الخميس، 30 أغسطس، 2012

أنا التايه



(1)          أنا التايه
وأنا المغصوب على أمرى ,
أنا العايش ومش عايش ,
ف ملكوتك .

(2)          أنا المجروح
وأنا اللى بعيش ف أيامك ,
حلاوة روح ,
ومش عاجبه أساليبك ,
ورافض أى قول أو بوح .

(3) أنا العاصى
وأنا اللى كفرت بقانونك ,
وأنا اللى إيمانى بسيادتك ,
ف وقت الجد ,
ما بحسوش .

(4) أنا المرفوض
وأنا المجبور على الطاعه ,
وقولة الأه ,
تقولى يمين أقول حاضر,
تقولى شمال أقول طيب .

(5)          أنا الساكت
وأنا الراضى ببلاويكى ,
عشان طمعان ,
ف حبة نور ,
يجونى من معاليكى .

(6)          أنا العشمان
وأنا الطمعان ف بلة ريق ,
وقشايه,
عشان أعبر بحور يأسك ,
بحلم غريق.

هناك تعليقان (2):