الجمعة، 14 ديسمبر، 2012

على فكره - انا مش البنت المثاليه





على فكره
انا مش البنت المثاليه
ولا انا
اللى بتمشى توزع ابتسامات على طوب الارض
بالعكس تماما
ده انا اغلب م الغلب
فرحتى مش كامله تمللى
ده الفرض بأنى فرحت
قلبى بوسع العالم واكتر
بس ما بيساعنيش
اوقات الوحده بتقتلنى
مع انى بكون ف الزحمه
بحب احساس الحب
بس محبتش
او بالاحرى
لسه ما طبتش بجد
انا بحب عيلتى اوى
وبحب اصحابى
وقطتى :)
بحب اضحك ف وش الناس الغلابه اللى فالشارع
والراجل اللى بيلم الزباله
وساعات بشوط الكورة لو جت تحت رجلى
والعيال بيلعبوا ف الشارع
وبجيب جون
الحياه مش سهله زى ما كنت فاكره
بالعكس
هى الناس بتتغير ليه
تلاقيه كان اخوك ومره واحده بخ
وليه الناس بتوعد وما بتوفيش
وليه بيكدبوا
يكونش عشان احنا بنى ادمين
فاستغلوا الموضوع غلط
جايز
بيقولوا عليا البت الجدعه
اللى ب 100 راجل
انا مش بزعل على فكره
بالعكس
انا عارفه ان انا مش بنت زى كل البنات
اللى بتفك ضفايرها
وتسيب شعرها للهوا
انا عاملة شعرى كحكه وقامطاها اوى
انا بضحك وبهزر بس غالبا مش من قلبى
نفسى اركب مورجيحه مع اصحابى
والهوا يزغزغنى لحد ماافطس م الضحك
وممكن اموت وانا بضحك
ما يهمنيش المهم اضحك
انا بحب اوى اكل شوكولاته وايس كريم
بس الدكتور قال انهم بيتخنوا
ومش عارفه اسمع كلامه
ولا اكلهم ؟
بحب المطره وانا بتمشى ع البحر
وهى نازله على وشى
بحس انى باخدها بالحضن
الاتوبيس بيكون زحمه
فمش بركبه
مع انه هيوصلنى بسرعه
فبضطر اخد تاكس
مش كل حاجه بعوزها بجيبها
ساعات بعاقب نفسى
لما بتغلط
واوقات باكفئها واديها حتة شيكولاته
وكتاب
بحب القرايه وبحب الكتابه
بس الاكتر بحب الاحساس
بتفرج ع الافلام ف التليفزيون
مبحبش اخش السيما
عشان ابويا قالى السيما حرام
انا بصلى وبحب ربنا
وبتكلم معاه من قلبى
وبحس بيه وهو بيطبطب عليا
مشتاقة اوى لحضن ابويا
عشان اترمى فيه واعيط
واشكيله من الدنيا وعاميلها
القصد
انى مش البنت المثاليه
بالعكس تماما
ده انا اغلب م الغلب

الخميس، 30 أغسطس، 2012

أنا التايه



(1)          أنا التايه
وأنا المغصوب على أمرى ,
أنا العايش ومش عايش ,
ف ملكوتك .

(2)          أنا المجروح
وأنا اللى بعيش ف أيامك ,
حلاوة روح ,
ومش عاجبه أساليبك ,
ورافض أى قول أو بوح .

(3) أنا العاصى
وأنا اللى كفرت بقانونك ,
وأنا اللى إيمانى بسيادتك ,
ف وقت الجد ,
ما بحسوش .

(4) أنا المرفوض
وأنا المجبور على الطاعه ,
وقولة الأه ,
تقولى يمين أقول حاضر,
تقولى شمال أقول طيب .

(5)          أنا الساكت
وأنا الراضى ببلاويكى ,
عشان طمعان ,
ف حبة نور ,
يجونى من معاليكى .

(6)          أنا العشمان
وأنا الطمعان ف بلة ريق ,
وقشايه,
عشان أعبر بحور يأسك ,
بحلم غريق.

الثلاثاء، 7 أغسطس، 2012

لحد إمتى يا بلد ؟


 
                                           للزعلانين    
على دم سال ,
من عسكرى واقف حراسة ع الحدود ,
و الأحتمال ,
إن العدو هو اللى قتله ,
لجل أما يحرق قلب بلده ,
وقلب أهله كمان عليه ,
 
طب واللى مات ؟
جوه الميدان ؟
أخبارة إيه ؟
 
هو صحيح ما ماتش واقف ع الحدود ,
بس الأكيد إنه اتقتل على إيد أخوه ,
يوم ما حلم ,
ومات عشان حبة أمل ,
ببكرة أحلى ,
 
لحد إمتى يا بلد,
 راح تسكتى ؟
أخرك كلام ,
ريحة البرود ويا النطاعه مهفهفه ,
من حلق كل المسئولين ,
اللى عليكى مكوشين ,
ومطنشين ,
 
انا بوعدك ,
حقك هيرجع من جديد ,
طول ما شبابك المخلصين ,
وياالإرادة متسلحيين .
 
