روحى افرحى

مسكونه ليه بالدمعتين ؟

وقافله ع الفرح البيبان ؟

فرحانه ب الهم ال حاضنك ؟

ولا بالخوف اللى بان ؟ 

روحى افتحى الشيش 

اللى باصص ع الحياه

روحى اضحكى

روحى أحضنى الفرحه 

ال طله من جناين بسمتك

روحى إفرحى 

عمر البكا

ما راح يقصر سكتك

صوت ضحكتك 

هو ال فيه صدى خطوتك

روحى ارقصى 

واتنططى 

فو ق الجراح 

روحى اهمسى

ف ودن بكره 

ووشوشيه 

راح ييجى ومعاه الهنا 

بس انتى 

روحى واوعى 

لحظه تكسلى

كوشه :)

زفه ونور وشموع ,

والكوشه مفروشه ,

حواليها ورد وفل ,

والزينه مرصوصه ,

وف وسط زحمه وناس,

عريس مع عروسه ,

راسمين على وشهم ,

ضحكايه مفقوسه ,

ده ولا العريس فرحان ,

ولا حتى العروسه ,

الفرحه مش فستان ,

ولا زفه ولا كوشه ,

الفرحه لمسة حب ,

ف القلب محسوسه .

ثم ماذا ؟

ثم ماذا ؟

ثم حبك جالى غفله

ثم دوبت انا ف هواك

ثم قلبى طب منى

وتهت منك ف السكات

ثم فرحه ثم زينه

ثم فستان ويا طرحه

ثم لمه ثم زيطه

ثم بيت هادى وجميل

ثم عيشه ثم عشره

ثم بنت ثم واد

ثم جت سنين كتيره

والعيال كبروا اوام

ثم راحوا كمان بيوتهم

ثم عجزنا سوى

ثم إيه ؟

ثم دعوه جوه قلبى

كل مادا تزيد وتكبر

ان يومى يبئا قبلك

ثم ارحل م الحياه

ما تزعلش :(

ماتزعلش :(
لما تتصل بحد من اصحابك القريبين وما يردش وما يهونش عليه يكلمك يشوفك كنت عاوزه ف ايه .

ما تزعلش :(
لما تحس بوحدة وانت قاعد وسط أهلك وناسك .

ماتزعلش :(
لما تاكل مع حدد ف طبق ويلف يجيب سيرتك من وراك .
ما تزعلش :(
لما تحب حد من قلبك ويطلع ما يستاهلكش.

ماتزعلش :(
لما تحس انك مش بتعمل اى حاجة وحشة ف اى حد و للاسف مش لاقى بختك مع حد .

ماتزعلش :(
علشان ربنا بيختبرك ,بيشوف قوة إيمانك , بيشوف انت بتحبه اد أيه
وخليك دايما واثق ومتاكد ان لو فى باب إتقفل هيتفتح مكانه مليون باب
بس إنت ما تزعلش , ممكن ^________^

عارف ؟

عارف ؟
فى حد انت ما تعرفوش بيفكر فيك
وبيطمن عليك كمان
بيفتح بروفايلك فى صمت
يتفرج ويقلب ف صورك
يستنى اى جديد تكتبه علشان يعرف اخبارك
يفرح :) لما تكون فرحان
ويزعل :( لما تنزل خبر او تحكى حكايه مزعلاك
وانت , مش عارفه ولا ف دماغك اصلا
ما تستغربش
هى الدنيا كده اللى انت بتحبه مش شايفك
واللى بيحبك انت ما تشفهوش
علشان كده لو الدنيا خلفت معاك
وقابلتك بنصك التانى إوعى تفرط فيه
علشان دى هديه من الدنيا
بتبعتهالك بعد إذن القدر
♥
♥
♥
♥
♥

فاكر ؟ :(

فاكر؟
اول مره شوفتك ؟ قلت لك انى حاسه انك هديه من ربنا ليا 
قلت لك انا حاسه انك طوق النجاه 
جيت لى ف الوقت المناسب اللى كنت محتجالك فيه 
واعترفت لك اول اعتراف بأنى موجوعه ومش مستحمله من الدنيا خرابيش تانى 
طبطبت عليا وضميت ايدى وطمنتى وقتها
وقلت لى :) ما تقلقيش طول مانا جنبك مفيش وجع ولا فى خرابيش
ونمت وصحيت من حلمك
على وجع جديد
وعلى خربوشه جديده ف القلب اللى ماكانش مستحمل
وصحيت وانت مش ف حياتى
بس بجد بشكرك من كل قلبى
انك علمتنى درس عمرى كله
انى ما اصدقش اى كلام والسلام
على فكره صحيح انا اكيد ربنا هيعوضنى خير عنك
واكيد هيبعت لى راجل احلامى اللى بتمناه
وهحب وهتجوز وهجيب ولاد يشبهولى على فكره زى ماكنت بتحلم بس الاكيد انى هجيبهم من حد تانى احسن منك
لكن انت اشك انك هتلاقى واحده تحبك الحب اللى حبتهولك
بس اللى زيك اتخلق ف الدنيا علشان يعيش محروم
الانانى اللى زيك هيعيش كده زى الفرع الجاف
لانه بياخد بس وماتعلمش ازاى يدى

