الجمعة، 21 أكتوبر 2011

الحلقة العاشرة


سهتانة : أستر يارب , طيب اعمل ايه ياما ؟ بقولك ؟ انا هلبس واروح لمبروكة البيت أطمن عليها واشوف امها عاملة ايه
أم سهتانة : طيب يا بنتى وانا هاجى معاكى كمان
سهتانة: يلا ربنا يستر بقا
لبست سهتانة وامها وراحوا لمبروكة بيتها , وصلوا للبيت
سهتانة بتخبط على الباب بس محدش بيرد ,
سهتانة: انا قلقانة اوى ياما بجد وادينا جينا بيتهم وبرضة محدش بيرد
أم سهتانة : خير اللهم اجعلة خير , يكونوش راحوا بالست ام مبروكة على المستشفى ؟
سهتانة: مش عارفة يا اما , والله مانا عارفة
وهما واقفين كدة وقلقانين وبيضربوا اخماس فى اسداس , شافت سهتانة الواد هيما اخو مبروكة جاى من بعيد
سهتانة: الحمد لله يا اما , بصى الواد هيما  اخو مبروكة جاى من هناك اهو
ام سهتانة: طيب الحمد لله , نسألوه بقا ونطمن منه ,
هيما L : ازيك يا خالتى ؟ ازيك يا سهتانة؟
سهتانة: احنا كويسين المهم خالتى ام مبروكة عاملة ايه ؟ ومبروكة فين؟ انا بكلمها مش بترد؟ وجينالكم هنا ومحدش فيكم موجود ؟ خير يا هيما ؟
هيما L: امى تعبانة اوى يا سهتانة وداخت من شوية ووديناها المستشفى حجزوها هناك وانا جيت علشان اجيب لهم شوية حاجات من البيت , انا خايف اوى على امى يا سهتانه ,
وهنا , انفجر هيما فى العياط ومحدش منهم عرف يسكته ولا حد كمان عرف يطمنه على امه اغلى حاجة عنده فى الدنيا كلها ,
سهتانة: طيب تعالى ادخل شوف هتاخد ايه واحنا هنيجى معاك المستشفى علشان نطمن عليها ,
دخلت سهتانة وامها مع هيما وجهزوا كل الحاجات اللى محتاجينها هناك فى المستشفى , واتوكلوا على الله وراحوا المستشفى وهناك بقا ,
مبروكة: اترمت فى حضن سهتانة زاتفلقت من العياط , شوفتى يا سهتانة ؟ امى عيانة اوى , والدكتور عندها من ساعتها ومخرجش لحد دلوقت؟ انا قلقانة عليها , انا قلقانة اوى يا سهتانة ,
سهتانة: ربنا معاها ويشفيها وهيقومها بالسلامه يابت , بس انتى ادعى لها , واحنا كمان كلنا هندعى لها ,
ام سهتانة : اهدى يا مبروكة يا حبيبتى ربنا هيجيب العواقب سليمه ان شاء الله
مبروكة: تفتكرى يا سهتانة امى هتقوم بخير ؟ ولا .......؟
سهتانة  تحط ايدها على بق مبروكة وتقول لها
فال الله ولا فالك يا شيخة ,. ان شاء الله هتقوم بالسلامة ,
مبروكة: انتى عارفة انا بحب امى دى اد ايه ؟ انا ماليش غيرها يا سهتانة فى الدنيا
دى امى وصاحبتى وحبيبتى , دى بركة البيت , يااااااااااااااارب اشفيها يارب وخد بإديها , يااااااااااااارب انا ماليش غيرها يارب , بحق جاه حبيبك النبى وأهل بيته يارب تقومهالى بالسلامة
ام سهتانة : لا حول الله يارب , يا بنتى مش كدة اهدى شوية هيجرالك حاجة , ربنا ياخد بيدها ان شاء الله
سهتانة ومبروكة بيعيطوا , وبتحاول سهتانة تاخد بايد مبروكة صاحبتها , لكنها مش قادرة , عاطفة مبروكة لامها فوق الوصف , مسكت سهتانة مصحف وقعدت تقرا قرأن وشوية وطلع الدكتور من اوضة الست ام مبروكة
كلهم اتلموا عليه ,. خير يا دكتور ؟ خير يا دكتور؟
راح الدكتور لابو مبروكة وقاله :
الدكتور: بص يا حاج ماخبيش عليك , الست ام مبروكة حالتها صعبة شوية
هى عندها جلطة فى المخ
ابو مبروكة: جلطة؟ والعمل يا دكتور؟ يعنى ام مبروكة هتقوم بالسلامة؟ ولا ...........؟
الدكتور: والله ربنا يستر , احنا هنعمل اللى هنقدر عليه , والباقى طبعا على الله , ادعوا لها يا جماعة ربنا يقومها بالسلامة
وهنا انهارت مبروكة واغم عليها ووقعت من طولها , وكل الناس الموجودة من كتر حزنهم اتجمدوا فى مكانهم ومش عارفين يتصرفوا ازاى , سهتانة وهيما فوقوا مبروكة وهدوها شويه وكله قاعد يبكى ويدعى للست ام مبروكة , جه الدكتور وقالهم ان قاعدتهم دى مفيش منها فايدة , كله يروح على بيته ويبقوا يجولها بكرة ان شاء الله
كانت ليله طويله على مبروكة وعيلتها , وعلى سهتانة وامها كمان
