اتوبيس الاحلام :)

النهارده إسكندريه كانت بتضحك على غير العاده
بعد الشغل روحت اشترى حاجات  وانا ماشيه ف الشارع حاسه الناس مختلفيين  فرحانين كده ومبسوطين
خلصت مشوارى وقررت بعد غياب دام لاكتر من 8 شهور انى اركب باص  " والله بعوده "
ركبت ف الكنبه اللى ف اخر الباص مع حالى كده  ركب مجموعة شباب وأخدوا بقية الكنبه  تأهبت انا بئا وقلت ف عقل بالى
" كويس أنا لسه شاريه جزمه جديده "
لقيت الشباب دول قعدوا وسابوا بينى وبينهم مسافه كبيره  وواحد منهم وقف وما رضييش يقعد
إبتسمت كده ولقيتنى قعدت براحتى وأطمنت
شويه بنت جت وقفت راح الشاب اللى ف الكرسى اللى قدامى قام وقف وقعدها وهو مبتسم كده وفرحان 
حسيت انى ف اتوبيس الاحلام مش ممكن ده يكون اتوبيس نقل عام أبدا 
طول الطريق وانا بقول ف بالى ليه كل شباب مصر ما يبئوش زى الشباب دول 
ايه كمية الاخلاق دى اللى عندهم
وف "سرى طوبعا " دعيت لهم ودعيت لاهلهم اللى ربوهم وللبيئه الصالحه اللى طلعوا منها
"لما تركب مواصله زحمه " اقف وقعد البنت , الست الكبيره , الراجل العجوز اللى واقفين انت لسه شباب خليك " راجل " هتكسب دعوه حلوه طالعه من القلب
لما تقعد جنب بنت ف مواصله " إحترم نفسك" واقعد كويس هتفرق معاها جدا صدقنى 
المواصلات العامه ليك وليا ولكل الناس ادى اللى حواليك مساحه وما تضايقهومش هتريح وتستريح 

سنك بيكبر ؟

البوست ده للبنات 

--------------------------
سنك بيكبر ؟
كل صاحباتك اتجوزوا واتخطبوا ومصاحبين وانتى قاعده ؟
روتين الحياه خنقك ؟
مامتك بتفكرك ع الفاضيه وع المليانه انك منوراها من زمان اوى ؟ وانك المفروض كنتى تبئى ف بيتك من سنين ؟
باباكى بيقولك نفسى اشوف ولادك قبل ما اموت ؟
زمايلك الرجاله بيلونوا عليكى ؟
جارك المتجوز بيبص لك بصه مش حلوه ؟
حاسه انك سهله ومستباحه علشان مش متجوزه ؟
عندك إحساس داخلى اوى بينك وبين نفسك انك نفسك تترمى على كتف راجل ؟ نفسك تعيطى ف حضنه ؟ نفسك تجربى كل الاحاسيس والمشاعر اللى مجربتيهاش ؟
حاسه انك من غير ضهر ولا سند ؟
حاسه ان الدنيا بتشيل وبتحط فيكى وانتى ولا اى اندهاش ؟
زهقتى ؟
يأستى ؟
جالك إحباط ؟
عارفه انك نفسك تلبسى الفستان الابيض

  وتتزفى وتتجوزى وتتهنى وتجيبى ولاد زى القمر وتربيهم احسن تربيه وتعلميهم كل اللى انتى ما اتعلمتيهوش 
بس ابوس إيدك اوعى تضعفى , اوعى ترمى نفسك ف التهلكه , اوعى تضحى بنفسك علشان لحظات يأس , اوعى تتخلى عن مبادئك علشان تريحى اللى حواليكى
إوعى تدفنى احلامك بإيدك علشان شوية كلام اهبل وشوية مشاعر مزيفه
انتى زى الفل ,
انتى مش معطوبه ,
انتى مش عانس 
انتى بس اتاخرتى علشان ربنا لسه ما ارادش
انتى بس اتاخرتى علشان لسه ما قبلتيش نصك التانى
ان شاء الله هتقابليه  ولو يا ستى ما قابلتيهوش
مش هتموتى من غير الراجل
الراجل ف حياتك يا يبئا راجل بجد وينفذ دوره اللى ربنا امره بيه يا بلاش احسن
بلاش ضل راجل ولا ضل حيطه
علشان اوقات كتير اوى بيكون ضل حيطه احسن كتير من ضل شبه راجل 

