الأربعاء، 21 سبتمبر 2011

لازم تحلم

عجبى عليك يا زمن ,
مش راسي ليه على بر ,
ناس فيك بتاكل شهد ,
ناس تانية أكلها مر ,

وناس تايهة فى ملكوتها ,
ولا تملك ليومها قوت ,
وناس من كتر ما بتاكل ,
تشوفها تقول دى جتة حوت ,

وناس أحلامها ممدودة ,
تقولش يا بيه بساط الريح ,
وناس بتخاف فى يوم تحلم ,
لا تتحاسب على الأحلام 

يا زمن عجيب ملكش أمان ,
وفيك النصرة للخدام ,
لكن سيدك مالوهش مكان ,

بغمض عينى وأفتحها ,
وأنا بحلم ,
مجرد حلم ,
وحلمى بسيط ,
لا هو كتر مال ولا سيط ,

أنا حلمى
يكون للحلم لسه مكان ,
وكل الناس تقوم تحلم ,
ماهى الاحلام ماهيش بفلوس ,
ومين عارف ؟ ومين عالم ؟
ما يمكن بكرة أحلامنا ,
نقوم ونشوفها قدامنا ,
حقيقة بجد مش أحلام ,

تيجى لحدك تاخد إيدك ,
تمد عروقها  لوريدك ,
تلون كل أوقاتك,
بلون الورد ,
تدفى قلبك البارد ,
تغير طعم أيامك ,
لطعم الشهد ,

فشد الهمه يا إنسان ,
وقوم وأحلم ,
مادام لسه بتتنفس ,
وفيك الروح ,
ما تستسلمش لازم تحلم .


هناك 8 تعليقات:

  1. كلمات بسيطة لكن شديدة التعبير...
    كلمات بسيطة لكنها نابعة من القلب فتخاطب القلوب مباشرة...
    كل الانجازات البشرية بلا استثناء كان أصلها أحلام عند اصحابها... و لهذا أرى انه بدون أحلام فالأمر أقرب الى الموت منه الى الحياة...
    تحياتى و تقديرى...
    ملحوظة: عندما قلت كلمات نابعة من القلب تذكرت موضوعا على مدونتى بعنوان "تاملات فى مسألة القلب"، و هذه دعوة لك لقراءته على الرابط الآتى:
    http://masrawi.maktoobblog.com/1608671/%D8%AA%D8%A3%D9%85%D9%84%D8%A7%D8%AA-%D9%81%D9%89-%D9%85%D8%B3%D8%A3%D9%84%D8%A9-%D8%A7%D9%84%D9%82%D9%84%D8%A8/

    ردحذف
  2. تسلم احمد ربنا يكرمك يارب
    ^_^

    ردحذف
  3. جميله جداا
    بالتوفيق

    ردحذف
  4. تسلم يا خالد
    متابع متألق - دمت اخى وصديقى
    ^_^

    ردحذف
  5. مدونة رائعة أسما ، رجعالك أقرا كل تدويناتك وأستمتع بإبداعاتك
    منى سليمان

    ردحذف
  6. ربنا يخليكى ليا يا دكتور منى يا قمر انتى ابداعات ايه بس اومال كتابات حضرتك تبقى ايه ؟
    اتمنى انى ابقى عند حسن ظن حضرتك - وتتبسطى وانتى بتتجولى فى ارجاء مدونتى المتواضعة
    نورتينى وشرفتينى بجد

    ردحذف
  7. تسلم يا فاروق
    ياريت تمضى اسمك بعد كدة
    هههههههههههه
    ^_*

    ردحذف