الثلاثاء، 30 أغسطس، 2011

أنا وحزلئوم




 أنا وحزلئوم
أنا وحزلئوم دى قصة قصيرة من وحى خيالى - ودة منعا للقيل والقال .
ابطال قصه انا وحزلئوم من وحى خيال الكاتب اللى هو انا.
وفى حاله تشابه أشخاص القصة بأشخاص من الواقع
 فأنا غير مسئولة.....
مقدمة
الاعلانات : هى عبارة عن قصة قصيرة بتتعرض لفترة صغيرة اوى علشان توضح وجهة نظر المنتج لجذب انتباه المستهلك .
هو ايه الكلام المجعلص دة ؟؟؟ نقول تانى وواحدة واحدة
وبشويش علشان اللى ما فهمناش يفهم
الأعلان دة مش محتاج شرح دى حاجة كلنا عارفينها هههه
                              المهم بقا وندخل فى الموضوع         
من كام يوم لقيت اعلان فى التليفزيون لخدمة جديدة عملاها شركة معينه .
وفكرة الاعلان كالتالى : جوزنى شكرا
مدخل الاعلان : -اغنيه فرح مشهورة للست شادية المبجله
ويا دبله الخطوبة عقبالنا كلنا – ونبنى طوبه طوبة فى عش حبنا وزغاريت ودبل وشبكة وحركات جامدة
دة كلام بجد وصحيح وبحق وحقيقى ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
لا والأدها من دة كله الرساله بتاعة الاعلان كالتالى
 اتصل قول مواصفات فتى احلامك او فتاة احلامك  واحنا هنوصلك بيه
دة زى كنتاكى وبيتزا هت كدة دة ولا ايه ؟؟؟؟؟؟؟؟؟؟؟
يا ناس يا عالم يا هوووووووووووووووو---- احنا فى زمن العجايب
الا هو يعنى ايه اتصل بالتليفون واسيب بياناتى ويوصلوا لى العريس لحد عندى
هو للدرجة دى بقا فى استهتار بقدسية الجواز – ؟؟؟؟؟
طيب سؤال تانى ؟ ياترى فى ناس بتتصل وبتستجيب للأعلان دة ؟؟؟؟؟؟؟؟؟؟
طيب هو مين الفئة اللى ممكن تتصل ؟ وتقتنع ؟
اسئله كتير اوى نطت جوا دماغى ولعبت فيها ماتش كورة جامد اوى