نفس الشارع

نفس الشارع نفس الناس 

حتى كمان نفس الاحساس 

لسه معشش جوه ف قلبى 

من غير سجن ولا حراس 

نفس طريقى وفيه خطاويا 

نفس دموعى رايحه وجايه 

على ايام فاتت من عمرى 

وعلى احلام راحت ببلاش

كنت ساعتها صغير لسه 

وفارد للاحلام دراعاتى 

كنت بحب البت جارتنا 

وبسهر ويا عيونها ليلاتى 

كنت بشوط الكوره تمللى 

وأجيب إجوان

كنت بليد ف الفصل شويه

وكنت بنام

كنت بموت ف العيش الصابح

من ايد امى

ومعاه جبنه وحبة الشاى

كنت بحب الصبح الطالل

من شباكى

وكنت بحب الشمس كمان

يوم ورا يوم اهو عدى عليا 

ومبئتش أحلم زى زمان 

ولا للفرحه ف قلبى مكان 

ياريتنى فضلت الواد العيل

ولا مرت بيا الأيام 

وجودك بس

وجودك بس ويايا

ولو حتى

مكنش فى ما بينا كلام

بحس براحه ويا امان

ف متسبنيش ولا ثانيه

وجودك جنبى ب الدنيا

يا اهلى وعزوتى وناسى

يا تاج محطوط على راسى

انا ب ح ب ك

فرحه :)

يفوت اليوم ورا التانى 

وانا وياك 

بعيش فرحه 

وبحلم تبئا ويايا 

وانا بفستانى والطرحه 

وتوعدنى 

تضم كفوفى بكفوفك 

عشان ما اضمنش

لا يومها ادوخ من الفرحه 

عارف انت .؟

عارف انت ؟

ساعات كتير بتعمد 

ف وسط كلامنا وهزارنا 

اكون غلسه

عشان اسمع كلام منك 

يضحكنى 

"خلاص يا اختى "

"خفيفه يا بت "

" جتك كوبا "

عارف إنت ؟

بموت م الضحك ف مكانى 

وبعد شويه مش ياما 

برد ب قلب

  

ومفييش ثانيه

ترد عليا بالتانى 

سحقا للتناقضات

(((((((بعض ))))))))الرجاله ف المجتمعات العربيه عندهم موروثات كده
بيقولك ايه ؟

1- فى بنت للصحوبيه وبنت للجواز
2- اصاحب الذكيه اللى تفهمنى بس لما اجى اتجوز اتجوز المقفله اللى على نياتها
3- البنت الجميله ما تنفعش للجواز ياعم دى هتقرفنى وتخلينى مش على بعضى
4- اصاحب وأنتم واعمل ما بدالى ووقت الجد ربنا يبارك ف الحجه هى اللى هتختارلى واحده م البلد كده على اد الايد
5- المطلقه (مستباحه )
6- العانس (اجرررررررررررى يا مجدى )


عزيزى الرجل / لحد امتى هتعيش جوه بالونة التناقضات
هو ايه اللى يمنع ان اللى تصاحبها تتجوزها ؟ مش انت اللى صاحبتها ؟ ولا صاحبة عم عبده البواب مثلا ؟

ايه مشكلتك ان انت اللى تختار ؟ ولا انت صغنون يا حيلتها ولازم امك تختارلك مراتك زى ما بتختار لك طفحك ولبسك ؟

ايه مشكلتك ؟ لو مراتك كانت ذكيه وجميله ومهذبه وبتفهمك ؟ هو انت بتعمل ايه ؟ وخايف تقطع عليك ؟