 

الاثنين، 6 أغسطس، 2012

الشبوكشى والحقيقة المرة




مين هو الشبوكشى ؟؟؟؟؟؟؟؟
الشبوكشى ده شاب زى شباب كتيييييييييييييييير موجودين فى مصر . اتعلم فى مصر .اكل من خير مصر . شرب من نيل مصر .
اذن نقدر نوصل لحقيقة واضحة وصريحة الا وهى ان الشبوكشى شاب مصرى
اتخرج الشبوكشى من جامعته ومعاه كل شلته وكالعادة وبكل سعادة ملقاش شغل
بقت شغلته الوحيدة يتلطع على القهاوى. ويلعب كورة فى الشارع و  و  و  و
ــــــــــــــــــــــــــــــــــــــــــــــــــــــــــــــــــــــــــــــــــــــــ
وفى يوم من الايام كان قاعد الشبوكشى مع واحد صاحبه على القهوة وحصل التالى .
ـــــــــــــــــــــــــــــــــــــــــــــــــــــــــــــــــــــــ
حمزة ( صاحب الشبوكشى الانتيخ ): انا خلاص يا خويا يا شبوكشى زهقت بقى ولازم نلاقى حل .
الشبوكشى : ايدى على كتفك
حمزة :الواد رمضان ابن عمتى كلمنى امبارح وقالى مكتب سفريات كده فى وسط البلد وبيقولى انه كويس ورخيص وحط يا شبوكشى يا خويا على رخيص دى ميه خط , ماهو على راى المثل ,على اد لحافك مد رجليك .
الشبوكشى : مظبوط يا حمزة . طيب على خيرة الله  شوف مواعيدك ونروح نبص بصة ان شاء الله .
حمزة :  خلاص على البركة اتفقنا
ــــــــــــــــــــــــــــــــــــــــــــــــــــــــــــــــــ
قام الشبوكشى من على القهوة وهو فرحان وزعلان فى نفس الوقت . فرحان علشان يمكن بالسفرية دى ربنا يسهله حاله اللى واقف زى كتير من اللى زيه . وزعلان علشان الغربة  ما هو اصل الشبوكشى متغربش قبل كده ولا فارق اهله ولا حتته ولا اصحابه .
ازاى يعدى عليه صباح مش زى الصباح الجميل اللى مامته بتصبحه عليه كل يوم ولا دعواتها اللى زى السكر وكلها تفاؤل ببكرة اللى محدش عارف هيحصل فيه ايه ؟
ـــــــــــــــــــــــــــــــــــــــــــــــــــــ
وفى صباح اليوم التالى كلم حمزة الشبوكشى علشان هو حدد ميعاد يروحوا فيه مكتب السفريات . وراحو المكتب وهناك حصل الاتى. –
ــــــــــــــــــــــــــــــــــــــــــــــــــــــــــــ
الشبوكشى : اش اش ايه ده كله يا واد يا حمزة ؟ بسم الله ما شاء الله .
حمزة :اه يا عم  ما هو كل الديكورات والهيلمنات دى بيطلعوها على جتتنا .
الشبوكشى : اه صحيح عندك حق .طيب يلا بينا بس وربنا يسهل
الشبوكشى ( للسكرتيرة ) : السلام عليكم .
السكرتيرة : وعليكم السلام ورحمه الله وبركاته .
الشبوكشى يميل على حمزه صاحبه . يا سلااااااااااااااااام بص يا ض يا حمزة النور اللى بيطل من وشها  بسم الله ما شاء الله المكتب ده بركة وربنا هيكرمنا ان شاء الله .
حمزة – ان شاء الله .
السكرتيرة : أؤمرنى يا فندم انا تحت امرك . اقدر اساعد حضرتك فى ايه ؟
الشبوكشى : مايؤمرش عليكة ظالم يا غالية . انا جيت انا وصاحبى علشان عاوزين نسافران شاء الله ونشتغل وربنا يكرمنا .
السكرتيرة . تمام .  ان شاء الله   اتفضلوا الاستمارات دى تملوها . وتتفضلوا تستريحوا فى الريسبشن اللى هناك ده
حمزة :حاضر
ـــــــــــــــــــــــــــــــــــــــــــــــــــــــــــــــــــــــ
راح حمزة والشبوكشى فى الريسبشن وملو الاستمارات وقعدوا مستنين وسط ناس كتيرموجودين وعدى ساعة فى التانية قلق الشبوكشى وحمزة . قام الشبوكشى للسكرتيرة اللى وشها كله بركة علشان يسالها هما قاعدين كل ده ليه ؟
ــــــــــــــــــــــــــــــــــــــــــــــــــــــــ
الشبوكشى :لو وسمحتى يا ست الكل احنا قاعدين من ساعتين ومحدش جالنا ولا قابلنا حد ولا شوفنا حد