لف قلبك

لف قلبك زى الهديه 
وحطه ف علبه جوه علبه جوه علبه 
وحافظ عليه 
علشان مش كل من هب ودب يخبطك فيه ويخربشه
لحد ما تقابل نصك التانى 
خليه هو اللى يفتح العلبه
وياخد الهديه
علشان وقتها
هو الوحيد اللى هيبئا يستاهلها
♥
♥
♥

ايوه انا :)

ايوه انا البنت اللى
مش بتبيع غير لما يفيض بيها 
اللى بتحب تجرى وتلعب وتتنطط ولا كأنها عندى 10 سنين
اللى لما تضحك بيكون من قلبها ولما تعيط بيكون من قلبها برضه
اللى بوش واحد وعمرها ما كانت ولا هتكون بوشين 
اللى ممكن تيجى على نفسها علشان تسعد حد بتحبه
اللى ممكن تزعق وتهد الدنيا وتنزل على مفييش :(
اللى ممكن تطلعها من بقها علشان حد جعان
اللى بتغل ساعات لما تشوف غلط ادامها وماتعرفش تتصرف
اللى بتقبح وهى مع صاحباتها الانتيم ^_*
اللى لو حد فكر يعاكسها بس :) بتسمعه م المنقى يا خيار
اللى لما بتحب بتحط اللى بتحبهم فوق راسها ولما تكره بتكره بذمه وضمير ولا كانها عرفتهم اساسا ^_*
اللى بتعيط لوحدها علشان مش بتحب حد يشوف دموعها
اللى بتاكل ايس كريم ع البحر ف عز الشتا
اللى بتضحك اوووووى وهى موجوعه
اللى محدش يعرف يلفها بكلمتين و ما يتضحكش عليها
اللى بتعرف تاخد حقها بطريقتها الخاصه
ايوه انا البنت اللى اخر كل يوم تدخل سريرها تموت م العياط ولما حد يحس بيها تقول
إيه ده ؟ دموع ؟ انا شكلى كنت بحلم :(

اوقات

أوقات بتحس انك مخنوق اوى وزى ما تكون مش عارف تتنفس 
ولما حد بيسألك مالك ؟
بتقول مش عارف :( وبتبئا مش بتكدب على فكره ساعتها 
لانك فعليا مش عارف ايه السبب بالظبط من جملة الحاجات اللى مضايقك هو اللى اتسبب ف احساسك الفظيع ده بالالم :( 
وساعات كمان تتنرفز على حاجات تافهه اوى 
وتاخد موقف على حاجات مكنتش تستاهل اساسا انك تفكر فيها ولا تشغل اهتمامك
انت مش مريض على فكره , ولا مجنون
انت بس وصلت لمرحله ((( وجع الروح ))) اللى المها بيكون من اشد الالام اللى ببتعرض لها
ودى بيكون سببها الرئيسى التراكمات
ايووووووووون التراكمات
علشان كده طلع اللى عندك أول بأول
ما تشلش ف نفسك خالص
اعمل حاجه بتحبها وتفرغ فيها الشحنات السلبيه اللى عندك
سواء الحاجه اللى هتعملها دى بتحبها او ما بتحبهاش
بس نفث عن طاقتك المكبوته
اجرى- ارسم - زعق- اكتب - اشخط ف حد عزيز عليك وانت متأكد انه مش هيزعل منك وهيقدر احساسك ده
وصلى وقرب من ربنا اوى ف الوقت ده :(
احضن الارض وانت ساجد وقوله ( شايف يارب ؟ ) ( خد لى حقى ) ( ارحمنى واحمينى ) ( اشفينى ) ( وفقنى )
فضفض مع ربنا واحكيله
علشان هو الوحيد اللى هيبئا حاسس بيك اوى
وهتحس بطبطته عليك
صدقنى والله هتحس بيه
بس انت احسن الظن بيه
وارمى تكالك عليه :) 

وإحنا صغيرين , بتبئا احلامنا بسيطه وامنياتنا على اد الايد
لما بنحس حاجه بنحسها بجد
بنفرح من قلوبنا
وبنزعل من قلوبنا كمان
الضحكه اللى من القلب ضحكتها وانت صغيروالدمعه اللى بحرقه دمعتها وانت صغير
وعلى اد ما احلامنا بسيطه غالبا مش بنحققها
وبنكبر , وبنتغير
طموحاتنا واحلامنا وامانينا كمان بتتغير
بنعيط بس من غير احساس
وبنضحك بس مش م القلب
وبنحقق احلامنا بتاعتنا واحنا صغيرين
بس الفرق ان لما بنحققها ما بتبقاش احلام وما بنفرحش بيها
علشان اتغيرنا , وبئا عندنا احلام غيرها
احلامنا واحنا صغيرين بتكون ضاقت اوى علينا وماعادتش على مقاسنا
لما كبرنا :(