ايه مشكلتك لو قابلت البنت اللى هتخطف قلبك وتقنع عقلك تقعد على ركبتك كده وانت بتطلبها للجواز وف ايد الخاتم والايد التانيه بوكيه ورد

  وربنا الورد ما غالى واحسن من كيلو كباب 

فرقع بالونة التناقضات وعيش ف البراح كده واستخدم عقلك شويه وربنا هيصدى من قلة الاستخدام
ممكن ؟

:) الحب حلو

كل مره هترتبط فيها وما يحصلش نصيب لاى سبب ما 
ما تزعلش
وتتعقد وتكتئب وتقفل على نفسك
وتقول "ملعون ابو الحب ع اللى بيحبوا "
الحب مظلوم وملهوش دعوه 

الحب برىء
مش جايز انت اللى اخترت غلط
او جايز الطرف التانى ما يستاهلش مشاعرك الجميله
او جايز انتوا الاتنين زى الفل بس نصيبكوا مش مع بعض ؟
افتح قلبك للدنيا
وافتح قلبك للحب
الدنيا لسه مخبيالك حاجات حلوه اوى
اوانها لسه مجاش 

ركز ركز

لما تركز ف اتنين بيحبوا بعض بجد
هتحس انهم شبه بعض اوى
والشبه هنا مش بس تقاطيع وملامح
الشبه بيبئا ف الروح والتصرفات وردود الافعال
اللى بيحبوا بعض بجد لا إراديا بتلاقي
حركاتهم شبه بعض
ضحكتهم شبه بعض
نظراتهم , ابتسامتهم , تكشيرتهم .........
اللى بيحبوا بعض بجد بيبئوا واحد
بيكسروا اقوى قواعد الرياضيات ف إن (1+1=2 ) وبتبئا (1+1=1) 

اشارات ربانيه :)

هو إنت لحد إمتى هتفضل طيب وعلى نياتك كده ؟
مش تتنحرر شويه , الدنيا بتتغير من حواليك , وانت واقف محلك سر 
تقدر تقولى واحد ف سنك ده وصل لايه ؟ حققت ايه كان نفسك فيه ؟ ولا حاجه 
عارف ليه ؟ علشان انت عبيط , واللى زيك اتخلق ف الدنيا علشان الناس تستعبطه 
خلصت كلامها , ومشيت علطول ومافكرتش حتى تبصله تشوف تأثير كلامها عليه ؟ ولا رد فعله على اللى سمعه منها ايه ؟
هو ؟ فضل با صص ع الارض , متنح , متثبت ف مطرحه , مش قادر يقوم من مكانه حس إنه اتشل
الكلام اللى قالته كله مظبوط فعلا ,
مش مشكلته دلوئت اللى اتقال , مشكلته انها زعلت منه , مشكلته انه مش واخد على خصامها , طيب يراضيها ازاى ؟
طلع الموبيل من جيبه , اول رقم كان رقمها , هو غالبا مش بيكلم حد غيرها ., عنده توحد بيها , ومعاها ,
اتصل , جرس ومحدش بيرد , جرب تانى , ومع كل جرس دقات قلبه كانت بتتخانق علشان تطلع من مكانها , برضه ما ردتش
اترسم على وشه الحزن والكئابه , قام من مكانه , راح مطعم قريب م البيت , اشترى ساندوتشات , روح بيته , فتح كيس السندوتشات وافتكرها , قعد يعيط , قفل كيس الساندوتشات , ومسك موبيله تانى , كتب لها رساله
انا اسف وعلشان خاطرى ردى عليا .
وفضل ماسك الموبيل مستنى الرد , بس للاسف ماردتش عليه , النوم غلبه , نام
قام من النوم , بص ع الموبيل اللى كان حاضنه , مالقاش منها اى رد , غسل وشه واكل ساندوتش ونزل , ركب الاتوبيس علشان يروح شغله اللى لا بيحبه ولا بينجز فيه , هى وظيفه والسلام علشان يلاقى بس ياكل ويشرب ويركب
الاتوبيس كان زحمه اوى , زى كل يوم بس النهارده زحمه بزياده , ركب , علشان مضطر انه يركب علشان ما يتأخرش ع الشغل والاستاذ عبد العظيم المدير ما يخصمش منه نص يوم
نزل من الاتوبيس , وصل لمكتبه , بيحط ايده ف جيبه علشان يطلع الموبيل ملقهوش
نط من مكانه يقلب ف جيبه يمين وشمال ,. مفييش , ممكن يكون نساه ف الشقه ؟ جايز , ماهو مش مركز وتعبان ومرهق من امبارح
خلص يومه , وراح ع المطعم واشترى ساندوتشاته , وطلع جرى ع الشقه يدور ع الموبيل
ملقهووش , قلب عليه الاوضه , الموبيل ملهوش أثر
وبعدين ؟ ده مفلس وممعهوش فلوس يجيب موبيل غيره , طب وهى ؟ هيكلمها منين دلوئت ؟ هو عارف ومتاكد انها مش هترد على الارقام الغريبه
ممكن تكون دى اشاره ؟ ممكن يكون ربنا بيقوله اهدى بئا ومتكلمهاش تانى ؟ خد موقف ؟
استسلم للامر الواقع , لان مفييش ف ايده حاجه اصلا يعملها
عدى يوم ورا التانى ورا التالت , روتين حياته هو هو , مفييش فيه اى تجديد ,
النهارده راح الشغل , قاعد ملخوم ف كوم الورق اللى قدامه
سمع صوتها , معقول تكون هى ؟ ولا الحنين هو اللى عمل كده ؟
بيبص من بين الورق ع الباب , لقاها , هى , هى البنت اللى بيحبها , راحت ع المكتب بتاعه
وقالت.: انت بطلت تتصل بيا ليه ؟ مبئتش بتحبنى زى زمان ؟
بص لها وضحك
قالت|: ؟ بتضحك ليه ؟ هو انا قلت حاجه تضحك ؟
قال: ابدا , انا بس اللى افتكرت حاجه
قالت: حاجة إيه ؟
قال : ما تشغلييش بالك , بقولك ايه صحيح بتفهمى ف الاشارات ؟
قالت : إشارات ؟
قال : اه اشارات ؟ إشارات ربنا .