السكرتيرة : الصبر يا استاذ شبوكشى . ان الله مع الصابرين .
الشبوكشى : اذا صبروا يا ستى . وهو احنا هنصبر على ايه ولا ايه ؟ دى عيشتنا كلها ماشية بالصبر وعلى ما تفرج .
السكرتيرة : معلش معلش حضرتك شايف الزحمة وشايف الاقبال ماشاء الله . وكله بالدور . وكله فى ميعاده .
الشبوكشى : ميعاده ؟ طيب لما نصبر ونشوف اخره الصبر ده ايه ؟
السكرتيرة : خير ان شاء الله . اخرته خير
ـــــــــــــــــــــــــــــــــــــــــــــــــــــــــــ
راح الشبوكشى لحمزه وحكى له اللى حصل مع السكرتيرة قاله حمزة اصبر يا شبوكشى يعنى  احنا ورانا الديوان يا خى .
وصبروا كالعادة لحد ما جه  ميعاد مقابلتهم .
ونادى الساعى على اسم الشبوكشى .
ــــــــــــــــــــــــــــــــــــــــــــــــــــــ
الساعى : الشبوكشى عبد النبى
الشبوكشى : ايوه
الساعى : هات الاستمارة بتاعتك واتفضل عند البه المدير
الشببوكشى : طيب حاضر
ـــــــــــــــــــــــــــــــــــــــــــــــــــــــــــــــ
دخل الشبوكشى يقابل المدير
ــــــــــــــــــــــــــــــــــــــــــــــــــــــــــــــ
الشبوكشى :السلام عليكم
المدير : اتفضل يا شبوكشى استريح عاوز تسافر فين ؟
الشبوكشى: اى مكان بس المهم انى اسافر
المدير : اى مكان ؟ اى مكان ؟
الشبوكشى ؟ اه اى مكان , اى مكان
المدير : تمام . بتتكلم لغات ايه يا شبوكشى ؟
الشبوكشى : عربى والحمد لله على كده
المدير: والكمبيوتر يا شبوكشى ؟
الشبوكشى . مااعرفش عنه حاجة خاااااااااااااااااااالص .
المدير : بسيطة ان شاء الله ومحلوله
الشبوكشى : طيب انا هسافر فين ؟ وامتى ؟
المدير : انت هتسافر السعودية يا شبوكشى . هتشتغل هناك فى شركة كبببببببببببببيرة لتصنيع العطور . والموضوع بسيط ان شاء الله .
الشبوكشى : ان شاء الله والمطلوب ؟
المدير : ولا حاجة يا ابنى احنا بنحب نساعد الشباب
الشبوكشى : ااااااااايه ؟ ولا حاجة ازاى ؟ يعنى انا مش هدفع فلوس ؟
المدير : لا يا شبوكشى احنا هنساعدك لحد ما تستفر وانت هتردلنا الفلوس دى بعد ما تشتغل وربنا يكرمك . وده واجب علينا يا بنى .
الشبوكشى :ربنا يخليك يا بيه وما يحرمش الشباب من حنيه قلوبكم علينا .
المدير : تحت امرك يا شبوكشى يا بنى شرفتنى يا بنى . تجهز نفسك وتشوف انت عاوز تسافر امتى وانا فى انتظارك على طول . اتفقنا ؟.
الشبوكشى: اتفقنا
ــــــــــــــــــــــــــــــــــــــــــــــــــــــــــــــــــــــــــــــــــــ
خرج الشبوكشى من عند المدير ودخل حمزة وتقريبا نفس اللى حصل مع الشبوكشى هو هو اللى حصل مع حمزة .
خرجوا الاتنين من مكتب السفريات طايرين من السعادة الدنيا فى عينيهم بمبى والفراشات اللى بتطير حواليهم بمبى . العربيات اللى فى الشارع بمبى بمبى بمبى
سواق الميكروباص اللى معدى جنبهم مشغل اغنية سعاد حسنى الحياه بقى لونها بمبى .
روحو الاتنين وحكوا لاهاليهم . ونفس اللى حصل للشبوكشى وحمزة . حصل لاهاليهم هما الاتنين .
جهز الشبوكشى وحمزة نفسهم واستعدوا للسفر.
ـــــــــــــــــــــــــــــــــــــــــــــــــــــــــــــــــــــــــــ
يا سلااااااااااااااااااام اخيرا كل احلامهم هتتحقق . وهيبقى معاهم فلوس كتير . وهيقدروا يسفروا امهاتهم الحج . ويعالجوا ابهاتهم . ويساعدوا فى جواز اخواتهم البنات . ويشتروا شقق ويفرشوها علشان يتجوزوا فيها . ويشتروا عربيات كمان نص عمر ؟ معلش دلوقتى نص عمر بس كمان شويه هتبقى اخر موديل . ويعملو المشاريع اللى كان نفسهم فيها . اخيرا هيبقوا على وش الدنيا ويعوموا على وش الفتة .

