الجمعة، 12 أغسطس، 2011

كرسى بعجل



كرسى بعجل
فى الاول كل سنه وكل الناس طيبين بمناسبة حلول شهر البركة والمحبة شهر الخير
شهر رمضان الكريم
ويارب اللى ما حققش اللى نفسه فيه السنة دى. ان شاء الله يحققه السنة اللى جاية.
او اللى وراها او اللى بعديها احنا يعنى ورانا ايه ؟؟؟؟؟ ولا اى حاجة هههههه
نخش بقا ف الموضوع  كالعادة تانى وبكل سعادة خلصت شغلى ومروحة جرى على بيتنا
اه جرى مستغربين ليه؟؟ هو انا مش صايمه وتعبانة وحرانه كمان ؟
يبقى لازم اروح بيتى جرى . المهم مشيت انا وصاحبتى اللى دايخة معايا دى علطول  وراحت توصلنى اركب الاتوبيس السعيد اللى بقيت حاسة من كتر محبتى ليه انه بقا فرد من افراد اسرتى  عايشة ومتعايشة معاه بيوحشنى اه والله بيوحشنى هو والسواقين والكمسريا وكله والله.  انا بقا زى ما قلتلكم تعباااااااااانة
وكمان جت قاعدتى ف الشمس يلاااااااا دى تمتمت خالص
وانا قاعدة وسرحانة كالعادة برضة .قلت ف عقل بالى لنفسى كدة بس وانا زعلانة حبتين
هو ليه ياربى معنديش عربية مكيفة وزى الفل كدة اروح واجى وادلع زى الناس ......؟
وفجأة وانا بحلم ابص  من الشباك الاقى ايييييييييه ؟ بنت زى القمر قاعدة على  كرسى بعجل
ومامتها يا عينى بتزق الكرسى بالعافية .
روحت فايقة كدة ومصحصحة لنفسى تانى وقلت الحمد لله يارب. انك انعمت عليا بنعمة الصحة
يا سلااااااااااااااام الواحد صحتة كويسة ورجليه شيلاه وزى القرد ويبص للى راكب عربية
والاخ اللى راكب عربية اكيد برضة بيبص للى راكب عربية موديلها احسن منه
هو ليه كل واحد مش بيبص للحاجة اللى ف ايدة ويقول الحمد لله –
هو ليه لازم ابص للى اقل منى علشان احمد ربنا
لا انا مش لازم احمد ربنا علشان ادانى حاجة وما ادهاش لحد تانى –
انا لازم احمد ربنا لو ادانى او لو ما ادنيش- فى نعم كتير اوى ربنا عاطيهالنا واحنا بنتعامل معاها على انها فرض وواجب كمان
عمرك قعدت كدة مع نفسك ساعة صفا تعد النعم اللى ربنا ادهالك ؟
عمرك سألت نفسك انا بعمل ايه علشان ارد ولو جزء ف المليون لربنا علشان النعم اللى ادهالك دى
هو انا لازم اشوف واحد ضرير علشان احس انى بشوف –
لازم اشوف واحد ماشى بعكاز علشان احس انى بمشى لا وبجرى كمان .
ساعتها بجد حسيت انى غفلانة عن حاجات كتير  ومن اهم الحاجات اللى انا غفلانة عنها دى
إنى احمد ربنا واقوله لحمد لله من قلبى
الحمد لله يارب على كل حاجة اديتهالى –
الحمد لله يارب على كل حاجة لسة ما اديتهاليش -  
 الحمد لله يارب على كل شىْ وعلى اى شىْ

ليست هناك تعليقات:

إرسال تعليق