الحلقة الثامنة ( يوميات سهتانة فى الأرياف )
ام سهتانة : بس........ وجدتها .
لما الواد هدهد يجى بالسلامه انا ليا معاه كلام هيخليه يوافق علطول يقعد هنا وما يروحش مع البت الغلبانة يعكنن عليها هناك – قامت ام سهتانة تشوف اللى وراها وبالليل قاعدين كلهم مع بعض بيتفرجوا على التليفزيون خبط الباب وقامت ام سهتانة علشان تفتح ,
ام سهتانة : مين
هدهد : افتحى يا اما انا هدهد,
ام سهتانة : ازيك يا حبيبى عامل ايه ؟
هدهد : حبيبك؟؟؟ ودة من امتى يا اما الحونيا دى كلها ههههههههههه وماله ,
ام سهتانة : احضر لك تاكل يا ضنايا ؟
هدهد : مالك يا اما ؟ انتى سخنا ولا حاجة ؟
ام سهتانة : ههههه الله يحظك يا واد يا هداهيدو يا مضروب
هدهد: عامله اكل ايه يا امااااااااا؟
ام سهتانة : صينية بطاطس فى الفرن ورز معمر
هدهد: اخيييييييييية – مش عاوز اكل بطاطس يا اما – مابحبهااااااااااااااااااااش
ام سهتانة : خلاص يا حبيبى بلاش بطاطس –عاوز تاكل ايه
هنا بقا بيكون كيل هدهد طفح من تغيرات امه المفاجئة واللى مش على عادتها كان هدهد بيقول الكلمة ترد عليه بعشرة ووابل من الدعا والشتيمة
هنا بس قرر هدهد انه يكتشف السر بنفسه .حط ايده على كتف امه ووطى راسة اوى لحد ودنها وقالها .....
هدهد : ممكن اعرف فى ايه ؟ وعاوزة منى ايه بالظبط ؟
ام سهتانة : هعوز منك ايه يعنى ؟
هدهد: انتى متأكدة انك مش عاوزة منى خدمة كدة –طلب كدة –اى حاجة والسلام
ام سهتانة : بص بقا يا هدهد ومن غير لف ولا دوران ولا كلام كتير
دلوقتى يا اخويا ابوك كان راسة والف سيف ان اختك سهتانة ما تروحش المصيف الا بيك.كويس؟
هدهد: عين العقل وبعدين ؟
ام سهتانة: جيت انا من ورا ابوك ومن ورا اختك سهتانة وكلمت مبروكة علشان تتصرف وجت مبروكة وقالت لاختك ان هيما عاوزك معاه كويس؟
هدهد: هيما؟؟؟؟؟؟لا مش كويس –وبعدين؟
ام سهتانة: وفى الوقت اللى قالت مبروكة لاختك ع الموضوع دة جه المعدول ابوك وقال انه وافق ان اختك تطلع من غيرك يا سبع البرومبا –كويس؟
هدهد: اااااااااااااه وانتى بقا مش عاوزانى اطلع المصيف مع الغندورة بنتك
ومش عاوزة حد يعرف الفيلم الهندى اللى انتى عملتيه ده صح يا اما ؟؟
ام سهتانة : صح يا هدهد –ها ؟هتاخد كام ياللى تتقطم رقبتك على صدرك
علشان ما تروحش المصيف وما تفتحش بقك باى كلمه من اللى انت سمعتة دة
هنا حس هدهد انه مسيطر على الاخر وهو صاحب الموقف وطلباتة هتبقى اوامر
هدهد: هى بنتك هتقعد فى المصيف دة اد ايه ؟
ام سهتانة : اسبوع
هدهد: خلاص يبقى هاخد ع اليوم 100 جنيه
ام سهتانة سمعت الكلام دة من هنا واتحولت على طول من الست ام سهتانة الكامله الراسية للعجوزة ام منقار اللى بتتحدى النار وبتسافر بلاد وبحار
ام سهتانة : ميه جنيه ؟؟؟؟؟؟؟؟ جتك ميه حرباية يتلفوا على رقبتك يجيبوا اجلك يا بعيد – قال ميه جنيه قال – انت اتهبلت يا واد يا هدهد ولا اتهبلت ؟؟
هدهد: ايوا ايوا إظهر وبان عليك الامان يا بت الحج نعمان بياع اللبان .