وفجأأأأأأأأأأأأأأأأأأأأأأأأأأأأأأأأأأأأأأأأأأأأأأأة
يقع الشبوكشى من على السرير وهو بيحلم احلى حلم ليه فى الدنيا كلها .
لا ومش بس بيقع على السرير لا ده كمان بيصحى على صوت ست الحبايب وهى بتحدفه بوابل من افظع الشتايم اللى كالعادة بتوبخه على قعدته جنبها زى البنت البايرة اللى ما فيش منها منفعة . واخر كلمة تدخل ودن الشبوكشى .
قوم يا زفت يالى اسمك شبوكشى علشان تدور لك على شغلانه بدل ما انت قاعد فى البيت زى الجردل .
وهنا أيقن الشبوكشى انه كان بيحلم . وانه خلاص حلمه خلص . وقام وصحى وفتح عينه على الواقع . على الحقيقة . ومش اى حقيقة دى الحقيقة المرة .

الثلاثاء، 31 يوليو، 2012

 كحكايتى ومنقوش عليها إسمى .

وحشتنى أيام زمان  ونفسى ارجع عيله صغيره تانى  
انا فاكرة انى زمان كنت بزعل اوى لما حد يقولى انى عيله
و فاكرة كمان اد ايه كان نفسى اكبر وابقى بنوتة وامشى واتعاكس فى الشارع .
يا سلااااااااااام أد ايه كانت ايام جميله .
كانت البراءة ماليا عنيا  والضحكة الصافيه تطلع من قلبى ترج السما وتغير لون الدنيا  
انا فاكرة كويس اوى لمتنا واحنا بنعمل كحك العيد .
وكان لازم يتعمل كحكايه بأسمى وانا اللى انقشها بأيدى الصغيرة
 وتطلع بايظة وملهاش شكل بس كانت بتبقى احلى من طعم  الشهد فى بقى .
انا فاكرة لما كنت اجرى انا والعيال وأحنا شايلين الصاجات ونستنى فى المخبز لغايه الفجر .
كنت ببقى مبسوطة اوى انى حسهر مع العيال فى الشارع وهنلعب طول الليل .
حاجات كتير اوى فى حياتنا اتغير طعمها .
وحتى لو فضلنا نعملها عمرها ما بتطلع بحلاوة لما كنا بنعملها واحنا عيال صغيرين  .
يا سلاااااااااااااااااااااام لو كان يطلع لى جنى ويجى لحد منى ويسألنى تتمنى إيه ؟
اكيد هتكون اول امنيه انى ارجع تانى عيله صغيره
انى ارجع تانى لايام زمان .
بجد وحشتينى اوى يا أيام زمان

السبت، 28 يوليو، 2012

طنش وهييس هتعيش كويس


 مش كل حاجة ف دنيتك ,
بتفوت عليك ,
لازم تحس إنك فاهمها ,
أوقات كتير ,
هتلاقى إن المفهوميه دى ,
مرض ,
إنك تعيش وسط البشر ,
زى الملاك ,
مش جدعنة ,
خليك بشر ,
حاول تنافق زيهم ,
إكدب وغش ,
بدل ف يومك 1000 وش ,
خلى شعارك ف الحياة ,
طنش وهييس ,
هتعييش كويس ,
أما الملايكة,
سيبهم ف حالهم ,
دول مبسوطين فوق ف السما ,
عمرك سمعت عن ملاك ؟
ساب السما وعاش هنا ؟
وسط البشر ؟
شوف يا عزيزى ,
كبر دماغك ,
وعيشها إيزى ,
صدقنى كله راح يبئا فل ,
وهتعيش حياتك ف اللذيذ .

السعادة



هو إيه معنى السعادة ؟
السعادة مش هدوم متروقه ,
ولا ضحكة صوتها طالع ,
من شفايف بت حلوة مزوقه ,
ولا ديك رومى مكتف ,
تاكله سخن,
 بعد يوم طويل شقا ,
السعادة ف الرضا ,
اللى هو م العبادة ,
السعادة يعنى إيد ,
مدا روحها لجل تمسح ,
دمع طفل مش سعيد ,
السعادة يعنى باب ,
تفتحه ف وش الخلايق ,
يفرحوا,
السعادة يعنى لقمة صغيرة
نازلة جوفك بالهنا ,
السعادة يعنى نومة تكون هنية ,
حاضنة راحة البال عشان
تدارى رقعة ف جلابية ,
السعادة يعنى سجدة ,
تدعى فيها ربنا ,
السعادة يعنى دعوة ,
طالعة دوغرى للسما ,
السعادة مش حاجة واحدة ,
السعادة حاجات كتير ,
السعادة ساكنة قلبك ,
نور
ومش محتاج دليل.