وفى الوقت دة تليفونى رن
انا : الوووووووووووو
حزلئوم : الوووووووو ازيك يا بنتى عامله ايه ؟ كل سنة وانتى طيبة
انا : وانت طيب يا حزلئوم يا صديقى العزيز
حزلئوم : انا زهقان اوى ومضايق
انا : خير يا حزلئوم فضفض يا اخويا
حزلئوم : فيكى من يكتم السر
أنا : ف بيييييييييييييييييييير
حزلئوم : انا عاوز اتجوز
انا : بصيت على شاشة تليفونى كويس اتأكد ان اللى بيكلمنى دة الواد حزلئوم صاحبى واخويا
عاوز تتجوز؟ واد يا حزلئوم انت بتكلمنى انا يا واد
حزلئوم : ايوة بكلمك انتى انتى – اومال بكلم مين يعنى
انا : طيب ما تتجوز يابنى هو فى حد حايشك – دة انتوا حتى معشر الرجاله عينى عليكوا باردة واكلينها والعة – وقال على راى المثل تقعد ع البساط وتنقى ست البنات .
حزلئوم : يا ساتر يارب على عينك يا شيخة – ماهو انا بكلمك علشان تساعدينى
انا : رقبتى يا اخويا يا حزلئوم – اؤمرنى يا غالى يا قمر كل الليالى
حزلئوم : الامر لله يا اختى – انا فتحت اكونت على موقع من بتوع الجواز بتوع اليومين دول .
انا : موقع ايييييييييييه ؟ موقع جواز ؟ ؟؟؟؟؟؟؟؟؟؟ وبعدين ؟ عايزنى اساعدك ازاى مش واخدة بالى برضة .
حزلئوم : بما انك صاحبتى يعنى انا عاوز اخد رايك ف الموضوع دة
انا : بتردد تااااااااااام – ومش عارفة ارد على حزلئوم صديقى الصدوق ازاى ؟ بس صوت العقل نط ف دماغى وبما انى عارفة كل ظروف حزلئوم المهببة – وانه مالوش معجبات – ولا له معارف – ومقطوع من شجرة – وتقريبا محدش بيقبل عليه غيرى – فقلت له
انا : بص يا حزلئوم النت دة يابنى زى الدنيا اللى احنا عايشين فيها بالظبط – فيها الكويس وفيها الوحش
فدة دورك انت يا حزلئوم – ومصر امانة بين اديك يا بنى .........
حزلئوم : انهين ؟ انهون ؟ يعنى اعمل ايه انا ؟
انا : بص يا واد انا هوعيك – انت تخليك صريح وتدخل بنيه سامحة وتقول شروطك بالظبط وبما يرضى الله وتخليك محرس اووووووووووى وانت بتتعامل الا انا عارفاك طيب وعلى نياتك .وجرب يا حزلئوم مين عارف ؟
حزلئوم : اة فعلا انا طيب وعلى نياتى – هااااااا وبعدين ؟؟؟
انا : انت هتحس يا حزلئوم صدقنى باللى بتتكلم معاك – قلبك هينور لك طريقك لان انت طيب ومحترم وابن ناس – والطيور على اشكالها تقع .
حزلئوم : منشكحا – ربنا يحفظك
انا : بس يا سيدى ولما تتكلم مع حد وتحس انك مرتاح ابقى احكى لى وانا هساعدك على قد ما هقدر – وربنا يوفقك يا حزلئوم يا اخويا ونحسك يتفك . يلا سلام بقا يا حزلئوم علشان رايحة اسلق بيضتين اتعشى
حزلئوم : سلام
قفلت التليفون مع الواد حزلئوم وانا خايفة عليه اوى – دة الواد نزل البحر وما بيعرفش يعوم – وكمان ممعهوش عوامة
والله انا خايفة النداهة تندهك يا واد يا حزلئوم وتمشى ف سكة اللى يروح وما يرجعش – اهو يبقى نصيبة ومن اعمالكم سلط عليكم – ربنا معاك يا حزلئوم يارب – ويبعد عنك ولاد الحرام .
