , امل مراتك شجرة بور , ما فيش منها منفعة , انا كلمت لك بنت خالتك , تتجوزها وتخلف منها ضناك ,
ابراهيم: طيب وامل يا ماما ؟ انا بحبها , ولو عررررررفت ؟
الست ابتسام : وامل هتعرف منين بس , انا منبهة على بنت خالتك , ومن يمتى انا مش هفتح بقى ولا اجيب سيرة
وخالتك وجوزها انا اضمنهم لك برقبتى بس انت تسمع كلامى ,
ابراهيم : سرحان ,,,,,,, مش عارف يا ماما ؟
الست ابتسام : مفيش مش عارف , خلاص على بركة اللى , بكرة تيجى كأنك معزوم عندى على الغدا , وهناك هتبقى خالتك وبنتها موجودين , ونتمم كل حاجة
ابراهيم : يعنى انتى شايفة كدة ؟
الست ابتسام : ااااااااااه شايفة كدة وابو كدة كمان , الف مبروك يا حبيبى , ربنا يهديك وتسمع كلامى كمان وكمان
ابراهيم : خلاص ماشى يا ست الحبايب إتفقنا

طبعا ابراهيم ومامتة بيتكلموا ومش واخدين بالهم إن امل سامعة كل كلمة وكل حرف من اللى قالوه , وبالرغم من انها سمعت بس هى مش مصدقة ان ابراهيم جوزها والاهم من جوزها حبيبها ممكن يعمل معاها حاجة زى دى , عدى اليوم دة على امل طوييييييييييل وليلة اسود وحالك , مانامتش لحد الصبح , نزل ابراهيم على شغلة , وهى مش مصدقة نفسها , مش مصدقة ودانها , جة ميعاد ابراهيم وماجاش البيت , تليفون البيت رن

امل : الووووو
ابراهيم : حبيبتى ازيك؟ بقولك انا مش هقدر اجى على الغدا النهاردة اصلى عندى شغل كتير
أمل : شغل كتير؟
ابراهيم : اة يا حبيبتى يلا انا مضطر اقفل , اشوفك بالليل على خير , سلام يا حبيبتى
امل  حاسة انها مش قادرة تتكلم , اتحاشت الحروف فى حلقها , اتجمدت فى مكانها ,لكن لا , هى لازم تتأكد من اللى سمعتة بنفسها لانها لحد دلوقتى برضة مش مصدقة اللى بيحصل قدامها
لبست امل ونزلت على بيت حماتها الست ابتسام , بترن الجرس لكن محدش بيفتح , بترن تانى , فتحت الشغالة ,دخلت امل تجرى فى الشقة لقت المأذون بيسحب المنديل , وبيقول جملتة الشهيرة بالرفاء والبنين ان شاء الله , والف مبروك
سقطت امل من طولها , مش حاسة بالدنيا , فاقت فى المستشفى , امل فقدت النطق , فقدت الاحساس بنفسها وباللى حواليها , عاشت فترة مش طويلة من غير اكل ولا شرب ولا كلام ولا اى مظهر من مظاهر الحياة ولما عرضوها على دكتور نصحهم يودوها مصحة نفسية لان اللى عندها دة مالوش علاقة بالاعراض الجسمانية حالة امل حالة نفسية بحتة وفى يوم من الايام جابها ابراهيم بنفسه للمستشفى , , ومن ساعتها و لا من شاف ولا من درى


الاستاذة لمياء :  تمسح دموعها , يااااااااااااااه ابراهيم دة حيوان بجد , مفيش رحمة , مفيش انسانية
يا رامز , يا دكتور رامز ؟
الدكتور رامز: ايوة جاى يا لمياء , خير ؟ مالك انتى معيطة ؟
الاستاذة لمياء: شوية كدة , اتأثرت اوى بقصة امل , مفيش رحمة ولا انسانية
الدكتور رامز: اة فعلا انتى عارفة ان بقالها عشرين سنة فىالمستشفى محدش فكر مرة يجى يزورها , كل اللى ربنا قدرهم علية مصاريف المستشفى , كل شهر يبعتوا مصاريف المستشفى مع السواق وخلاص على كدة , وعارفة مين اللى الوحيدة اللى بتيجى  تزورها وهى كمان اللى حكت لنا على كل اللى حصل لامل  الدادة بتاعتها , انتى عارفة انا مش ضد انه كان يتجوز علشان يجيب طفل دة حقة , انا بس ضد الطريقة اللى اتجوز بيها , ضد اهماله ليها , ضد قسوتة عليها ,
الاستاذة لمياء : طيب هو انا ينفع اشوفها
الدكتور رامز: اة ينفع بس خدى بالك هى مش بتتكلم اصلا ,
الاستاذة لمياء : مش عاوزة اتكلم انا عاوزة اشوف شكلها بس
الدكتور رامز: وليكن يلا بينا

راحت الاستاذة لمياء لاوضة امل , فتح التمرجى باب اوضتها , فشافت لمياء امل , ست عجوزة الزمن باين أوى على ملامحها , الحزن كاسى روحها , ساكتة وبتتهز حاضنة نفسها بنفسها  , محوطة نفسها بإيديها المكرمشين ,قاعدة فى ركن فى اخر الاوضة , على الارض , امل مخدتش بالها من لمياء خالص , ولا حست بوجودها , لكن لمياء بقا حست بأمل , حست بكل هزة من هزاتها ,     حست بكل رمشة من عنيها بكل حركة ليها ,
خرجت لمياء من المستشفى , وراحت المجلة , وكتبت المقال , بس للاسف رفض رئيس التحرير انه ينشر المقال المرة دى , بحجة ان المشكله بسيطة وواردة وعلى راية الدايم بتحصل فى احسن العائلات , حاولت لمياء تفهمة ان ممكن نستسهل مشكلة او نحسها بسيطة لكن بتكون لصاحبها الضربة القاضية , وان مش مهم حجم المشكله المهم تأثيرها على النفس البشرية بس للاسف ما اقتنعش بوجهة نظرها , هو كل اللى عاوزة مقال سخن ومقال نار ,
وفضل المقال فى درج الاستاذة لمياء , وكتبت عليه غير صالح للنشر ,