بقولك ايه. هو دة اللى عندى .غير كدة معنديش – هاااااااا قلتى ايييييييه يا ست الحبايب يا حبيبة انتى ؟
ام سهتانة : كدة يا هدهد ؟ دة انا امك حبيبتك- نسيت يا هدهد اللى بعملوا معاك؟
هدهد: اللى اييييه ؟ لا ما نسيتش وقال على راى المثل افتكرلك ايه يا بصله
طيب علشان انتى امى وحبيبتى انا هخليهم 75 جنيه لليوم
ام سهتانة : خلاص 50 جنيه وانا مسامحة
هدهد: بيحسب حسبتة بقا بالهداوة وواحدة واحدة
50 فى 7 ايام يبقووووا350جنيه –ماشى مش وحشين يلا ايدك ع الفكة بقا
ام سهتانة: طيب انت هتقول ايه لابوك وسهتانة لما يجوا يقولولك على المصيف
هدهد: لا دى لعبتى انا بقا –اطمنى انتى وحطى ف بطنك بطيخة صيفى
ام سهتانة : ماشى لما نشوف
خلص هدهد وامه الكلمتين المهمين بتوعهم وارطوا على الخطة بتاعتهم جامد وطلعوا بقا لسهتانة وابوها اللى لسة بيتفرجوا على المسلسل العربى فى التليفزيون
ام سهتانة : يلا يا ابو سهتانة –يلا يا سهتانة –يلا يا واد يا هدهد علشان تتغدوا
هدهد: بطاطس برضة يا اما ؟
ام سهتانة : الاكل ع الطبلية كتير وخير ربنا كتير كل اى حاجة تانيه يا واد يا هدهد
سهتانة: هههههههه ومالها البطاطس بس يا واد يا زفت انت
هدهد: بس ما تشتميش ااااه انا بقولك اهو
ابو سهتانة: انت ياهدهد اعمل حسابك الجمعة الجايه هتطلع مع اختك المصيف
هدهد: الجمعة الجاية ؟ ؟
سهتانة: ههههههههه لا والنبى ايييييييه ؟ وراك ايه يا موكوس يا متعوس ؟ يكونش وراك الديوان يا عرة ؟
هدهد: لا يا اختى ماوراييش الديوان ولا حاجة – طيب يا ابا ان شاء الله
اسرة سهتانة خلصوا الغدا وقامت سهتانة عملت دور شاى معتبر وبدأت تدور فى دولابها على هدوم تنفع تروح تصيف بيها وهى بتقلب فى دولابها حصل الاتى
ابو سهتانة : بت يا سوسو
سهتانة: ايوا يابا
ابو سهتانة: خدى يا بت الفلوس دى –انزلى بكرة ان شاء الله جيبى لك كام طقم كدة تغيرى فيهم لما تروحى المصيف مع صاحبتك مبروكة
سهتانة: ربنا يخليك ليا يابا –بس انا مش محتاجة فلوس – انا هقبض كمان يومين ان شاء الله
ابو سهتانة: تقبضى ايه ؟ ومش عايزة ايه؟ يا بت انتى هتتكسفى من ابوكى ؟ وبعدين هما الكام ملطوش اللى انتى بتاخديهم دول يتسموا فلوس ؟خدى يا بت مدى ايدك
سهتانة: ربنا يخليك يابا (وتحب على ايد ابوها )
يا سلام يا بت يا سوسو دة انتى مرزقه ع الاخر والله جم فى وقتهم بكرة بقا ان شاء الله هروح اشترى الفستان اللى كان عاجبنى واشترى شويه حاجات كمان ايوا كددددددا. وسهتانة بتكلم روحها دخلت امها عليها الاوضة
ام سهتانة : يا سهتانة. الله انتى يا بت سرحانة فى ايه ؟
سهتانة : ولا حاجة يا اما – خير يا ست الكل ؟
ام سهتانة: خدى يا حبيبتى القرشين دول علشان تشترى اى حاجة نقصاكى يا اختى – وعايزاكى تبقى زى الفل ولما تروحى مع مبروكة ما تخليش نفسك فى حاجة اى حاجة نقصاكى هاتيها
سهتانة: والله يا اما انا مش عارفة اقولك ايه ؟ لسة ابويا عاطينى فلوس علشان اشترى شوية هدوم –ربنا يخليكوا ليا وما يحرمنيش منكم يارب –
ام سهتانة: وماله يا ضنايا زيادة الخير خيرين –اتبسطى يا بت وافرحى وهاتى كل اللى نفسك فيه .