فى صباح اليوم التالى ....................اللى هو ما عداش عليه غير سواد الليل
رن تليفونى ........... وكنت نايمة
أنا : الوووووووووووووووو
حزلئوم : باركى لى – هنينى – وجدتهاااااااااااااااااا
أنا : قمت من النوم ادعك فى عنيا واقول فى سرى منك لله يا حزلئوم الكلب كانت معرفتك معرفة سودا – هى ايه دى اللى وجدتها يا حزلئوم
حزلئوم : نصى التانى
أنا : فوقت من وقع الكلمه على ودنى وما تحمله من معانى خطيرة ممكن تغير للواد مستقبله
إإإإإإإإإإإإإإإإإإإيه ؟ نصك التانى ؟؟؟؟؟؟؟؟؟؟؟؟؟؟ دة امتى وفين وازاى ؟ دة احنا قافلين مع بعض من مفيش لقيتها ف الحلم يا حزلئوم افندى ولا متصل تتهازر ع الصبح ؟؟؟؟؟؟؟؟؟
حزلئوم : فوقى بس يا ستى وانا هحكيلك
أنا : فوقت – ها – خير ؟ احكر يا شهريار زمانك
حزلئوم : بصى يا ستى – امبارح بعد ما قفلت معاكى – دخلت على موقع جوزنى شكرا اللى قلت لك انى اشتركت فيه – ولسة داخل وبقول يا هادى وبسم الله توكلت على الله – الاقيلك اااااااااااايه ؟
أنا : إإإإإإإإإإإإيه
حزلئوم : الاقى بروفايلات وصور وحركات بقرا انا بقا ومركز زى مانتى نصحتينى الاقيلك ااااااااااااااااايه ؟
أنا : إإإإإإإإإإإإإإإإإيه ؟
حزلئوم : بنت  زى القمر – وكاتبه ف البروفايل بتاعها انها شبه نانسى عجرم
أنا : وهى حاطة صورتها ؟
حزلئوم : لا – دى هى اللى بتقول
أنا : وانت صدقت كدة علطول ؟ فالح من يومك
حزلئوم : من غير تريقا ممكن تسمعينى للأخر
أنا : اتفضل يا اخر صبرى
حزلئوم : بصى يا ستى هى مش من المحافظة بتاعتنا هى من محافظة تانيه قريبة مش بعيدة يعنى ساعتين بالعربية – عندها 29 سنه – وشبه نانسى عجرم – وممشوقة القوام –
أنا : وبعدين ؟؟؟؟
حزلئوم : كلمتها واخدت موبايلها وهسافر اقابلها النهاردة ان شاء الله
أنا : نععععععععععم عرفتها من ساعتين ورايح تقابلها النهاردة ؟ طب ازاى دى ؟ ممكن تفهمنى ؟
حزلئوم : والله انا قلت خير البر عاجله – والخيرة فيما اختارة الله
أنا : يا ابنى يا حبيبى – انت لو هتسافر تقابل كل بنت هتكلمها يبقى ان شاء الله تغير اسمك من حزلئوم لابن بطوطة – انت يابنى انت تهدى وبالراحة دردش معاها الاول شوية والله ارتحتم لبعض خير وبركة – ما استريحتوش يبقى خلاص
حزلئوم : على اعموم انا اخدت معاها ميعاد وبتصل علشان اقولك انى مسافر اشوفها ادعى لى بقا – يلا سلام علشان الحق اجهز نفسى ولما ارجع هكلمك
أنا : سلام وربنا يوفقك
قمت اتوضيت وصليت ودعيت لحزلئوم صاحبى واخويا ان ربنا يكرمه ويبعد عنه ولاد الحرام اللى بقوا تقريبا يعادلوا ولاد الحلال ف الكميه ويمكن بقوا اكتر شوية وفطرت – ونزلت مشاويرى – ورجعت بالليل – وقلت لما ادخل اريح شويه لان حزلئوم قلق منامى وصحانى بدرى .
تليفونى ررررررررررررررن

