الأربعاء، 2 يناير، 2013

ما تسمحيش


لما تركبى أتوبيس زحمه , وما تلائيش مكان تقعدى
ما تسمحيش لحد يتحرش بيكى وخليكى واثقه ف نفسك

لما تصاحبى بنى ادمين ف حياتك وتعرفى أشكال وألوان
ماتسمحيش لحد منهم يبروزك غلط

لما تضحكى بصوت عالى ويبئا اللى ف قلبك على لسانك ةتبئى بنى ادمه طبيبعة ومحبه للحياه
ماتسمحيش لحد يغيرك طالما مش بتعملى حاجه غلط

لما تفشلى ف تحقيق حلمك
ماتسمحيش لحد إنه يحبطك لسه فى وقت طول مانتى عايشه تحققى احلامك فيه براحتك

لما تيجى تاخدى قرارات مهمه ف حياتك ومصيريه بالنسبه لك
ماتسمحيش لحد إنه يتدخل ف حياتك ويعمل فيها وصى

لما تتخطبى لواحد ويطلب منك حاجه ما ينفعش يطلبها ويساومك على انك لو عملتيها تبئى بتحبيه ولو معملتهاش تبئى ما بتحبهوش
ردى عليه وقوليله / إنت لو بتحبنى مش هتطلبها منى أصلا
وما تسمحيلوش يستغل جسمك

لما تكبرى كده وتبئى على وش جواز ويجيلك عريس غنى وهنى وتبئى مش موافقه وأهلك يضغطوا عليكى تحت مبدأ أنهم عاوزين يفرحوا بيكى
ما تسمحلهومش يستغلوا سذاجتك

لما تتخرجى وتبتدى تشتغلى وتعتمدى على نفسك خلى دايما بينك وبين اللى بيتعاملوا معاكى حدود
وما تسمحلهومش يستغلوا برائتك

لما تتجوزى وتفتحى بيت وجوزك يتخانق معاكى ويمد إيده عليكى
ما تسمحيلوش يستغل كرامتك وخدى موقف

لما تخلفى ويبئا عندك ولاد ربيهم كويس احسن مانتى كمان اتربيتى
وماتسمحلهومش يستغلوا حبك ليهم ويطلعوا عيال بايظين ومتدلعين

طول مانتى موجوده ف الحياه ما تسمحيش ابدا للى حواليكى إنهم يستغلوكى
إنتى نص المجتمع بجد مش كلام اغانى ولا كلام شعارات
انتى غاليه اوى وربنا مكرمك ف كل الديانات
فمتهنيش انتى نفسك
وماتسمحيش لحد مهما كان وتحت اى بند إنه يستغلك .

ليست هناك تعليقات:

إرسال تعليق