الحلقة الرابعة ( يوميات سهتانة فى الأرياف )
سهتانة قاعدة ف الفصل بتعيط وحزينة على حالها وعلى اللى بيجرالها . كملت سهتانة الحصة بتاعتها والحمد لله مكنش عندها شغل تانى لان خلاص سهتانة كانت على اخرها يومها كله مشاكل من صباحية ربنا لحد ما خلصت شغلها
اتكلت سهتانة على اللى خالقها وروحت بيتها ودخلت على اوضتها علطول .
ام سهتانة : الله هى البت دى فيها ايه النهاردة ؟ مش عادتها يعنى تدخل كدة علطول على اوضتها ولا سلام ولا كلام – انا قلبى اتوغوش عليها – لما اقوم اشوف مالها البت دى ؟؟؟؟؟؟؟؟
بت يا سهتانة – مالك يا بت ؟
سهتانة : ماليش يا أما .مالى يعنى ؟
ام سهتانة : انا اللى بسألك مالك يا سهتانة ؟ يا بت دة انا امك . قلبى شافك قبل عينى يا ضنايا – مالك يا حبيبتى مين زعلك ؟
سهتانة : (الدموع تنزل من عنيها) – عاوزة تعرفى مين اللى مزعلنى يا اما ؟
ام سهتانة : (بقلق شديد) اة
سهتانة : الدنيا كلها مزعلانى يا أما – انا مش مرتاحة ف دنيتى دى . انا عمرى ما فرحت زى مخاليق ربنا – وحتى لو فرحت فرحتى عمرها ما بتبقى كامله . ( وتنهار سهتانة ف البكاء ) بحس اللى حواليا مستكترين عليا عيشتى – مستكترين عليا فرحتى - يا أما هو انا وحشة ؟ يعنى يعنى انا مش كويسة – ؟
أم سهتانة : لا يا اختى انتى مش وحشة وكمان انتى كويسة وزى الفل – دة انتى اطيب بت ف الدنيا يا سهتانة بتفرحى للغريب قبل القريب يا ضنايا . وبتحبى الخير للناس كلها .
سهتانة : ( مقاطعة امها ) طيب اومال بيحصل معايا كدة ليه – ( بصوت عالى ) انا تعبت يارب من حياتى ياااااااااااارب ريحنى بقا
ام سهتانة : اسم الله عليكى يا حبيبتى – هو ايه بس يا بنتى اللى حصل مانتى نازلة الصبح من هنا وكنتى زى الفل
سهتانة : زى الفل ؟ ماشى يا اما انا هغير هدومى وانام لى ساعتين .
ام سهتانة: طيب مش هتاكليلك لقمة ؟
سهتانة : لا يا اما انا هنااااااااااااااااام 0 ولما اصحى يبقى يحلها الحلال
ام سهتانة : ( تبكى ) وتطبطب على كتف سهتانة : ربنا يصلح حالك يا سهتانة يا بت بطنى .
أم سهتانة طفت النور وخرجت من اوضة سهتانة وف راسها مليون سؤال وسؤال مين اللى زعل بنتها ؟ يا ترى حد قالها كلمة زعلتها ولا وجعتها ؟ يا ترى ؟ يا ترى ؟ يا ترى ؟ كل اللى قدرت تعمله ام سهتانة انها تقعد تعيط وتحط ايدها على خدها – وتدعى ربها بانه يصلح لسهتانة حالها – ويحبب فيها خلقه حتى الحصا ف ارضة
(الباب بيخبط)
ام سهتانة : بتمسح وشها من العياط – مييييييييييييييييين
مبروكة : ايوا يا خالتى ام سهتانة انا مبروكة صاحبة سهتانة
ام سهتانة : مبروكة؟ الحمد لله اهو اعز صاحباتها جت يمكن ترفه عنها شوية وتاخد وتدى معاها ف الكلام
حاضر يا مبروكة انا جايه اهو .
اهلا يا حبيبتى ازيك وازى امك ؟ كلكم بخير ؟
مبروكة : الحمد لله يا خالتى كلنا كويسين – انتى معيطة ولا ايه يا خالتى ؟ عنيكى فيها دموع
ام سهتانة : ( بتعيط جامد اوى ) ايوة يا مبروكة سهتانة جت النهاردة من شغلها معيطة ومش عاوزة تقولى مالها يابنتى وقلقانى عليها – انا حاسة ان بنتى فيها حاجة - فى هم راكبها ومش عاوزة تقولى .
مبروكة : لا حول الله يارب- طيب انا ينفع ادخلها ولا ايه؟؟؟؟؟؟؟
ام سهتانة : اه يا اختى ادخلى لها – ربنا يصلح لكم الاحوال – وانا هدخل اعملكم كوبايتين شاى .
مبروكة : تسلمى يا خالتى . انا هدخلها وهتكلم معاها –
طيب والله دة انا كنت هقولها على خبر حلو اوى كان هيفرحها ......
ام سهتانة : خير يا حبيبتى
مبروكة : خير يا خالتى ان شاء الله
يتبع """"
Asmah Ghazal
ليست هناك تعليقات:
إرسال تعليق