أنا : الووووووووووووووووووووووو
حزلئوم : الو – ازيك؟
أنا : كويسة الحمد لله – المهم انت يا عريس عامل ايه ؟
حزلئوم : انا زفت وطين وهباب ومش مرتاح
أنا : فى سرى طبعا – وأدى اللى عملت حسابه – خيييييييير ايه اللى حصل
حزلئوم : انا نزلت اقابل الزفتة دى ف الميعاد اللى اتفقنا عليه بتصل بيها لما قربت اوصل لقيت موبيلها مقفول – ركنت العربية وفضلت احاول اتصل تانى ممكن تكون الشبكة مغلسه كالعادة – وفيييييييين على ما التليفون جمع
أنا : طيب الحمد لله وبعدين ؟؟؟؟؟؟؟؟
حزلئوم : ولا قبلين بقولها انا وصلت يا نانسى ودة مش اسمها على فكرة بس انا بدلعها بيه لانها شبه نانسى عجرم بنت التيييييييييييييييت .
نانسى عجرم :  خلاص انا هلبس وانزل.
حزلئوم : ايه ؟ طيب ما احنا متفقين ع الميعاد انتى لسه هتلبسى وتنزلى ؟ يعنى استنا انا ف الشارع ولا ايه ؟
نانسى عجرم : لا ليه تستنى ف الشارع – استنانى ف الكافيه وانا نصايه وجايه
حزلئوم : نصايه ؟؟؟؟ وماله ؟ ماشى بس حاولى ماتتأخريش
نانسى عجرم : اوك باااااااااااااااااااااااى
حزلئوم : بس يا اختى دخلت الكافيه طلبت لى ساندوتشين اكلهم مانا على لحم بطنى من الفرحة بتاعة طول اليوم – اكلت وقعدت مستنى طلعتها البهية
وابص بعينى الاقيلك اييييييييه ؟
أنا : إإإإإإإإإإإإإإإيه
حزلئوم : الاقى موزة نازله من ع السلم ابو كهربا ويأرض اتهدى ما عليكى ادى
البدى الفحلوقى والاسترتش الاساتوك – والشعر الاصفر الكتاكيتى بيهفهف
ونانسى عجرم قلبت على لولا ولع بتاعة شارع الهرم – بقيت ف نص هدومى قربت عليا وقالت لى :
نانسى عجرم : انت حزلئوم صح ؟ شكلك شبه الصورة اللى بعتهالى جدا على فكرة
حزلئوم : وانتى مش كل نانسى عجرم خااااااااااااالص على فكرة
نانسى عجرم : ندخل ف التفاصيل – انا عمليه جدا ومش بحب اضيع وقت – اصل الوقت دة بفلوس
حزلئوم : بفلوس ازاى يعنى
نانسى عجرم : مش مهم مش مهم – انا سلمى 29 سنة وشكلى موزة اخر 3000 حاجة زى ما انت شايف طبعا – طويله وممشوقة القوام – انا مش مؤمنه اطلاقا بفكرة الجواز دى خالص على فكرة – لانى كان ليا للاسف تجربة جواز وفشلت فانا ف الوقت الحالى معنديش استعداد انى اكرر وجع الدماغ دة تانى .
حزلئوم : مسبهلا وبعدين يا نونوس
نانسى عجرم : انا بقول اننا نضرب ورقة عرفى ولا من شاف ولا من درى والله استريحنا مع بعض نقلب الموضع رسمى 0 ما استريحناش يبقى كل واحد يروح فى طريقة من غير حس ولا خبر
حزلئوم : خبرك اسود ومهبب – وبعدييييين ؟
نانسى عجرم : انت هتدفع لى مبلغ معين احنا الاتنين هنتفق علية – وبعدها نتفق على باقى التفاصيل اللى هتريحنا احنا الاتنين
حزلئوم : بس انا مش من نفس المحافظة بتاعتك انتى عاوزة تمشيها ازاى ؟
نانسى عجرم : هنقسم الاسبوع نصه عندك ونصه هنا
حزلئوم : ااااااااااه وبعدين ؟
نانسى عجرم  : انا كدة خلصت كلامى وشروطى هروح التواليت وهرجع علطول
حزلئوم : بس يا اختى استنيتها قامت وناديت ع الجرسون وحاسبت واخدت ديلى ف سنانى وقلت يا فكيك – وبعد شويه الاقى موبايلى بيرن رديت عليها
نانسى عجرم : انت فين ؟
حزلئوم : الفقرة اللى فاتت دى اتصورت لو عاوزانا نذيع قولى ذييييييييييييييع
وعنها قفلت موبايلى يا اختى ولسه فاتحة علشان احكيلك على الوكسة السودة اللى اخوكى فيها دى
أنا : هههههههههههههههههه والله ضحكتنى يا حزلئوم – انسى وسفريه تفوت ولا نانسى تموت . بقولك ايه يا حزلئوم انت اتسرعت يا اخويا وانا قلت لك وانت ما سمعتش كلامى على العموم اللى حصل حصل ولا تبكى على اللبن المسكوب – ودة يعلمك بقا انك ما تتسرعش يا حلو وف التانى السلامه وفى العجله الندامه ولا ايييييييييه ؟
حزلئوم : انتى عندك حق اه يانى يانى يانى انا مش هتسرع تانى
طيب عن اذنك بقا دلوقتى علشان فى واحدة بتكلمنى على موقع جوزنى شكرا وبتقولى انعا شبه اليسا
أنا : تااااااااااااااااااااااااااااااااااااااااااااانى .

