الحلقة الخامسة ( يوميات سهتانة فى الارياف )
تدخل مبروكة اوضة سهتانة علشان تعرف مالها وايه اللى مغير حالها .
وتقولها ع الخبر الحلو اللى هى جيباه وجايه .
مبروكة : سهتانة انتى يا بت اصحى انتى نايمة بجد ولا ايه ؟
سهتانة : مبروكة ؟؟؟؟؟– ازيك - ؟ لا تعالى مش نايمة ولا حاجة دة انا مريحة بس شويه .
مبروكة : مالك يا سوسو امك قالت لى انك جايه من برة معيطة .وهى قلقانة عليكى اوى مالك يا حبيبتى ؟
سهتانة : انا بس زهقانة شويتين – من الشغل ومن البيت – من الروتين اللى انا عايشة فيه – وحصل كمان كام موقف معايا النهاردة – قفلونى وعكننوا عليا خالص يا مبروكة .
مبروكة : مواقف ؟ مواقف ايه بقا ؟
سهتانة : ابدا من ساعة ما فتحت عينى الصبحيه لحد ما دخلت البيت فى مشاكل وفى ارف
مبروكة : اة ....وبعدين ؟
سهتانة : واخرهم يا ستى ام واد عندى فى الفصل جت المدرسة النهاردة وفضحتنى قال ايه جوزها عاوز يتجوزنى عليها ......
مبروكة : يا لهوى وبعدين ؟؟؟؟؟
سهتانة : ولا قبلين هجمت عليا ف الفصل وزعيق وشتيمة وتهليل وفين يوجعك يا سهتانة .
مبروكة : وانتى ما ردتيش عليها ليه ؟ ووقفتيها عند حدها الست قليلة الحيا دى ؟
سهتانة : ما هو دة اللى محزنى ومصعب عليا نفسى – انى ما ردتش عليها واخدت حقى
مبروكة : انتى غلطانة يا سهتانة
سهتانة : انا عارفة انى ضعيفة – لا وعارفة كمان انى سلبية وهو دة اللى كاسرنى – نفسى ابقى بت جدعة كدة وافوت ف الحديد وما يهمنيش حد – بس ازاى مش عارفة؟؟؟؟؟؟؟
مبروكة : ( بتريقة ) مش عارفة ؟؟؟؟ انتى يا سهتانة عارفة غلاوتك ومعزتك عندى يا بت – واحنا عشرة سنين مش عشرة يوم ولا اتنين – لكن انا علشان اختك انا لازم اصارحك – وقال على راى المثل يا بخت من بكانى..... ولا هتزعلى ؟؟
سهتانة : انا عارفة يا بت وربنا يعلم معزتك انتى كمان عندى .دة انتى اختى اللى امى ما جابتهاليش يا مبروكة قولى قولى مش هزعل ولا حاجة .
مبروكة : انا حساكى يا سهتانة ماشية جنب الحيط لا دة انا كمان بيتهيألى انك ماشية جوة الحيط نفسه اه والله .انا مش عارفة على طول حساكى خايفة – خايفة من الناس – خايفة من الدنيا – خايفة من اى حاجة موجودة حواليكى وزمنا دة يا سهتانة يا اختى – مش زمن السهتانين لأ – دة زمن المفتحين – زمن الواعين المركزين والمصحصحين كمان .
سهتانة : عندك حق فى كل كلمه يا مبروكة – بس اعمل ايه طيب ؟ دلينى يا اختى .
مبروكة : اول هام .ماتسمحيش لحد يستضعفك .لا انتى مش هفيا فى الدنيا .انتى كويسة وزى الفل.