الارتباط

الارتباط 
مش دبلتين وفرح وفستان وبدله وكام فرع نور 
الارتباط
مش شقه وعفش وأجهزه وكماليات
الارتباطنصين بيكملوا بعض علشان يبئوا ♥ واحد♥
الارتباط
اقتناع تام بالطرف التانى يعنى قابل عيوبه وكمان انت ممكن تكون شايفها مميزات
الارتباط
ضهر,سند , امان , طبطبه وبلة ريق ومن غير ما تكون محتاج
الارتباط
يعنى امبارح ودلوئتى وبكره وهو معاك ومش مع اى حد تانى غيره
الارتباط
يعنى مشاعر واحاسيس , يعنى فرح وزعل , يعنى بسمه ودموع
الارتباط
يعنى اى حاجه وكل حاجه بس بشرط
♥ معاه هو بالذات ومش مع اى حد غيره ♥

عارفه يعنى ايه بتحبيه ؟

عارفه يعنى ايه بتحبيه ؟
-- لما ما يحلاش الرغى والكلام الا معاه 
-- لما تتصلى بيه فاليوم اكتر من 50 مره وف كل مكالمه غالبا ما بيبقاش فى جديد 
-- لما تعرفيه خط سيرك وتحركاتك , اكلتى ايه ؟ لابسه ايه ؟ كلمتى مين ؟ بتعملى ايه ؟ وانتى مش متضايقه ولا متنرفزه 
-- لما يكون اول حد ييجى على بالك وانتى فرحانه :) واول حد تفتكريه لما تبقى محتاجه تعيطى :(-- لما رأيه يبقا مهم اوى بالنسبه لك , وتحسى ان قراراتك المهمه لازم يشاركك فيها
--لما تقابليه بتفرحى كأنك اول مره تشوفيه
--لما بيحى ميعاد المرواح بيبقا مش هاين عليكى تروحى وتسيبيه
--لما يزعلك :( وييجى عليكى بتلتمسيله مليون عذر ومع اول تليفون وهو بيقولك (ماتزعليش يا مجنونه ) بتنسى كل الزعل
--وانتى معاه بتضحكى من قلبك
--وهو مش معاكى بتحسى بالوحده
♥الحب ♥ نعمه حلوه اوى ورزق من عند ربنا
اللى تلاقى الحب ده ♥
لو سمحتى :) حافظى عليه 

ماتصدقوش

ما تصدقوش

بردان وسايب جتته من غير دفا

زى اللى ميت من سنين

ووشه من كتر البكا

شقق وبات قلبه حزين

ما تصدقوش

ابو حلم تايه

ولا اللى ما بيحلمش اصلا

ولا اللى قاسم حلمه على اد الغطا

ومتدفى بيه

ما تصدقوش

عاشق

وحافظ غنوتين

على موالين

سكنوا لسانه وسابوا قلبه

يعيش وحيد .

ما تصدقوش

غير اللى ناوى يعيشها حر

يا يموت

كرامته ف السما

احسن ما يرضى يعيش ذليل

ف وسط ناس اقصى طموحهم ف الحياه

يعيشوا يومهم عشمانين

اوطمعانين

ف بكره احلى

وهما اصلا نعسانين

انا عايزه مصر :(

أنا عايزه مصر بتاعتى 

ام الطيبين 

ام الشهامه والكرم 

ام القلوب عمرانه خير 

مش عاوزه مصر

اللى بئت على عهدكم

مليانه دم 

يا مصر وغلاوة النبى 

وحياة كمان سيدنا الحسين 

قومى وبلاش تستسلمى 

يا مصر 

قومى وشدى حيلك 

ده انا طول سنينى 

عايشه ف خيرك

مش قادره اشوفك 

بالشكل ده 

انا عايزه مصر بتاعتى 

ام الطيبين 

ام الشهامه والكرم 

ام القلوب عمرانه خير 

ممكن ؟

ما تاخودش الدنيا بالحضن أوى علشان ما تتألمش لما تدوس عليك 
ودايما خلى فى مساحه ف حياتك إنك ممكن تتوجع وأقرب حد لقلبك يخذلك
عشان ما تتألمش 
ممكن ؟

يا حلم صدا

يا حلم صدا 

ف الدولاب 

فوق ع الرفوف 

جنب الأمل 

مع قلب شايخ مليان علل 

نور الصبح

ف وسط البرد والعتمه 

وكلفتى بشباكى 

لقيت حبة أمل حاضنين 

ضلوع الشيش 

وشاورولى عشان افتح لنور الصبح 

وأقابله

وقمت بسرعه لجل أفتح

لقييته مفييش .

جايلك يارب

معادش يفرق السكوت أو الكلام 

عايش ف ارض الطيبين 

مستنى انول حسن الختام 

جايللك يارب بقلب موجوع م الالم 

طبطب عليه 

وداويه من الأيام.