Asmah Ghazal

الحلقة السادسة


الحلقة السادسة ( يوميات سهتانة فى الارياف )

بتروح الست ام سهتانه علشان تفتح الباب
أم سهتانة : مين ؟؟؟؟؟؟
ابو سهتانة : انا يا وليه – يعنى هو مين بيجيلكوا ولا بيبص ف وشكم حتى
ام سهتانة : حمد الله ع السلامه يا ابو سوسو
ابو سهتانة : الله يسلمك – يلا بسرعة حضرى لى الغدا الا انا وااااااااااااقع من الجوع النهاردة وحاسس انى ماكلتش بقالى سنتين
ام سهتانة : أسم الله عليك يأخويا – عيونى خمس دقايق وهحضر الاكل
تجهز الست ام سهتانة الطبليه وتنادى على سهتانة وهدهد اخو سهتانة الصغير  علشان يتغدوا مع بعضهم
إتلموا كلهم ع الطبليه وبيتغدوا مع بعض – بس سهتانة كالعادة سهتانة على روحها – وسرحانة ويتفكر فى موضوع المصيف اللى جت مبروكة صاحبتها قالت لها عليه دة – دار جوة عقل سهتانة الباطن التالى                                                                                               يا ترى ابويا هيوافق ؟ ولا هيرفض ؟؟؟؟ طيب لو وافق هيبقى خير وبركة – وهصيف واتدلع ع الاخر
طيب لو رفض؟؟؟؟؟؟؟؟ هتسكتى يا بت يا سهتانة ؟ ولا هيبقى ليكى موقف زى ما صاحبتك  البت مبروكة قالت لك عليه
أبو سهتانة : انتى يا بت يا سهتانة انتى سرحانة ف ايه كدة وماسة اللقمة ف ايدك دخلالك على ربع ساعة يا بت انتى يا بت .
سهتانة : ( بأضطراب شديد ) أااأااأاأأا لا يابابا مفيش حاجة انا باكل اهو ( وترمى اللقمة ف بقها )
ابو سهتانة : الله هو فى ايه وليه ؟ مالها البت مش على بعضها كدة ليه ؟
أم سهتانة : الله فى ايه يا ابو سهتانة – ماهى البت قاعدة وبتاكل اهو – وع العموم انت تاكل وهعمل لك كوباية الشاى المتينة وهكلمك ف موضوع كدة صغير هناخد رايك فيه
أبو سهتانة : موضوع ؟ موضوع ايه دة بقا ان شاء الله ؟ يكونش جى لك عريس يا بت ومكسوفة ههههههه
أم سهتانة : بتعوج بقها يمين وشمال ( حركة مصرية صميمة ) بلا نيله وقال على راى المثل الموكوس موكوس لو علقوا على راسه فانوس
سهتانة : بتبص شظرا لامها
أبو سهتانة : الحمد لله – تسلم ايدك يا ام سوسو – الشاى بقا يا حجة
ام سهتانة : صحة وعافيه على قلبك – حاضر
هدهد: اباااااااااااااااا انا هطلع بقا علشان عندى مطش كورة مع العيال صحابى
ابو سهتانة : اة اومال ايه ماهو دة اللى انت فالح فيه كورة ولعب وبس
هدهد: بكرة يا ابا تشوف الكورة اللى مش عاجباك دى – واراهنك يا ابا انى هبقى جدو التانى ان شاء الله
ابو سهتانة : ( بتريقه ) جدوووووووووهههههههه ولو عايز تهدو هات له جدوووووو
هدهد : ماشى يابا انا همشى بقا علشان الحق الماتش سلاااااااااام
أم سهتانة : انت يا واد يا هدهد ابقا هات لى كيس ملح وانت جى ياللى تتزغد .
هدهد : حاضر يا اما – سلام ياسوسو ادعى لى يا بت
سهتانة : ( فى سرها ) روح يا موكوس – ماشى يا حبيبى حاضر
ام سهتانة : قومى يا بت اغسلى المواعين على ما اقول لابوكى
سهتانة : حاضر يا اما – بس والنبى يا اما –وغلاوة النبى عندك لاتتحايلى عليه وتخليه يوافق – ماشى يا اما ؟
ام سهتانة : ربنا يستر يا بت
ام سهتانة : بقولك ايه يا حج – البت سهتانة مش عجبانى بقالها فترة كدة يا عين امها حساها زهقانة من البيت للشغل ومن الشغل للبيت –
ابو سهتانة : هااااااا وبعدين ؟
ام سهتانة : البت مبروكة صاحبتها جت لها النهاردة هنا ف البيت – وعزماها على المصيف
ابو سهتانة : عزماها على ايه ؟؟؟
ام سهتانة : ( بقلق ) ع المصيف يا حج
ابو سهتانة : عال والله قال ايه عزماها ع المصيف – وانتى يا وليه مش مكسوفة على دمك وانتى بتقولى عازماها ع المصيف ؟ انتى مش عارفة يا وليه ياللى مفيكيش مخ يعنى ايه مصيف ؟
ام سهتانة : لا عارفة يعنى بحر يا اخويا
ابو سهتانة : يعنى بحر يا اخويا ؟؟؟ ان شالله بحر يبلعك انتى وعيلتك يا ام مخ زنخ – المصيف يا وليه يعنى شباب وبنات–  يعنى تمشية بالليالى – يعنى معاكسات ومسخرة انتى عاوزة بنتك عنيها تتفتح ع المسخرة يا وليه ؟؟؟؟؟؟؟؟
ام سهتانة : لا يا اخويا – بس هى مش رايحة لوحدها دى رايحة مع صاحبتها اللى فى مقام اختها ومع عيلتها كلها كمان .
ابو سهتانة : لا معنديش بنات بيروحوا مصايف – سامعة ؟. معنديش بنات بتروح مصايف  0 قله حيا صحيح
ام سهتانة : طيب يا اخويا بلاش خلاص
طبعا سهتانة مش محتاجة تسمع الكلام من امها لان باباها ما اتوصاش وصوتة كان عالى جدا وهى سمعت كل كلمه حصلت
سهتانة L بتعيط ) هو ايه ياربى اللى بيحصل لى دة – هما ليه بيعملوا معايا كدة – بس انا مش هسكت – انا لازم ادافع عن حقى – لازم ما ابقاش سهتانة ولا سهيانه عن حقوقى تانى – انا هروح اتكلم معاه – هيحصل ايه يعنى ؟؟؟
سهتانة : يابا انا عاوزة اتكلم معاك
ابو سهتانة : تتكلمى معايا ف ايه يا هانم يا بتاعة المصايف
سهتانة : ( بعياط وشنتحة ) هو ماله المصيف يعنى يابا – حرام عليك انا زهقانة ومضايقة وانت عارف مبروكة صاحبتى كويس وعارف اهلها كلهم – والنبى يابا سايقة عليك النبى تسيبنى اروح اغير جو – انا مخنوقة وتعبانة بجد
ابو سهتانة : ومخنوقة من ايه بقا يا سهتانة الكلب مانتى بتشتغلى وسايبينك براحتك
سهتانة : انا حاسة انى مسجونة كل حاجة لا – عيب – غلط – حرام  - انا تعبت والله – انا مش زى البنات اللى ف سنى خالص – والله حرام عليكم – حرام عليكم يا ناس
ام سهتانة : طيب يا بت اهدى شوية لا تقعى من طولك – والنبى يا حج توافق
ابو سهتانة : طيب انا موافق ان سهتانة تروح المصيف بس بشرط واحد.............
ام سهتانة + سهتانة : ( فى نفس واحد ) شررررررط ؟ شرط ايه؟؟؟؟؟
                                    