عن احساسك

عن إحساسك, 

لما بتفرح ,

بعد سنين ف جراح والالام ,

عن إحساسك ,

لما بإيدك ,

روحت إديت الدنيا أمان ,

عن إحساسك ,

قوم كلمنى ,

عملت إيه الدنيا ف قلبك

 

لما فرحت ,

وقلت تمام .

لما بييجى الليل

لما بييجى الليل , ويبتدى يكبس عليا النوم
بستسلم
وبمسك ف اخر شعاع امل ساكن النهارده 

 بخاف النوم يغلبنى واغمض عينى واروح ف النوم
علشان خايفه
الاحساس بالخوف من بكره احساس مميت
بيقضى على صاحبه بالبطيء
من كتر الوجع ومن كتر الالم بقيت بخاف انام بخاف اقابل بكره بأجل ميعاد المقابله لابعد وقت ممكن
لكن للاسف
بخسر
وبنام
وبقابل بكره , وبكره يجر بعده
ومش بيفضل غير دعوه واحده قبل كل لقا
#استرها من عندك يارب # وطمن قلبى

 

بتحس انك راجل ؟

بتحس انك راجل ؟
================
لما تمد ايدك وتخطف لمسه ؟ بتحس انك راجل ؟
لما تاخد حاجه مش من حقك ؟ بتحس انك راجل ؟
لما تفكر بنصك اللى تحت ؟ بتحس انك راجل ؟
على فكره الحيوانات بس هى اللى مش بتتحكم ف غرايزها
لو انت شايف انك حيوان ده شىء تانى
لكن الانثى عمرها ما هتكونلك فريسه

احترم نفسك واسترجل

يا رب يا ربنا :)

يارب يا ربنا 
أنا مش عاوزه اتخطب لواد موز وامور وحليوه كدهون وطول وعرض فشر كريم ومهند , ويحبنى ويقدرنى ويحطنى جوه عنيه ويشيلنى من ع الارض شيل
علشان اغيظ صاحباتى البنات 