الأحد، 15 يوليو، 2012

أنا مش مذنبة



أنا كل ذنبى ف الحياه إنى مش متجوزة ,
 أأأأأأأأأأأأأأأيون مستغربين ليه ؟
اللى بيحصلى كتير , مش حاجة واحدة وبس ,
 اللى بيحصل إنى حاسه انى نص بنى أدم بما انى ما تجوزتش ,
اللى بيحصل انى حاسه انى ناقصة علشان مالقيتش الراجل اللى يكملنى ,
اللى بيحصل انى حاسه انى كافره  علشان مكملتش نص دينى ,
اللى بيحصل إنى حاسه أنى صفر ع الشمال من غير وقفة راجل جنبى ,
اللى بيحصل كتير وكتير ,
انا مش قادرة استحمل فكرة انى لازم اتجوز علشان أقدر اكون كيان مستقل بذاته ,
مش قادرة استحمل فكرة انى اتعامل على انى مذنبه , بس علشان مش متجوزة ,
مش قادرة أستحمل فكرة انى متهمة انى ارتكبت خطيئة او إرتكبت جرم علشان انا لسه أنسة أو بمعنى ادق عانس وما اتجوزتش ,
هو أنا ليه أستحمل كلام  مدام إعتماد جارتنا ؟ أو أستاذ لمعى مديرى ف الشغل ؟
أو البت زينب بنت طنط سناء صاحبة ماما  اللى اتجوزت اول ما خلصت الدبلون ؟
وكمان ليه أستحمل بصاتهم ؟
أو تلميحاتهم , أو اتهاماتهم  ,  أو سخافاتهم أو أو أو ............... ؟
انا مش مضطرة انى اتجوز علشان اثبت للناس انى كويسه , وحلوة , والف من يتمنانى , لا خالص على فكرة يا جماعة
انا مش مضطرة اتجوز علشان اثبت انى معنديش مشكلة ومش معطوبة , ولا حمضانة ولا معيوبه لاسمح الله ,
المشكلة مش فيا والله , المشكلة ف مجتمع متخلف اتعود دايما انه يتعامل مع اى كيان انثوى على إنه تابع , على انه دايما محتاج مكمل ,
 انا تقريبا مشكلتى بتنحصر ف  انى لحد دلوئتى ما قابلتش الراجل اللى بتمنى انى أكمل حياتى معاه ,
لحد دلوئتى ما قابلتش الراجل اللى بحلم بيه ,
انا مش هرضيهم على حساب نفسى ,
ولا اجى على نفسى علشان خاطر حد ,
انا كده , ومش هتغير , ومش هوافق ابدا انى اكون بطلة حدوتة سخيفة بتخلص بصورة سمجة بتتلخص ف برواز متعلق على حيطة جوا صالون وانا لابسة الفستان الابيض وجنبى سبع البرومبة
انا مش هقبل على نفسى ابدا إنى اقتنع بالقول الفلكلورى المصرى بتاع  ضل راجل ولا ضل حيطة ,لان ساعات كتيرأووووى بيكون ضل الحيطة احسن وافضل مليووووووون مرة من ضل راجل مفيش من وراة منفعة ,
من ضل راجل بتاع مصلحته ,
من ضل راجل انانى همجى باصص لجسمى من بره ومش شايفنى من جوه ,
من ضل راجل بيتعامل معايا على انى سلعة رخيصة , راح اشتراها علشان يحطها ف بيتة تربى له عياله , ويدور هو بره على حل شعره
من ضل راجل متطفل يقبل يعيش عالة عليا واشتغل انا واصرف عليه وعلى عياله ,
من ضل راجل كداب , غبى , عينه زايغة  و و و و و ................
من ضل اى راجل بس من برة , لكن من جواه لا يمت للرجولة بصلة
أنا مش بعمم ولا بتكلم على ان كل النماذج اللى زى الزفت دى اللى انا قلتها هى كل الرجالة
لا خالص على فكرة , علشان بس انا عارفة رأى الرجالة هيكون إيه ؟ وإيه نوعية الشتايم والالقاب اللى هينعتونى بيها لمجرد إنى إتجرأت ووصفت بعض منهم بالأوصاف دى
أنا اصلا بكره نظرية التعميم وزى ما فى راجل وحش أكيد فى راجل كويس
ونفس الكلام للبنات برضه ولاى حاجة ولكل حاجة على وش الارض.فى الكويس وفى الوحش.( ده بس للتوضيح ليا إلا )
الموضوع بمنتهى البساطة  إنى مش هتجوز غير الراجل اللى يملا عينى وقلبى وكل حواسى كمان ,
الراجل اللى يحبنى واحبه , الراجل اللى يعاملنى على انى اميرة علشان اخلية تاج على راسى
الراجل اللى هيكون كل اهلى وناسى واكون انا كل عيلته ودنيته
الراجل اللى احس معاه بالامان لمجرد بس ان اسمى اقترن بأسمه فى قسيمة الجواز
ولو ما لئيتش الراجل ده , يبئا قلة الجواز احسن
واللى عاجبة اهلا وسهلا , واللى مش عاجبة إن شالله ما عجبه
ويقدر بمنتهى البساطة يخبط دماغة ف الحيط , يمكن لما يخبط دماغة يفوق ويحس بذنبه , على انه بيتهم برىء قبل ما تثبت إدانته .