راحت مبروكة وهيما مع سهتانة على بيتها علشان ما ينفعش تبقى لوحدها  , لان ابو مبروكة ومرضيش يروح على البيت , وحلف مليون يمين انه مش هيسيب المستشفى ولا هيطلع منها الا وايده فى ايد مراته ام مبروكة,
عدى الليل عليهم بالعافيه علىيهم , وما صدقوا طلع النهار وجروا كلهم على المستشفى علشان يطمنوا على ام مبروكة
دخلت مبروكة تجرى على اوضة امها وبتفتح الباب , لقت السرير فاضى , وامها مش موجودة
طلعت زى المجنونة تدور على ابوها , على ممرضة, على اى حد والسلام يطمنها على امها
لقت ممرضة جايه من بعيد, جرت مبروكة عليها
مبروكة: منهاره من العياط , امى فين؟ امى فين ؟
الممرضة: امك ........ نقلناها العناية المركزة
مبروكة: العناية المركزة؟ ودى فين دى ؟
الممرضة : فى الدور الرابع
جرت مبروكة وسهتانة وامها وهيما على الدور الرابع  علشان يعرفوا هو فى ايه؟ وحصل ايه؟
لقت مبروكة ابوها قاعد بيعيط فى الاستقبال , راحت عليه ,
مبروكة:ابااااا؟ امى فين يابا ؟. امى فيييييين ؟
ابو مبروكة: يحضن بنته اوى هى وهيما ويمسح دموعهم . امكم بخير يا عيال هى بس نقلوها هنا علشان هى تعبت بالليل
مبروكة: انا عاوزة اشوف امى
ابو مبروكة : بيقولوا لى ممنوع يا بنتى , وادينى قاعد مستنى ميعاد الزيارة .
مبروكة: زياااااااااارة؟ زيارة ايه دى ؟ هو انا لما اعوذ اطل على امى اخد اذن ؟
لا ......... انا هشوف امى دلوقت , وفى اى وقت بدأ صوت مبروكة يعلى وكلهم اتلموا حواليها علشان يهدوها , بس يهدوها ازاى وكلهم على نار , وقلقانين جدا على الست ام مبروكة , وحتى جوزها نفسة مش فاهم حاجة من اللى بتحصل حواليه , و فى وسط الزعيق بتاع مبروك جالها الدكتور بيجرى
الدكتور : ايه الزعيق دة؟ انتى فاكرة نفسك فين هنا ؟
مبروكة : انا مليش دعوة انا عاوزة اشوف امى دلوقتى
الدكتور : ما ينفعش يا بنتى , امك فى غيبوبة , ومش هتسمعك ولا هتسمعيها ,
مبروكة: غيبوبة ؟ وبدأت مبروكة تنهار وتعيط وتتوسل للدكتور
ابوس ايدك عايزة  اشوف امى , ابوس ايدك
الدكتور : لا حول الله يارب , طيب اهدى بس يا بنتى , طيب تعالى معايا
اخد الدكتور مبروكة وهيما وفتح لهم باب اوضة الست ام مبروكة
الدكتور: تبصوا عليها بس , ما تتكلموش , خلاص اتفقنا
مبروكة وهيما : حاضر يا دكتور كتر خيرك
دخلت مبروكة وهيما الاوضة , وشافوا امهم وهى نايمة زى الملايكة , وشها الابيض اللى زى البدر المنور , بس امهم النهاردة مش هتكلمهم زى العادى , مش هتسمعهم زى العادى , مبروكة مسكت كف امها وحضنتة اوى وباسته ودموعها غرقت كف امها
مبروكة: يلا يا اما , يلا قومى بالسلامة , علشان تروحى معانا , وتنورى بيتك تانى ,             عارفة؟ لما تخفى وتقومى بالسلامة ؟انا مش هزعلك ابدا , وهروق لك البيت , وهساعدك فى المطبخ , وهبقى تحت رجليكى بس انتى قومى يلا بالسلامة
هيما : انتى وحشتينى اوى يا اما , وحشنى هزارك, وضحكك,و زعيئك معايا ,
إنهارت مبروكة وهيما  , دخل الدكتور يجرى اخدهم بره الاوضة
الدكتور: روقوا بقا ان شاء الله هتقوم بالسلامة , إدعوا لها بس ,
مبروكة : يارب يا دكتور , يارب,
الدكتور : بصوا بقا انتم روحوا دلوقتى ارتاحوا وتعالول بالليل ,
مبروكة : لا انا هقعد هنا مع ابويا واخويا ومش هنمشى غير لما تطلع معانا من هنا ,
الدكتور: طيب , براحتك, اتفضلى بقا على الريسبشن,
راحت مبروكة وهيما للباقيين وقالولهم انهم شافوا امهم وانها نايمه , وعدت الساعات والسكوت هو المسيطر على الموقف وفى وسط السكوت دة كله , لقوا الممرضة بتجرى عليهم ,                  مبروكة ؟ مبروكة؟ مين اللى اسمها مبروكة؟           
      مبروكةL بخوف وقلق شديد :  انا ....انا ........مبروكة خير فى ايه ؟

هناك تعليق واحد:

  1. ف انتظار باقى الاحداث..هيا الدنيا اغمقت ليه كده

    ما كنا حلووووين
    :(

    ردحذف