ولا علشان اخرج وانا قافشه ف دراعه واتغندر بيه قدام البنات ف الشارع
ولا علشان تجيللى هدايا عمال على بطال
ولا علشان اكتب ع الفيس بوك got engagement
ولا علشان اغير صورة البروفايل واحط ايدينا بالدبل وكدهون
ولا علشان كل يوم والتانى انزل صورنا إشى بناكل , إشى بنجرى ,إشى ع الكورنيش ,وبوزات كتشيييييييييير جوه مخيلتى
ولا علشان كل شويه انزل بوست مليان قلوب وعصافير وكتاكيت
ولا علشان اقهر البت الغلاويه اياها اللى غاظتنى لما اتخطبت وانا كنت قاعده شبه سبت الطماطم

 
لا خالص ياربى انت عارف أنا اد ايه طيبه وحلوه واموره ومسمسمه واتحط ع الجرح يبرد ^_* وعمرى ما فكرت ف نفسى
انا بس عاوزه اتخطب علشان افرح مامتشى حبيبتشى بئا وأمرى لله

يارب زيدنى تواضع وفرح امى قريب بئا ومش مهم انا خالث ^_*

وانا معاك :)

ولما بكون حبيبى معاك ,

بحس بإنى بنت صغيره لسه ,

يا دوب فاكه ضفايرها ,

وحاضنه الدنيا بكفوفها ,

ولما ببص ف عيونك ,

أنا بشبع ,

ف حضن عنيك 

أنا بدفا,

وبتكلفت بننى عنيك ,

وبستكفا ,

وأنا وياك ,

بستقوى على الأيام ,

وعمايلها ,

وبطمن عشان جنبك ,

يأجمل حاجه حصلت لى ,

أنا بهواك ,

وبتمنى أعيش جنبك ,

بقية عمرى ,

وبرضه عمرى ما أستكفى 

تلاكيك

هو فى أحلى من التلكيك ؟
تلاقى الكلام يحلو والاسئله تكتر والدردشه تبئا على قلبك زى العسل
تلاقيك مهتم بالتفاصيل
فرحان ومبتسم طول الوقت
حاسس بدفى كده من كتر الإنبساط
تحسك كده بتتغير وتقول لنفسك علطول ( ايه ده ؟ انا مش فاهمنى ؟)
لما تلاقى نفسك مش فاهمك
ولما تلاقى نفسك مستغربك
اجرى افتح قلبك

   الحب ع الباب بيخبط  

راجل بجد :)

) إزيك ؟
إنتى فين ؟
اخدتى الدوا ؟
لما تروحى طمنينى
لبستى جاكت النهارده علشان الجو برد ؟
وحشتينى
هتروحى فين بعد الشغل ؟؟
لو سمحتى ما تتأخريش بره
انا مش قلت لك 100 مره ما تلبسيش البنطلون ده ؟
انا داخل مينج بس لو احتجتينى ابعتيلى مسدج

 

حاجات ف حياة كل بنت بتحسسها انها موجوده 
وجود الراجل ف حياة اى بنت مهم فعلا
بس يكون راجل بجد مش اى حماده بالبتنجان ^_*

اجابات :) مش هتريحك

فى اشخاص كده ف حياتنا
صورهم مش بتفارقنا بتاتا 
بتفضل محفوره رغم الفراق
وتعدى الايام والشهور وممكن كمان السنين
ولسه فاكرينهم برضه
وف مره كده من ضمن المرات نسأل روحنا
ياترى ؟ هما كمان فاكرينا كده ؟ ولا خلاص ما عدناش فارقين ؟
ف الحنين  مش محتاج تدور على اجابات قاطعه على اسئلتك
لانهاغالبا بتبئا من غير اجابه
او اجابتها مش هتريحك

