الأحد، 9 أكتوبر 2011

صابرين (^_^)

النهاردة الوقفا ,
الناس كلهم فى الحارة بيستعدوا علشان يستقبلوا العيد الكبير,
كل الناس فرحانة ,
اللى بيدبح, اللى بيشترى هدوم جديدة ,
الحارة زحمة ,
العيال كلهم بيلعبوا فى الشارع
بيجروا , بيطيروا من على الأرض طير
وبيغنوا كلهم ,
النهاردة الوقفا وبكره العيد ,
ولبسنا كله هيبقى جديد  ,
إلا صابرين بنت إبراهيم أفندى ,
الموظف الغلبان اللى على أد حاله
 اللى يادوب بيجيب فلوس لقوته وقوت عياله بالعافيه,
راحت صابرين على جنب بعيد عن كل العيال ,
قعدت فى حتة لوحدها ,
جت لها صاحبتها أمانى ,
مالك يا صابرين ؟ إنتى قاعدة لوحدك ليه ؟
أصل أنا مكسوفة ,
مكسوفة؟ مكسوفة من إيه ؟
أصل كلكم عندكم لبس جديد علشان العيد وأنا ما عنديش ,
وبدأت صابرين تعيط ,
 نزلت دموع صابرين زى حبات المطر ,
كست ملامح صابرين الصغننة ,
طبطبت عليها أمانى صاحبتها ,
هو إنتى بتعيطى ليه بس ؟
ماتروحى تقولى لأبوكى ,وهو يجيب لك فستان للعيد ,
أنا قلت له بس هو قالى هجيب لك منين دة إحنا بناكل بالعافيه,
زعلت أمانى علشان صاحبتها صابرين ,
لكن هى مش مستوعبه ممكن تعملها إية ولا تفرحها إزاى؟
كل اللى قدرت عليه انها تتطبطب عليها وتمسح لها  دموعها ,
وقامت أمانى علشان تكمل لعبها مع باقى صاحباتها ,
طلعت صابرين على بيتها ,
اللى مش باين عليه أى مظاهر لإستقبال العيد ,
سألتها أمها ؟ بتعيطى ليه يا صابرين ؟
حكت صابرين لأمها سبب عياطها ,
لكن ما باليد حيله ,
مفيش عند أم صابرين أى حاجة تقدمها لبنتها
 ولا لبقية إخواتها الصغيرين,
وبالليل وهما كلهم متجمعين ,
خبط باب شقة إبراهيم أفندى ,
راحت أم صابرين علشان تفتح ,
لقت الست أم أمانى جارتها ,
جايه تعيد عليها ومعاها كيسين ,
 أم صابرين قالت لها والله ما كان له لزوم ,
ردت أم أمانى دى حاجة بسيطة عيب ما تقوليش كده
والكيس دة من أمانى لأختها صابرين ,
وروحت الست أم أمانى علطول ,
جرت الست أم صابرين على الأكياس اللى جابتهالها جارتها ,
لقت كيس فيهم فيه حتة لحمة ,
والكيس التانى بتاع صابرين لقت فيه فستان وجزمة صغنونة
جرت صابرين على الفستان زى المجنونة
لبست الفستان ,ولبست الجزمة ,
ونزلت جرى على الشارع علشان تلعب مع العيال ,
هى دلوقتى زيها زيهم ,
لابسة جديد فى جديد ,
فرحة صابرين النهاردة بالعيد ,
مش سيعاها,
 إبتسامة صابرين أترسمت على وشها من تانى ,
بعد ماكانت نسيت شكل الأبتسامة إيه؟
شبكت إيديها فى إيدين العيال,
وغنوا كلهم سوا ,
النهاردة الوقفا وبكره العيد ,
ولبسنا كله هيبقى جديد , 

هناك 7 تعليقات:

  1. ^_^


    جميله جدا

    ده شكل من اشكال التكافل ال اتمنى يدوم دايما

    ردحذف
  2. فعلا يا خالد
    اتمنى ان العالم كله يحس ببعضة
    الغنى يدى الفقير
    اللى معاه يكفل اللى ممعهوش
    يسلم مرورك
    اخى الصغير وصديقى الكبير
    (^_^)

    ردحذف
  3. جمــيـله قوى يـســـلم قــلمك يا قلبي

    ردحذف
  4. تحفففففففة لابعد الحدود
    لدرجة اني بقرا وشايفة الاحداث ادامي
    تسلم ايديكي بجد

    ردحذف
  5. تسلمى يا ميمى يا قلبى
    اعقل مجنونة : شرفتنى زيارتك
    وشرفنى تعليقك جدا
    وانا مبسوطة انى قدرت ابسطك وانتى بتقريها
    يسلم مرورك واتمنى تزورينى تانى
    (^_^)

    ردحذف
  6. اسما انا هاجى اقري لاتقلقي بس ادينى فرصه لحسن حاليا الحاله العامه صاد :(

    ردحذف
  7. رونا : على مهلك وبراحتك يا قمر , المدونة موجودة تحت امرك فى اى وقت
    (^_^)

    ردحذف