سهتانة: ربنا يخليكى ليا يا اما –( وتحب على ايد امها )
يا سلام ربنا ما يحرم اى حد من عيلتة – العيله دى حاجة جميله بجد – العيله دى يعنى الحضن يعنى اللمه يعنى الضهر والامان من غدر وقسوة الايام . يااااااااااه انا مبسوطة اوى النهاردة وحاسة انى طايرة فى السما
هدهد: سهتاااااااااااانة –بت يا سوسو
سهتانة: ايه يا هدهد ؟خير اللهم اجعله خير
هدهد: معكيش اى حاجة سلف ؟
سهتانة: انت لحقت تخلص مصروفك يا مهبب؟ ؟ وعايز الفلوس تهبب بيها ايه ؟
هدهد: استغفر الله العظيم –هو لازم الذل دة والمحضر اللى بيتفتح –عايزهم وخلاص يا ستى معاكى ولا معكيش؟
سهتانة: اة لازم المحضر دة يا هدهد . ولازم تقولى عاوز الفلوس تعمل بيها ايه يا كدة يا مش هديلك ها ايه رايك بقا ؟
هدهد : امرى لله بصى يا ستى انا رايح البحيرة انا والعيال صحابى علشان نصطاد فكنت عايز فلوس اجيب الطعم والذى منه ومواصلاتى واكلى وكدهون يعنى.
سهتانة: تصطاد؟ ماشىيا اخويا اتفضل ال10 جنيه دول
هدهد : يتفحص ال10 جنيه اوى ومش عاجباه – ماشى زى بعضة
سهتانة: العفو يا محترم – عيل قليل الذوق جتك القرف
هااااااا – يلا لما اريح لى شوية بقا علشان اقوم اغسل هدومى بالليل
سكت البيت وطفوا النور علشان يريحوا بعد صينية البطاطس اللى عملتها ام سهتانة – وهما نايمين سمعوا صوت حد بينادى من الشارع
ياا ام هدهد – يا ابو هدهد – يا ام هدهد – يا ابو هدهد
البيت كله صحى : خير اللهم اجعله خير –طلعت سهتانة تجرى على البلكونة علشان تشوف فى ايه ؟ ايه اللى حصل ؟ ومين اللى بينادى عليهم
سهتانة: مين ؟مين؟
الواد مرسى : الحقى يا ابله سهتانة – الحقى هدهد اخوكى
ام سهتانة + ابو سهتانة : هدهد؟ ماله هدهد ؟خييييير يارب
ونزلوا كلهم جرى على الشارع بيعيطوا وقلقانين على هدهد
ام سهتانة +ابو سهتانة+ سهتانة : هدهد؟؟؟؟؟ ايه دة ؟ هو ايه اللى عمل فيك كدة؟؟
يتبع ,,,,
Asmah Ghazal
ليست هناك تعليقات:
إرسال تعليق