مبقتش تفرح ؟

عارف بئا ؟
انت ليه ما بقتش بتحس الحاجات زى زمان ؟
ولا بقيت تفرح اوى
ولا تزعل اوى
بتعمل كل الحاجات بس مش من قلبك
علشان بمنتهى البساطه اتوجعت بما فيه الكفايه
لدرجة ان قلبك استسلم وقالك "مش لاعب " انت بهدلتنى معاك وانا مش مستحمل
عاجبك كده ؟
فرحان بالحاله اللى وصلتلها ؟
قوم حالا طبطب على قلبك واعزمه على حاجه حلوه من اللى كان بيحبها زمان
" ضحكه برئيه"
"لمة اصحاب "
"خروجه حلوه "
" تمشيه ع البحر "
صالحه وقوله انك "اسف"
قوله انك مكنتش تقصد اللى عملته معاه
هيسامحك صدقنى وهيديلك الامان تانى
وهيرجع يدق تانى لما يشوف البنت الحلوه ام ضفاير
او الواد ابن الجيران بتاع زمان
بس انت قوم طبطب عليه وراضيه

  

حاله كده :)

حاله كده , 

ما اعرفش فيها بحس ايه ؟

ولا فى اجابه لاسئله 

كل اللى انا اقدر اقوله 

انى معاك " مطمنه " 

عايشه حياتى مسلمه 

وسايبه روحى "للسما "

:( بنوته بتصعب عليا

اكتر بنت بتصعب عليا 
تبئا عروسه ولابسه فستان ابيض حلو اوى وكوشه تحفه وفرح عال العال
بس مش ده العريس اللى كانت عاوزاه  ولا اللى كانت بتحلم تكمل معاه حياتها 
وتكتشف انها اضطرت تحت ظرف من الظروف انها تتجوز الاخ ده
انا مش بلومها ولا بزعل منها , عارفين ليه ؟
لان ببساطه كل بنى ادم مننا له طاقه اللى ربنا خالقه بيها واللى مش هيعرف يشيل اتقل منها علشان هيتوجع 
البنت دى بتموت 

 من جوه وبتبتسم من بره
يا عالم هتعرف تعييش معاه ولا لأ؟
يا عالم هتقدر تكمل ؟
بس الاكيد ان هو كمان ملهوش اى ذنب انه مش فتى أحلامها
هى ما ظلمتش نفسها وبس هى ظلمته هو كمان على فكره
وتحت مبدأ اتجوزى قبل ما تعنسى علشان تشوفيلك حتة عيل
ياما بيوت اتبنت من بره حلو اوى ومن جوه مش ساكنها غير البرد والتبلد طول الوقت
ابنوا بيوتكوا من جوه مش من بره بس
ابنوها بالدفى والحب والموده والرحمه اللى ربنا قال عليهم
علشان ترتاحوا وتقدروا تكملوا

 

ايوه انا البنت

أيوه أنا البنت اللى تعرف طوب الارض
بس اخر الليل وهى داخله تنام بتعيط على مخدتها علشان خايفه من الوحده بعد ما فارقت اغلى الناس
ايوه انا البنت اللى ب 100 راجل
بس ف المواقف اللى بجد وبحق وحقيقى بتكش ف جلدها وبتترعش وما بتعرفش تتصرف
ايوه انا البنت اللى بيتقال عليها ان قلبها جامد
بس بينها وبين نفسها هتموت وتتحب , هتتموت وتعيط ف حضن راجل ,
ايوه انا البنت اللى بيفكروها تقيله ومابتشتكيش
بس هى مع روحها كده بتتمنى تقابل الراجل اللى ترمى حمولها عليه وهى مطمنه , وتترمى على كتفه وتنام وترتاح
ايوه انا البنت اللى بدافع عن المرأه وحقوقها المهضومه من الرجاله
بس بعد ما بتخلص كتابة اخر المقال بتقول بينها وبين ربها
يارب بئا ارزقنى الزوج الصالح اللى يعوضنى ويكون لى اب واخ وحبيب وزوج
ايوه انا البنت اللى من براها حاجه بس من جواها حاجه تانيه خالص
اغلب م الغلب وبتتشعبط ف الفرح زى العيال الصغيره
ايوه انا البنت دى