سهتانة : اه وايه كمان ؟؟؟؟؟؟؟؟
مبروكة : هو ايه اللى اة وايه كمان ؟؟؟هو انا يا بت بشرح لك درس جغرافيا من إياهم ههههههه
سهتانة : هههههههههههه ربنا يحظك يا مبروكة والله اول مرة اضحك من طلعة النهار
مبروكة : خلاصة القول يا سهتانة يا اختى انتى لو امك وابوكى سموكى سهتانة فى شهادة الميلاد ودة طبعا كان غصبن عنك انتى لازم تثبتى للدنيا بحالها ان اسمك مش على مسمى ومن النهاردة انتى مش سهتانة يا سهتانة واياكى تسهتنى على حقك تانى فاهمانى ولا مش فاهمة ؟؟؟؟؟؟؟؟؟؟؟؟؟
سهتانة : اة فاهماكى اومال ايه . يعنى اروح اغير أسمى فى شهادة الميلاد صح؟؟؟؟؟
مبروكة : يا لهوووووووووووووى
( صوت ام سهتانة من برة بتنده على مبروكة وسهتانة )
ام سهتانة : يا مبروكة – يا سهتانة يلا عملتلكوا كوبايتين شاى انما ايه وصاية ( وتدخل الاوضة )
ها يا سهتانة يا بنتى عاملة ايه دلوقتى ؟؟؟؟؟؟؟؟
سهتانة : الحمد لله كويسة يا اما .
ام سهتانة : البركة ف مبروكة قدم السعد ام داخله خضرا .
مبروكة : متشكرة يا خالتى دى سهتانة اختى والله.
ام سهتانة : ها كان مالك يا حبيبة امك ؟؟؟؟؟؟؟؟
( سهتانة ومبروكة بيبصوا لبعض اوى)
سهتانة : ولا حاجة يا اما اتخانقت بس مع ابله حكمت الناظرة علشان اتاخرت الصبحية .
ام سهتانة : بس كدة ؟طيب ما انتى بتتخانقى معاها كل يوم ايه الجديد يعنى ؟
سهتانة : ولا جديد ولا قديم هو كدة يا اما .
مبروكة : والنبى بقا غيروا لنا السيرة دى وروقوا كدة علشان عاوزة اقولكم على الخبر الحلو اللى هيبسط سهتانة بأذن الله تعالى .
سهتانة : خبر حلو خير ؟ ياريت والله الا بيتهيالى انى نسيت طعم الانبساط دة ايه .
مبروكة : ابويا حجز لنا مصيف يا مبروكة وقلت له يعمل حسابك معانا اهو تغيرى جو وترفهى عن نفسك
سهتانة : ودة فين ؟وكام يوم ؟
مبروكة : اسبوع – فى مرسى مطروح
سهتانة : الله دة انا كان نفسى اروح البحر والله .
ام سهتانة : ( مقاطعة ) بحر ايه وبر ايه ؟ لما يجى ابوكى راجل البيت هو اللى يقول تروحى ولا ما تروحيش
معلش يا مبروكة يا بنتى – انتى عارفة عمك ابو سهتانة صعب اد ايه – احنا يا بنتى هنستناه ونشور عليه برضة .
سهتانة : ( ضرب فى دماغها كلام صاحبتها مبروكة اللى قالتهولها من شويتين )
بصوت عالى : لا انا عاوزة اروح مع مبروكة المصيف – دة حقى
ام سهتانة : حقك ايه يا ام حق – جتك كسر حقك على صدرك – انا قلت نستنى ابوكى يعنى نستنى ابوكى
سهتانة : ( فى خنوع وخضوع ) حاضر يا اما
مبروكة : طيب استأذن انا دلوقتى وشورى يا سهتانة على ابوكى وردى عليا – بس ردى عليا على طول ما تعوئيش فى الرد .
سهتانة : حاضر يا مبروكة – طب ما لسة بدرى .
مبروكة : – معلش يا سوسو علشان ما اتأخرش - يلا سلام عليكم انا بقا
سهتانة وامها : وعليكم السلام ورحمة الله وبركاتة
سهتانة : تفتكرى يا اما ابويا هيوافق اروح المصيف دة مع مبروكة وعيلتها ؟؟؟؟
ام سهتانة : مش عارفة يا بت .
سهتانة : طيب والنبى يا اما شوية من عندك وحركاتك يا ام سهتانة يا حلوة انتى وهو هيوافق على طول ان شاء الله -البت تعبانة يا ابو سهتانة – البت تغير جو يا ابو سوسو – مش هوصيكى يا أما؟؟؟؟
ام سهتانة : ربنا يسهل يابت – اسكتى بقا وبطلى زن .
( الباب بيخبط )
أم سهتانة : حااااااااااااضر مين اللى ع الباب
يتبع ,,,,,,,
Asmah Ghazal
ليست هناك تعليقات:
إرسال تعليق