الصلح خير(^_^)

تحت تأثير كلمات أغنيه رومانسية وحساسة للغاية
جت وقعدت جنبى وعنيها كلها حزن ,
مالك يا بنتى ؟ خير اللهم أجعله خير ؟
مفيش انا كويسه وتنهيدة طووووووووويله,
وطبعا انا عارفة يعنى ايه انا كويسة لما بيجى فى ديلها علطول التنهيدة إياها,
ودة معناه إنها لا كويسه ولا أى بدنجان ,
من هنا لهنا وانا اصلى رخمه اوى ولازم اقعد على القرار,
قرت واعترفت إنها متخانقة مع حبيبها ,
لا ومش متخانقه معاه وبس, دى كمان سمعته من المنقى يا خيار,
هى طبعا قاعده بتتكلم قدامى وهى إإإإإيه ميت فل وعشرة,
وعملالى أسد الغابة وشجيع السيما أبو شنب بريما ,
ولإنى طبعا عارفاها وعجناها وخبزاها ,
سيبتها تتكلم وتطلع كل اللى عندها ,
ما هو ما ينفعش خالص حد يجى يفضفض معاك وتسكته او تحسسه انه غلط
لا احسن حاجه سيبه يفضى الاول ويطلع اللى عنده وبعدين بالهداوة كله بيتحل
المهم نرجع لموضوعنا ,
خلصت صاحبتى حبيبتى الكلام ومن وجهة نظرها انها كدة ارتاحت واخدت حقها وكله بونو وفل الفل ,
بصيت لها انا أوى فى عنيها الحلوين وقلت لها ,
هو انتى لسه بتحبيه ؟ ولا خلاص الحوار فاكس ونشربه جنزبيل مع حمادة ؟
سكتت ......... ولما تسأل حد انت بتحب فولان دة ولا لا ويسكت ,
دة مالوش غير معنى واحد بس انه مش بس بيحبه ده بيمووووووووت فيه
بشويش وواحده واحده اخدنا وادينا مع بعض,
إتصل ومكنتش بترد عليه وبصراحة أنا كمان ما قدرتش عليها ,
وفيييييييييين لحد ما اقنعتها انها ترد عادى وتتكلم عادى والحمد لله بعد عذاب وافقت واقتنعت ;)))
اصلها على فكرة صعيدية ودماغها ناشفة اوى :)
وفى وسط كل الهيلمنات اللى هى عملاها وشبورة القلق اللى كان فاضل عليها دقيقة وتمطرعلينا واحنا قاعدين 
اتصل صاحبنا . يا مسهل يارب ؟
والحيرة فى عنيها وعنيا ؟
هو عاوز ايه؟ وبيتصل ليه ؟
قلت لها على فكرة انتى لو رديتى هنعرف كل دة ,
رررررررررررررردى .
وكان......... وردت والحمد لله ,
وبس ...........
هى سمعت صوته  , وطلعت كل اللى كان واجعها وتاعبها ,
وإتأكدت أنها بتحبه وهو كمان بيحبها ,
وبصراحة الراجل عداه العيب , شالها على كفوف الراحة
والحمد لله إتصالحوا ورجعوا زى الأول وأحسن ,
وفى لحظة والله وأقل من اللحظة إتبدلت ملامح وشها , حسيتها حد تانى غير اللى كان واقف معايا من شوية , حسيتها طايرة للسما وماسكة النجوم بإيديها,
ربنا يسعدهم ببعض يارب ويسعد كل اتنين بيحبوا بعض بجد ,
فياريت اى حد يلاقى حد بيحبه يمسك فيه بأيده وسنانه,
ومعلش يا سيدى هتيجى النهارده على نفسك هى هتيجى على نفسها بكره
والدنيا هتمشى , ماهو اصلها لازم تمشى ,
فايه رأيكم تمشى واحنا مبسوطين ومعانا حد بيحبنا وشارينا وخايف علينا ؟
ولا تمشى على جدور رقبتنا لما نعند ونكبر التفاهات ونناطح بعضينا ؟
هاااااااااااااا؟ مش بزمتكم أنا كدة عدانى العيب ؟