الجمعة، 26 أغسطس، 2011

إسكندرانيه .....وأفتخر

 
بحبك يا اسكندريه
يا موجة ورمله وشمسية
يا بنت حلوة معدية
ساعة عصارى مهديا  

بحبك وانتى مخنوقة ومزحومة
فى وقت الصيف
واحبك وانتى فاضيه مهويه
بحب شايك ابو نعناع على الكورنيش
وانا بسمع اغانى الست


بحب اتمشى يوم مطرة على شطك
واشكى همومى وافضفض
بحس البحر دة  صاحبى
فاهمنى قبل ما اتكلم
وموج شطة بيبعت لى
رسايل حب ورديه
وايه يمنع ؟
عارفنى هو من يومه
بيحكى لى وجع يومه
ده يحكيلو .... ده يشكيلو
ودة ساكت
ودى... زعلانة وبتبكى
ودى.... فرحانة وبتضحك
وصوت ضحكتها صوت مسموع .


ياخطبة جمعة  فى المرسى ابو العباس
يادلايه من الزنقا .
بحب ترامك الاصفر
واحب اتمشى بالحنتور
على الكورنييش

بحبك حب مش عادى
وليا الفخر
بحبك يا اسكندرية
يا عروسة البحر

هناك 4 تعليقات:

  1. الله يسامحك يا يا شيخه..اقسم بالله دموعي هي اللي ردت عليكي.وحشاني اسكندرية..و الشاطبي على البحر بيتنا..و قعدتنا ع الكورنيش و الدنيا كلها مش سايعه ضحكتنا..
    منى الصاوي..

    ردحذف
  2. حبيبة قلبى الاستاذة منى تسلمى لى يارب - واسكندرية مضلمة من غيرك با قمراية

    ردحذف