عبد الموجود موجود




انا سعاد عندى 38 سنة , خريجة كلية تجارة جامعة القاهرة , بشتغل محاسبة فى شركة
 مقاولات واستشارات هندسية , متجوزة من 10سنين , ساكنة فى شبرا ,جوزى يبقى
 الاستاذ عبد الموجود بيشتغل مدرس رياضة فى مدرسة البحر المتوسط الاعدادية للبنين ,
عندى مايا عندها 8 سنين , محمد 7 سنين , والعفريتة الصغيرة هنا عندها 4 سنين ,
حياتى عادية خالص زيى زى اى ست مصرية , يعنى ممكن اقول من البيت للشغل
ومن الشغل للبيت ,بصحى الصبح بدرى اوى, ماهو يا دوب على  ما اصحى الولاد
 وأشطفهم  واحضر الفطار وافطرهم  وينزل عبد الموجود  على شغله , واستنى لغاية
 ما يجى اتوبيس المدرسة وينزل محمد ومايا واطمن عليهم , واخد العفريتة الصغيرة 
هنا واطلع على مامتى هى مش ساكنة بعيد يعنى بينى وبينها محطتين بالمترو ,
 وانزل انا اروح على شغلى , ياااااااه انا بيتهيألى ان اليوم كده خلص مش لسة هيبتدى؟
طول اليوم عايشة ومستوطنة مع الارقام والحسابات والقيود والدفاتر , الكل بيشكر فيا
وفى شغلى كمان , الحمد لله ماهو الواحد مننا مش اكتر من سيرة , اخلص شغلى
واطلع جرى على بيت ماما اخد الولاد من هناك ,ماهو اتوبيس مايا ومحمد بياخدهم
من عندى ويروحهم عند بيت ماما , اشترى الغدا واحنا مروحين , واللى غالبا بيتمثل
 فى اى حاجة خفيفة من اقرب سوبر ماركت بقابله وانا مروحة , وفى الغالب بيكون
 سلمون وتونة اصل عبد الموجود بيحب اوى السلمون مع البطاطس المحمرة ,
واروح يادوب اغير للولاد ويتشطفوا واجهز السفرة الساعة 5 بالظبط  نسمع صوت
المفتاح فى الباب وعبد الموجود يدخل بأبتسامته الصفراااااااااا: مساء الخير يا ولاد
يردوا عليه كانهم لسه ف المدرسة : مسااااااااااااء الخييييييييييير يا بابا .
مليون مرة انبهه انى ببئا قاعده معاهم على السفرة مستنياه ,يعنى ممكن يقول
مساء الخير يا سعاد , ولا بلاش,  يقول مساء الخير وبس لكن مفيش فايدة كل ما افكره
 الاقية بيقولى يووووووووووووه اما انتم يا ستات بتيجوا فى الهايفة وتتصدروا .
فخلاص ما بئتش اقوله على حاجة تانى ,مش علشان انا مش عاوزة اقول ولا مكسلة
لا سمح الله ,لا ابدا , ده بيبقى علشان انا زهقت , او بمعنى ادق واوضح اتعودت خلاص
ما هو ما ينفعش بعد 10 سنين جواز اقعد اهاتى من قلبى والرد هو هو , والاسلوب هو هو
بيدخل عبد الموجود يغير ويغسل ايده , ونتغدى ,ونشرب الشاى ,ويبتدى عبد الموجود
يتابع البرنامج الشهير  الوحيد اللى مش عارفة ليه التليفزيون المصرى العبقرى مالغاهوش
فجأة زيه زى غيرة كتير من البرامج (الكورة فى مصر )  , مدة البرنامج ساعة ونص
 بالمظبوط ,يخلص البرنامج يمسك فى الجرايد , وبعدها يدخل ينام علطول ,
انا الصراحة مش بشوفة وهو داخل ينام أنا بعرف انه نام من صوت شخيرة اللى بيوصل
لغاية دوران شبرا , والولاد يقوموا علشان يعملوا الواجب ,واقوم انا انضف البيت
واقوم بواجباتى على أكمل وجه , اذاكر شوية لمحمد , وأسمع شوية لمايا ,والعب شوية
مع هنا ,الساعة تدق 9 بالتمام والكمال ,الاقى نفسى ماشية لا اراديا لغاية السرير انام ,
 او بمعنى اصح بدخل فى غيبوبة طويلة المدى الى ان اصحى برضه لا إراديا الساعة 6
