الأربعاء، 24 أغسطس، 2011

انا عرفت غلطتى وخلاص هغير كلمتى


قال رسول الله صلى الله عليه وسلم  من كان يؤمن بالله واليوم الآخر فليقل خيراً أو ليصمت
والمثل الشعبي بيقول الكلمة الطيبة تكسر العظم القاسي
 انا مش هتكلم فى الموضوع ده علشان احنا فى رمضان ولا فى ايام مفترجة بنتشعبط فيها برضا ربنا علينا
ولا هتكلم لانى عاوزة اتكلم وخلاص ولا قعد ارغى والك على دماغ الناس
انا بس هتكلم لانى بجد بقيت ملاحظة ان الموضوع دة  بقا ظاهرة
ظاهرة.وكمان مش ظاهرة عادية . لا دى ظاهرة متفشية زى البلهارسيا كدة ولعياذو بالله

--------------- الكلمه -----------------

الكلمه ممكن تكون سهم مسموم  جارح ويوجع  
الكلمه ممكن تكون بلسم شافى تريح القلوب         
انت عارف ان ممكن كلمه مره .يرميها حد قلبه اسود .يعكر بيها حياه حد كل مشكلته فى الدنيا انه أتكلم معاك وفتح لك قلبه 
طيب هو الاخ اللى بيرمى الكلمه دى بيكون قاصد ؟ ولا مش فى دماغة  اصلا ؟؟ مدب يعنى
والله قاصد او مش قاصد مش دى قضيتى
انا قضيتى الكلمه نفسها
هو انا ليه ما احاسبش نفسى على الكلمه اللى هتطلع منى
هو انا ليه ما أحطش نفسى مكان اللى هكلمه ده واشوف الكلمه دى بتوجع ولا لأ
هو انا عارف ؟؟يعنى ايه اوجع حد والسلام
الكلمه دى مش بتخلص لما بيخلص اخر حرف منها وخلاص  
 والله الكلمة الوحشة دى بتتوغل وتنتشر زى السرطان بالظبط
لما ننتقد حد ياريت ننتقده بلطف ماهو على فكرة اللى انا بنتقده دة بنى ادم زيى زيه
احنا الاتنين هنقف قدام ربنا -هو هيتحاسب وانا كمان هتحاسب
وياريت لما اجى اتناقش مع حد  اتناقش باسلوب متحضرومحترم ماهو برضة احتمال يكون رأيىأنا اللى  غلط ورأيه هو صح
وارد جدا على فكرة ماهو انا اصلا مش علامه يعنى ولا مخلوق فى الدنيا عارف كل كبيرة فيها وصغيره 
ياريت بجد نحاسب اوى على كلامنا
ياريت نحس بمعنى كلمتنا قبل ما نقولها
ياريت نراعى شعور بعض ونحس ببعض  اكتر
ياريت يكون شعارنا الكلمه الطيبة صدقة 
       
    

هناك تعليقان (2):

  1. المتفرض والطبيعى مراعاه حدود الكلام

    بس اوقات كتيره وده الغالب حاليا

    اى كلام بيتقال
    دون
    حساب لاى شىء

    والله المستعان بقى :)

    ردحذف
  2. المفترض بقا شى والواقع فعلا شى تانى يا خالد
    الله المستعان فعلا
    شكرا لمرورك الكريم
    دايما منور مدونتى بتعليقاتك .

    ردحذف