                                      يتبع
Asmah Ghazal

الجمعة، 26 أغسطس، 2011

إسكندرانيه .....وأفتخر

 
بحبك يا اسكندريه
يا موجة ورمله وشمسية
يا بنت حلوة معدية
ساعة عصارى مهديا  

بحبك وانتى مخنوقة ومزحومة
فى وقت الصيف
واحبك وانتى فاضيه مهويه
بحب شايك ابو نعناع على الكورنيش
وانا بسمع اغانى الست


بحب اتمشى يوم مطرة على شطك
واشكى همومى وافضفض
بحس البحر دة  صاحبى
فاهمنى قبل ما اتكلم
وموج شطة بيبعت لى
رسايل حب ورديه
وايه يمنع ؟
عارفنى هو من يومه
بيحكى لى وجع يومه
ده يحكيلو .... ده يشكيلو
ودة ساكت
ودى... زعلانة وبتبكى
ودى.... فرحانة وبتضحك
وصوت ضحكتها صوت مسموع .


ياخطبة جمعة  فى المرسى ابو العباس
يادلايه من الزنقا .
بحب ترامك الاصفر
واحب اتمشى بالحنتور
على الكورنييش

بحبك حب مش عادى
وليا الفخر
بحبك يا اسكندرية
يا عروسة البحر

وداعا .....رمضان


وداعا .....رمضان

أراحل أنت يا شهر البركة ؟
كم سأفتقدك يا شهر المحبه .
يا شهر الخيرات .
يا شهر الرحمات .
أضأت ليالينا بمصابيح روحانياتك .
ربى هذه اعمالنا المتواضعة
فى هذا الشهر الكريم .
تقبلها وسائر أعمال المسلمين .
وأعفو عنا يأرحم الراحمين.
ومتعنا بالنظر لنور وجهك الكريم .
وبلغنا رمضان القادم
إذا كنا من الباقين .