 الصبح واللى حصل النهاردة, هو نفسة اللى هيحصل بكرة , وهو هو بالمظبوط اللى
 هيحصل كمان اسبوع , اليوم الوحيد المختلف بالنسبة لنا كلنا كأسرة هو الصراحة
(يوم الجمعة ) بقوم متأخرة بقى شوية مش زى كل يوم , يعنى ده اليوم
 الوحيد اللى مش بيرن فيه منبهى الجميل الساعة 6 الصبح , اصحى بقى فايقة
 ورايقة ع الاخر , استقبل يومى بصدر رحب ,من تنضيف لغسيل لطبيخ ,
 اه مانا مش هأكلهم طول الاسبوع سلمون وتونة وبطاطس محمرة , وعلى المغربية
 تقريبا بنتجمع كلنا قدام التليفزيون علشان نتابع برنامج الجيل (ستار أكاديمى )
 وللاسف بيخلص يوم الجمعة ,
أأأأأأأأأة انا فوجئت انى ما بتكلمتش مع عبد الموجود فى أى موضوع ساعة على بعضها ,
 يعنى تقريبا من اول ما جبنا الولاد  , الحدث الوحيد اللى بيجمعنى بعبد الموجود هو
الاكل على  ترابيزة السفرة , وشخيرة اللى ع السرير ,
انا بحب عبد الموجود؟ مش عارفة بس بيتهيألى اللى بينى وبينه ده اى حاجة ف الدنيا
غير انه يكون حب , ممكن نقول عشرة , بيت , ولاد , اى حاجة , اى حاجة غير الحب ,
هو بصراحة عبد الموجود راجل طيب بس طيبته من نوع مختلف برضة , طيبة بزياده ,
وكمان انا لو ما اروحش لحد عنده واكلمه استحالة ينطق , بقت حياتنا بالاشارات ,
 بقصار الكلمات , بالمشاورة , خلاص ,,,,,,, انا اخدت على كدة , وكله كوم والخضة اللى بيخضهالى دى كوم تانى , من اسبوع كدة ولا حاجة جه صحانى من سابع نومة ,
يا سعاد ....يا سعاد , قمت مفزوعة  خير يا عبد الموجود فى حاجة حصلت للولاد ,
قالى لا ,بس انا سامع صوت خروشة فى الصالة , قمت اجرى بسرعة لقيت قطة الجيران
 فى الصالة , اه دخلت منين ؟ مانا نسيت البلكونة مفتوحة واحنا وجيرانا بينا سور صغير
بين البلكونتين , وديت القطة للجيران , وقفلت شباك البلكونة , ودخلت عبد الموجود
السرير وغطيته كويس , علشان ما يستهواش ,
حياتى عادية خالص ,روتينيه خالص , مملة خالص خالص خالص الى ان اتى اليوم إياه ,
وانا قاعدة ف الشركة الصبح ودافسة راسى جوة كومة مستندات كان كلفنى الاستاذ لمعى
 المدير بمراجعتهم , وفجأة لقيت مدام دعاء بتنده عليا وبتقول :
مداااااااام سعااااااااااااد تليفون علشانك
تليفون؟ وعلشانى ؟ غريبة دى ؟ وغريبة اوى كمان ؟ خير اللهم اجعله خير ,استرها يارب
لقيت صوت راجل غريب ما اعرفوش , مدام سعاد معايا ؟
أيوة انا سعاد , مين معايا ؟ وحضرتك عاوز إيه ؟
تمالكى اعصابك يا مدام , الاستاذ عبد الموجود وقع فى الفصل وهو بيشرح ,
ونقلناة للمستشفى اللى جنب المدرسة ,
إإإإإإإإإإإإإإيه عبد الموجود؟ ماله ؟ ادينى اسم المستشفى من فضلك
وجريت من الشركة نطيت فى تاكسى لحد المستشفى ,وطول الطريق قلقانة ,وبعيط ,
وبفرك فى ايدى , يارب خير , ياترى عبد الموجود جراله حاجة ؟ يارب استر فجأة سألت
 نفسى سؤال ,هو للدرجة دى عبد الموجود فارق معايا ,غريبة , انا مش فاهمانى على فكرة ,
 ده انا طلعت بحبة مثلا وانا مش واخدة بالى ؟ ولا ممكن يكون اننا مش بنحس
بقيمة حاجة غالية علينا غير لما نتوقع انها ممكن تروح مننا , مش عارفة برضه ,
مش مهم , مش مهم دلوقتى اللى انا حساه ولا اللى بفكر فيه ,المهم بس عبد الموجود
