إوعى

إوعى , 

تضحك غصب عنك ,

وأهى تبئا ضحكة ,

والسلام ,

إوعى ,

يوم تحس إنك ,

مجبور ,

تقول حبة كلام ,

إوعى ,

يوم تحبس دموعك ,

جوه منك ,

إوعى ,

تقبل تبئا عايش ,

جوه عيشة والسلام .

لما تحس

لما تحس إنك مش حاسس ,

وإن النور والعتمة إخوات ,

وإنك عايش بين متاهات ,

بتلف الدنيا وبتدور,

مش  شايف غير صورة روحك,

مشروخة,

ف إزاز مكسور ,

لما تحس بطعم الغربه ,

معشش فيك ,

حضنه ماليك ,

وإنت ما بين ملايين الناس ,

بس وحيد ,

لما تحس الامل الباقى ,

جوة حياتك ,

لجل ينور عتمة ليلك

لاضم روحه بحبات قلبك ,

حاضنة لحد ما مات مخنوق ,

لما تحس انك موجود ,

وسط الناس,

بس بجسمك ,

لكن روحك ,

تاهت منك ,

وقت ساعتها ,

هتعرف إنك ,

جواك مات .

                                     

يا حلم

يا حلم صدا ف الدولاب ,

فوق ع الرفوف ,

جنب الأمل ,

مع قلب شايخ ,

مليان علل .

كراكيب زكرياتى

قاعده بدور ف الكراكيب ,

المتشاله بئالها زمان ,

جوا دولابى ,

لقيتلك صوره

ف برواز,

 ومرايته مكسورة ,

وظرف صغير بالالوان ,

جوه الظرف لقيت دلايه ,

وف وسطها إسمك مع إسمى ,

و بينهم قلب صغير نونو,

من غير سهم ,

ولقيت ورقه ,مكتوب فيها ,

نص شهاده ,

ودبله عليها ,

قلبى وقلبك ,

حاضنين بعض ,

ولقيت دمعه ,

وكسرة قلب ,

يوم ما خلص موضوعى انا وانت ,

ب مينفعش ..

انا عايش

أنا عايش ,

وبتنفس ,

وكله تمام ,

ودلوئتى ,

خلاص أنا فوقت من الأوهام ,

وصدقنى ,

هكون عادى ,

ف بعدك كله هيعدى ,

ويبئا تمام .

خلاص كده؟؟؟

خلاص كده ؟

قررت تمشى ,

قررت تاخد كل حاجة ف قلبى ليك؟

طب بص تانى ؟

دور كويس؟

يمكن تكون ناسى هنا ,

حاجة زمان ,

كانت ف يوم,

ملكك وليك,

ياريت كمان تاخد حنينى ,

ومعاه كمان ,

عمرى وسنينى ,

وتسيب لى بس الزكريات ,

انا راضية إنى أعيش عليها ,

متونسة وغرقانة فيها ,

ماهى أصل دى الحاجة الوحيدة ,

اللى ريحتك لسة فيها .

بحبك ليه؟؟؟؟؟؟؟

ما تسألنيش بحبك ليه؟

أنا نفسى معنديش رد,

أنا ما اعرفش غير إنى ,

بحبك من السما للارض  ,

لقيتك دار بتحضنى ,

تدفينى فى عز البرد,

لقيت وياك سنين عمرى ,

طريق مفروش بلون الورد,

لقيتك طيف فى أحلامى ,

ليلاتى يزورنى ويجينى ,

لقيتك دقه فى قلبى ,

لقيتك ننى فى عينى ,

أنا مأعرفشى غير إنى ,

بموت فى هواك ,

لكن تسألنى ليه وعلى إيه ؟

هقول ما أعرفش ,

بحبك ليه ؟