يقوم بالسلامة , ويرجع ينور بيته, وسط عياله , هو صحيح بلط وخواف  بس والله
غلبان , طيب هو انا فكرت فى مرة افتح معاه موضوع والراجل ما اتكلمش ؟
مش ممكن اكون انا اللى احبطت عبد الموجود ,ودفنت نفسى فى روتين الحياة
 الممل , ورميت نفسى بنفسى جوه دوامة الحياة , جايز برضه .
وفى وسط كل ده لفيت سواق التاكسى بيزعق لى وبيقول
(ما تيلا يا ست الله لا يسيئك احنا واقفين بقالنا 10 دقايق وانتى سرحانة )
طلعت اجرى ع المستشفى وسألت على عبد الموجود ياترى يكون موجود فين ؟
طلعت له الاوضة اللى محجوز فيها , محستش بنفسى غير وانا مرمية فى حضنه ,
الف سلامة عليك يا عبدة ,الف سلامة عليك يا ابو العيال ,
ولقيت عبد الموجود بيضحك
 ضحكة غريبة أوى , ضحكة ما شوفتهاش ومحستهاش منه من زمان ,بقوله بتضحك على ايه ياراجل ؟؟
قالى : انتى عارفة انتى ما قولتليش يا عبدة من كام سنة ؟
 ضحكنا احنا الاتنين , ضحكنا اوى من قلبنا , ضحكة حسيتها اوى , بوست ايده وقلت له ربنا يقومك بالسلامة إن شاءالله انا وانت لا ,حط ايده على بقى وقالى :
بعد الشرعليكى يا سعاد
قلت له خير يا عبدة ؟هو ايه اللى حصلك ف الفصل ؟
قالى اقولك ومن غير زعل ؟
قلت له قول يا عبده
قالى : اصلى زهقت من السلمون والبطاطس المحمرة , وانا رايح المدرسة لقيت عربية
كشرى وريحتة دخلت فى مناخيرى , كلت طبق فى التانى ,اصله كان حلو اوى يا سعاد ,
 ويادوب دخلت الفصل الا والمغص بيقطع فى مصارينى ,ومحستش بنفسى غير وانا
 هنا فى المستشفى وبيعملولى غسيل معدة,
قلت :ياااااااااااااااااه يا عبده ومقولتليش ليه انك زهقت ونفسك تاكل كشرى؟
قالى : ولا عمرى كنت هقولك يا سعاد إنتى فى ايه ولا فى ايه , ربنا يقويكى انتى
 كمان مانتى عاملة زى النحلة من الشغل للبيت للولاد ,
سكت ......ومعرفتش ارد عليه ,
للدرجة دى انا كنت مضيعة من ايدى حد حنين وحساس زى عبده كدة ؟ للدرجة دى انا
عمرى ما كلفت نفسى فى وسط زحمة يومى دى اطبطب عليه ,اقوله كلمة حلوة ,
وانا اللى كنت متهماه انه ساكت علطول وما بيتكلمش ,ماهو صحيح هيتكلم مع مين ؟
هو انا كنت عاطياله فرصة ؟
ياااااااااااااتصدق يا عبده انا طلعت بحبك خالص وانا مكنتش واخدة بالى ,
اطمنت على عبده ,وروحنا ع البيت ,ومن يومها وانا مقررة , ان عبد الموجود هيبقى
 علطول موجود , ومنور حياتى ودنيتى ,
عملت ايه ؟ ؟؟؟؟ ولا حاجة, عملت حاجة بسيطة خالص
ماهو على فكرة اللى بيبقى عاوز يعمل حاجة من قلبة بجد بيعملها ,
نظمت وقتى اكتر , اديت الولاد وقت ولبيتى وقت ,ولعبده وقت ,
ااااااااااه بالنسبة للسلمون والبطاطس المحمرة , فبطلتهم بقى هههههههـ
وبقيت اطبخ يوم الجمعة اكل الاسبوع واحطة ف الفريزر واطلع منه اول باول
 واسخنه , وقررت انا وعبدة ان كل يوم جمعة من اول النهار هننزل كلنا نخرج
 ونتفسح ونشم الهوا ,اااااااااااااااة بالنسبة للتنضيف بتاع يوم الجمعة ,اتفقت مع
 مرات البواب وانا نازلة هى تطلع تظبط كل حاجة وبديها اللى فيه النصيب اخر كل شهر
 وامرى لله ,يعنى تقريبا كل عقده وليها حلال ,ماعادا مشكلة واحدة مش عارفة
 اتصرف فيها خالص ولحد دلوقت , ايه هى ؟
قطة الجيران وصحيان عبده مخضوض بالليل وخوفى عليه لا يستهوى
*** تمت ***